سپورتتىق اتۋ تۇرلەرىنەن قازاقستان ءبىرىنشى ورىندا

قازاقستان سپورتتىق اتۋ تۇرلەرىنەن دجاكارتادا ءبىرىنشى ورىن الدى.

 يندونەزيانىڭ دجاكارتا قالاسىندا سپورتتىق اتۋ تۇرلەرى بويىنشا الەم كۋبوگى مارەسىنە جەتتى. جىلدىڭ العاشقى بايراقتى باسەكەسى جەرلەستەرىمىز ءۇشىن جەمىستى بولدى، دەپ حابارلايدى Almaty-akshamy.kz 24.kz-كە سىلتەمە جاساپ. 

ۇلتتىق قۇراما قورجىنىنا 10 مەدال ءتۇستى. ونىڭ 3-ەۋى التىن. اتاپ ايتقاندا، شىمكەنتتىك نيكيتا چيريۋكين 25 مەتردەن تاپانشامەن نىسانا كوزدەۋدە الدىنا جان سالمادى. ال، ايەلدەر اراسىندا ارينا التۋحوۆا بارلىق مۇمكىندىگىن ۇتىمدى پايدالانىپ، ەڭ ۇزدىك ناتيجەنى تىركەدى. بۇعان قوسا، قازاقستاندىق قىزدار دا كوماندالىق سىندا توپ جاردى. پنيەۆماتيكالىق ۆينتوۆكادان نىسانا كوزدەۋ باسەكەسىندە الەكساندرا لە، ەليزاۆەتا بەزرۋكوۆا جانە اناستاسيا گريگوريەۆا ۇشتىگى قورعاعان بولاتىن. بۇعان قوسا، ۇلتتىق قۇراما سپورتشىلارى 5 كۇمىس پەن 2 قولا جەڭىپ الدى. بۇل كورسەتكىش جالپىكوماندالىق ەسەپتە ءبىرىنشى ورىنعا كوتەرىلۋگە مۇمكىندىك بەردى.

ايتا كەتەيىك، الەم كۋبوگىنىڭ قورىتىندىسى بويىنشا جاقسى ناتيجە تىركەگەن سپورتشىلارعا رەيتينتىك ۇپايلار تاراتىلدى. ءدال وسى ءتىزىم كەيىن پاريج وليمپياداسىنىڭ جولدامالارى ساراپقا سالىنعاندا نەگىزگى ءرولدى اتقارادى.