قىمباتشىلىققا كىم كىنالى؟

بيىل ينفلياسيا دەڭگەيىن 9،5 پايىزدان اسىرماۋ قاجەت.

ۇكىمەت باسشىسى ءاليحان سمايىلوۆ ازىق-تۇلىك باعاسىنىڭ قىمباتتاۋىنا كىمدەردىڭ كىنالى ەكەنىن ايتتى، دەپ حابارلايدى Almaty-akshamy.kz

"ءبىز بىلتىر قاجەتتى قوردى جيناقتاپ الدىق. سوندىقتان كوكونىس ونىمدەرى جاعىنان تاپشىلىق بولماۋى ءتيىس ەدى. اكىمدەرگە باعانى ۇستاۋ ءۇشىن قاجەتتى تەتىكتەردىڭ بارلىعىن بەردىك، قارجى دا ءبولىندى. ءبىراق باعا ءبارىبىر ءوسىپ جاتىر. اكىمدىكتەردىڭ ءتيىمدى جۇمىسىن كورىپ وتىرعان جوقپىن. جەرگىلىكتى جەرلەردە اتالعان ماسەلەگە سالعىرت قاراۋدىڭ سالدارىنان باعانىڭ ءوسۋى توقتايتىن ەمەس"، - دەدى سمايىلوۆ ۇكىمەتتىڭ بۇگىنگى وتىرىسىندا.

وسى ورايدا پرەمەر پياز ماسەلەسىن دە ەسكە سالدى. اكىمدەرگە الدىن الا كەلىسىمشارت جاساۋعا تاپسىرما بەرىلگەن بولاتىن. ءبىراق ولار "پياز جەتكىلىكتى" دەپ بىرنەشە رەت ايتقان.

"وندا پياز نەگە قىمباتتاپ جاتىر؟ بىزدە پياز كوپ وسەدى. الايدا باعانى تومەندەتۋ ءۇشىن پياز ەكسپورتىنا تىيىم سالىپ، شۇعىل شارالار قابىلداۋعا ءماجبۇر بولدىق. ءبىز ءبىرىنشى كەزەكتە ءونىم وندىرۋشىلەردى فورۆاردتىق ساتىپ الۋ مەحانيزمدەرىن قايتا قارادىق. الايدا اكىمدەر جەتكىزۋشىلەرگە قارجى ءبولۋدى دوعارماي وتىر. وكىنىشكە قاراي، ول دەلدالداردى كوبەيتكەننەن باسقا ناتيجە بەرىپ جاتقان جوق"، - دەپ اتاپ كورسەتتى ۇكىمەت باسشىسى.

بۇدان بولەك، وڭىرلەرگە تۇراقتاندىرۋ قورلارىن ءتيىمدى باعامەن تولتىرىپ الۋعا مۇمكىندىك بەرىلدى. ءبىراق ءتيىمدى جۇمىس كورىنبەيدى. ال بيىل ينفلياسيانىڭ دەڭگەيىن 9،5 پايىزدان اسىرماۋ قاجەت.

"بۇعان قول جەتكىزۋگە ابدەن بولادى. ول ءۇشىن تەك بارلىق وڭىرلەردىڭ ازىق-تۇلىك باعاسىن تۇراقتاندىرۋ، اسىرەسە، ماۋسىمارالىق كەزەڭدە باعانى ۇستاپ تۇرۋ بويىنشا بەلسەندى جۇمىسى قاجەت. سىزدەردە قاجەتتى قۇرالداردىڭ ءبارى بار"، - دەيدى سمايىلوۆ.