قارجىلىق مونيتورينگ اگەنتتىگى دەنە شىنىقتىرۋ جانە سپورت سالاسىن دامىتۋعا بولىنگەن مەملەكەت قارجىسىنىڭ ۇرلانۋىنىڭ الدىن الۋ بويىنشا جۇمىس جۇرگىزۋدە، دەپ حابارلايدى Almaty-akshamy.kz.
اگەنتتىك مالىمەتىنشە، سپورتتىق-ساۋىقتىرۋ ءىس-شارالارىنىڭ، نىسانداردىڭ، قۇراما كوماندالاردىڭ، بۇقارالىق سپورتتىق ءىس-شارالاردىڭ، فەدەراسيالاردىڭ رەيتينگىسى مەن قاۋىپتەرى كورسەتىلگەن تىزبەسى قالىپتاستىرىلدى. سونداي-اق سالانى قارجىلاندىرۋدىڭ جولدارى مەن كولەمى، ونىڭ ىشىندە دەمەۋشىلىك كومەك كولەمىن انىقتاۋ باعىتىندا جۇمىستار جۇرگىزىلىپ جاتىر.
«2023 جىلدىڭ 6 ايىندا عانا اگەنتتىكتە جالپى سوماسى 269،3 ملن تەڭگە زالالى بار 21 ءىس تەرگەلۋدە. ايتا كەتەيىك، اشىق اقپارات كوزدەرىنەن الىنعان مالىمەتتەرگە سايكەس، 2019-2023 جىلدار ارالىعىندا سپورتتى دامىتۋعا شامامەن 300 ملرد تەڭگە بولىنگەن»، - دەپ اتاپ ءوتتى ۆەدومستۆو وكىلدەرى.
اگەنتتىك تاۋارلار مەن قىزمەتتەردى جوعارىلاتىلعان باعامەن ساتىپ الۋ، قىزمەت كورسەتۋدىڭ ناقتى ورىندالماۋى جانە باسقا دا زاڭبۇزۋشىلىقتار بويىنشا تالداۋ جۇرگىزەدى.
جۇرگىزىلگەن جۇمىستاردىڭ ناتيجەسىندە سپورتتى دامىتۋعا بولىنگەن بيۋدجەت قاراجاتىنىڭ ۇرلانۋىنا جاعداي تۋعىزاتىن سەبەپتەردى انىقتاۋ جانە مۇنداي زاڭبۇزۋشىلىقتاردىڭ الدىن الاتىن تەتىكتەردى جەتىلدىرۋ بويىنشا ۇسىنىستار ازىرلەۋ جوسپارلانىپ وتىر.
قما مەملەكەتتىك بيۋدجەت قاراجاتىن جىمقىرۋ ءۇشىن قىلمىستىق جاۋاپكەرشىلىك قاراستىرىلعانىن ەسكەرتەدى.