ءوءمىر بويىنا بەرىلەتىن تولەمدى تاعايىنداۋ كەزىندە تالاپ ەتىلەتىن سپورتشىنىڭ ەڭبەك ءوتىلى وزگەردى.
ءقازىر ول 20 جىل بولسا، ەندى بۇل مەرزىم 10 جىلعا دەيىن قىسقارادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى ۋاقىتتا قولدانىستاعى زاڭنامادا وليمپيادالىق، پاراليمپيادالىق، سۋردليمپيادالىق ويىنداردىڭ چەمپيوندارى مەن جۇلدەگەرلەرى جانە وليمپيادالىق سپورت تۇرلەرى بويىنشا الەم چەمپيوندارى مەن ولاردىڭ جاتتىقتىرۋشىلارى ءۇشىن ءومىر بويى اي سايىنعى تولەم بەرۋ كوزدەلگەن. سونىمەن قاتار، سپورتشىلارعا، ولاردىڭ جاتتىقتىرۋشىلارىنا قويىلاتىن تالاپتاردىڭ ءبىرى - 20 جىلدىق ەڭبەك ءوتىلى. الايدا، تالاپتاردى ناقتىلاۋ ماقساتىندا ق ر ازاماتتارى سانالاتىن سپورتشىلار مەن ولاردىڭ جاتتىقتىرۋشىلارى ءۇشىن ەڭبەك ءوتىلىنىڭ بارلىق كەزەڭى قازاقستان اۋماعىندا ەسەپتەلگەن بولۋى ءتيىس دەگەن تولىقتىرۋ ەنگىزۋ قاجەت» دەلىنگەن مادەنيەت جانە سپورت مينيسترلىگى جاريالانعان رەتتەۋشىلىك ساياساتتىڭ كونسۋلتاتيۆتىك قۇجاتىندا.
سونىمەن قاتار، ۆەدومستۆو جوعارى جەتىستىككە جەتكەن سپورتشىلار ءۇشىن ەڭبەك ءوتىلىن 20 جىلدان 10 جىلعا دەيىن قىسقارتۋدى ۇسىنىپ وتىر.
«قازاقستاندىق سپورتشىلاردى ەڭ جوعارى كورسەتكىشتەرگە قول جەتكىزۋگە ىنتالاندىرۋ ماقساتىندا سپورتشىلار ءۇشىن قازاقستان اۋماعىندا دەنە شىنىقتىرۋ جانە سپورت سالاسىندا ەڭبەك ءوتىلىنىڭ بولۋى تۋرالى تالاپتى 10 جىلعا دەيىن تومەندەتە وتىرىپ، قايتا قاراۋ ۇسىنىلادى. سونىمەن قوسا، سپورتتىق ناتيجەلەردى تالداۋ ناتيجەسى شاحماتتا جوعارىدا اتالعان سپورت تۇرلەرىنە ۇقساس باسەكە وتە ۇلكەن ەكەنىن كورسەتتى. وسىعان بايلانىستى سپورتشىلار مەن ولاردىڭ جاتتىقتىرۋشىلارىن زياتكەرلىك سپورت تۇرلەرى بويىنشا ماتەريالدىق قامتاماسىز ەتۋ قازاقستاننىڭ زياتكەر ۇلتىن قالىپتاستىرۋعا ىنتالاندىرادى»، - دەلىنگەن اسحات ورالوۆ جەتەكشىلىك ەتىپ وتىرعان ۆەدوستۆونىڭ ماسەلەلەرى كورسەتىلگەن رەتتەۋشىلىك ساياساتتىڭ كونسۋلتاتيۆتىك قۇجاتىندا.