سىبايلاس جەمقورلىققا قارسى قىزمەتتە اگەنتتىك ءتوراعاسى ا. ءجۇماعاليدىڭ باسشىلىعىمەن سپورتتى قارجىلاندىرۋ سالاسىنداعى جەمقورلىق تاۋەكەلدەرىن جويۋ ماسەلەلەرى بويىنشا ۆەدومستۆوارالىق ءماجىلىس ءوتتى، دەپ حابارلايدى اlmaty-akshamy.kz
ءماجىلىس جۇمىسىنا اگەنتتىك ءتوراعاسى ا. جۇماعاليمەن بىرگە تۋريزم جانە سپورت ءمينيسترى ە.ب. مارجىقپايەۆ، ۇلتتىق وليمپيادالىق كوميتەتىنىڭ پرەزيدەنتى گ.گ. گولوۆكين، استانا قالاسىنىڭ اكىمى ج.م. قاسىمبەك، قارجى جانە سيفرلاندىرۋ ۆيسە-مينيسترلەرى، «سامۇرىق-قازىنا» اق باسشىلىعى، قوعام قايراتكەرلەرى، ورتالىق جانە وڭىرلىك مەملەكەتتىك ورگاندار قاتىستى.
ەلىمىزدە سپورتتى دامىتۋعا بولىنەتىن مەملەكەتتىك قاراجاتتىڭ ۇتىمسىز جانە ءتيىمسىز جۇمسالۋىنا اكەپ سوقتىراتىن ەلەۋلى جەمقورلىق تاۋەكەلدەرى مەن فاكتورلارىنىڭ بولۋىن كورسەتكەن سىرتقى تالداۋ ناتيجەلەرى تالقىلاندى.
اگەنتتىك اعىمداعى جىلدىڭ باسىنان بەرى سپورت سالاسىندا 39 جەمقورلىق قىلمىسىن تىركەدى.
بەيىندى مينيسترلىك ىشىندەگى جەمقورلىقتىڭ اۋقىمى قازىرگى ۋاقىتتا بۇرىنعى ۆيسە-مينيستر، سپورت جانە دەنە شىنىقتىرۋ ىستەرى كوميتەتىنىڭ ءتوراعاسى، سپورتتى دامىتۋ ديرەكسياسىنىڭ باسشىسى جانە باسقا دا لاۋازىمدى تۇلعالاردىڭ قىلمىستىق جاۋاپكەرشىلىككە تارتىلۋىنا اكەلدى.
ۇلت دەنساۋلىعىن نىعايتۋ جانە بۇقارالىق، اسىرەسە بالالار سپورتىن دامىتۋ ماسەلەلەرىنە مەملەكەت باسشىسى ەرەكشە كوڭىل بولەدى.
تەك سوڭعى 6 جىلدا وسى سالاداعى بيۋدجەت 2 ەسەگە ءوسىپ، 1،4 ترلن تەڭگەنى قۇرادى.
الايدا، قازاقستاننىڭ الەمدىك سپورتتاعى رەيتينگى تومەندەۋدە.
وسى سالا بيۋدجەتىنىڭ 90%-ى جۇمسالاتىن «جوعارى جەتىستىكتەر» جانە «بۇقارالىق» سپورتتى قارجىلاندىرۋ اراسىندا تەڭگەرىمسىزدىك بايقالادى.
ال دامىعان ەلدەردە پروپورسيالار مۇلدەم وزگەشە جانە بۇقارالىق سپورتقا قاراجات ءبولۋ باسىم.
«قارجىلاندىرۋداعى ديسپروپورسيا جەمقورلىق سحەمالارىنا نەگىز بولدى. ەگەر بۇقارالىق سپورتتا ءقازىر سيفرلاندىرىلعان جان باسىنا شاققانداعى قارجىلاندىرۋ باعدارلاماسى جۇمىس ىستەپ تۇرسا، وندا جوعارى جەتىستىكتەر سپورتىندا اشىق ەمەس جانە سۋبەكتيۆتى تولەمدەر، از باقىلاۋ، اففيليرلەنگەن قاتىسۋشىلار، جالعان وقۋ-جاتتىعۋلار جانە قوسارلانعان قارجىلاندىرۋعا جاعداي جاسالعان»، – دەپ اتاپ ءوتتى اگەنتتىك ءتوراعاسى.
سپورتتىق پروسەستەردە سيفرلاندىرۋدىڭ بولماۋى جەمقورلىق قۇقىق بۇزۋشىلىقتار مەن قاراجاتتاردىڭ جىمقىرىلۋىنا قولايلى.
ەكى جىل بۇرىن جوسپارلانعان «ە-sport» اقپاراتتىق جۇيەسى وسى ۋاقىتقا دەيىن ىسكە قوسىلعان جوق. «سپورت شەبەرلەرى» جالعان اتاقتارىن بەرۋ فاكتىلەرى انىقتالدى.
ماجىلىستە قازاقستانداعى سپورتشىلاردى ناتۋراليزاسيالاۋ، كاسىبي كلۋبتاردىڭ بيۋدجەتتەرىن قالىپتاستىرۋ جانە لەگيونەرلەرگە تولەمدەردى قارجىلاندىرۋ ماسەلەلەرى تالقىلاندى.
ەل پرەزيدەنتىنىڭ بيۋدجەت پەن جالاقى مولشەرىن شەكتەۋ جونىندەگى تاپسىرماسىنا قاراماستان، ەلىمىزدىڭ فۋتبول كاسىپوداق كلۋبتارى سوڭعى 3 جىل ىشىندە 30 ملرد تەڭگەدەن استام ۇستەمە اقى تولەدى.
سونىمەن قاتار، ءوزىنىڭ سپورتتىق ينفراقۇرىلىمىن دامىتۋدىڭ ورنىنا بيۋدجەت قاراجاتى لەگيونەرلەرگە تولەم جاساۋعا جانە سپورت نىساندارىن جالعا الۋعا جۇمسالدى.
تالداۋ قورىتىندىسى بويىنشا اگەنتتىك سالالىق مينيسترلىكتىڭ اتىنا جەمقورلىق تاۋەكەلدەرىن جويۋ بويىنشا ۇسىنىمدار ەنگىزدى.
ۆەدومستۆولىق باقىلاۋدى كۇشەيتۋ جانە ديسكرەسيالىق وكىلەتتىكتەردى قىسقارتۋ، قاراجاتتى ءبولۋ پروسەستەرىن ناقتى نورماتيۆتىك جانە قۇقىقتىق رەگلامەنتتەۋدى بەلگىلەۋ جانە بۇزۋشىلىقتار ءۇشىن جاۋاپكەرشىلىكتى دەربەستەندىرۋ، سونداي-اق ءبىرىڭعاي سيفرلىق پلاتفورما قۇرۋ تۋرالى سۇراقتار قويىلدى.
ءوز سوزىندە تۋريزم جانە سپورت ءمينيسترى ە.ب. مارجىقپايەۆ مەملەكەتتىك ورگاننىڭ قازىرگى ۋاقىتتا ۇيىمدىق-قۇقىقتىق شارالار كەشەنىن قابىلداعانى تۋرالى حاباردار ەتىپ، جەمقورلىق تاۋەكەلدەرىن جويۋ بويىنشا بارلىق ۇسىنىمداردىڭ مىندەتتى تۇردە ورىندالاتىندىعىن ايتتى.
ۇلتتىق وليمپيادالىق كوميتەتىنىڭ پرەزيدەنتى گ. گولوۆكين: «مەنىڭ ۇستانىمىم ءبىرجاقتى جانە مەنىڭ سپورتتىق مانسابىم دا وزگەرىسسىز قالادى – جەمقورلىققا مۇلدەم توزبەۋشىلىكتى قالىپتاستىرىپ، ونىڭ كەز كەلگەن كورىنىستەرىنە قاتاڭ شارالار قولدانۋ قاجەت»، - دەپ اتاپ ءوتتى.
كەڭەس قورىتىندىسى بويىنشا سىبايلاس جەمقورلىققا قارسى ۆەدومستۆونىڭ باسشىسى ۋاكىلەتتى ورگانداردى ەلدەگى سپورتتى دامىتۋ جونىندەگى تىكەلەي مىندەتتەردى مۇلتىكسىز ورىنداۋعا شاقىردى جانە جەمقورلىق بۇزۋشىلىقتاردىڭ جاسالۋىنا جول بەرمەۋ تۋرالى ەسكەرتتى.
ءسوز سوڭىندا ا. جۇماعالي قازاقستاندىق سپورتشىلارعا الداعى وليمپيادادا تابىس تىلەدى.