بەس جىلعا جالعاسقان «Bek Air» تەرگەۋى اياقتالدى. الماتى ماڭىندا اپاتقا ۇشىراعان كومپانيا ۇشاعىنا قاتىستى باس-اياعى 4 مىڭ تەرگەۋ ارەكەتى جۇرگىزىلدى. بۇل تۋرالى بۇگىن كولىكتەگى پوليسيا دەپارتامەنتى حابارلادى.اۋە اپاتىنا قاتىستى تىڭعىلىقتى تەكسەرىس ءجۇردى. وقيعا ورنى مەن كومپانياعا قاتىستى 2 مىڭ رەت تەكسەرۋ توبى بارعان. ال ۇزىن-سانى 1350 ادامنان جاۋاپ الىنعان. تەرگەۋ ىسىنە بەلگيا، گەرمانيا، ليۋكسەمبۋرگ جانە نيدەرلاندى ەلدەرى دە ات سالىستى. ءقازىر ىسكە قاتىسۋشىلار سوتقا دەيىنگى تەرگەپ-تەكسەرۋ ماتەريالدارىمەن تانىسىپ جاتىر.
ەسكە سالايىق، 2019 جىلى 27 جەلتوقسانىندا الماتى اۋەجايىندا «Bek Air» اۋەكومپانياسىنىڭ «Fokker-100» ۇشاعى اپاتقا ۇشىرادى. ۇشاق كوتەرىلۋ بيىكتىگىن جوعالتىپ، ەكى قاباتتى قۇرىلىس نىسانىمەن سوقتىعىسقان بولاتىن. اپات سالدارىنان 12 ادام قازا تاۋىپ، 49 ادام زارداپ شەككەن.