الىپ شاھارىمىزدىڭ ناۋرىزباي اۋدانىندا №188 مەكتەپ-گيمنازياسىنىڭ جاڭا سپورت الاڭى اشىلدى. زامان تالابىنا سايكەس جاسالعان سپورتتىق الاڭ ەكى مىڭعا جۋىق وقۋشىعا ارنايى ازىرلەنگەن.
قالالىق ءبىلىم باسقارماسىنىڭ ۇسىنىسىمەن، جەرگىلىكتى بيۋدجەتتەن قاراجات بولىنگەن بولاتىن. جالپى كولەمى 3200 شارشى مەتردى قۇرايتىن الاڭدا شاعىن فۋتبول، ۆولەيبول جانە باسكەتبول الاڭدارىمەن قاتار، ءتۇرلى جاتتىعۋ قۇرىلعىلارى ورناتىلعان. سپورت الاڭىندا وقۋشىلاردىڭ باسكەتبول، ۆولەيبول، فۋتبول، توعىزقۇمالاق، شاحمات، ۇستەل تەننيسى، بەساسىق، اسىق اتۋ، جەڭىل اتلەتيكا جانە تاعى دا باسقا سپورت ۇيىرمەلەرى تەگىن جۇمىس جاساۋدا.
سپورتتىق الاڭنىڭ اشىلۋىنا اۋدان اكىمدىگى، اتا-انالار، بەلگىلى سپورتشىلار مەن ۇستازدار قاتىستى. بالالاردىڭ سالاۋاتتى ءومىر سالتىن ۇستاۋعا سەپتىگىن تيگىزەتىن الاڭ بولارىنا قوناقتار سەنىم ءبىلدىردى. وسى ورايدا، ناۋرىزباي اۋدانى اكىمىنىڭ ورىنباسارى ميراس نىسانالييەۆ وقۋشىلاردى قۇتتىقتاپ، ولاردان ۇلكەن ءۇمىت كۇتەتىنىن اتاپ ءوتتى.
«بۇل مەكتەپ اۋدانىمىزداعى ەڭ كيەلى ءبىلىم وردالارىنىڭ ءبىرى. وسى جەردەن قانشاما ءبىلىمدى دە، تالانتتى جاستارىمىزدىڭ شىعارىنا سەنىمدىمىز. بارلىعىمىز بىلەتىندەي، سپورت – دەنساۋلىق كەپىلى. بولاشاقتا دەنساۋلىعى مىقتى ۇرپاق قالاساق، ءدال وسىنداي سپورتتىق الاڭدار ارقىلى كوڭىل بولگەنىمىز ءجون بولار»، – دەدى م.نىسانالييەۆ.
اتا-انالار تاراپىنان دا ريزاشىلىعىن بىلدىرگەندەردىڭ قاراسى كوپ بولدى. الداعى ۋاقىتتا، بالالارىن مەكتەپتەگى تەگىن ۇيىرمەگە بەرەتىندەرىن ايتتى. بەلگىلى اقىن اقبەرەن ەلگەزەكتىڭ قىزى دا ءدال وسى مەكتەپتە ءبىلىم الادى ەكەن. ول دا ءوزىنىڭ جىلى لەبىزىن ءبىلدىرىپ، ءوز پىكىرىمەن بولىسكەن بولاتىن.
«بۇل مەكتەپتى مەن قاتتى جاقسى كورەمىن. سەبەبى، مەنىڭ قىزىم دا وسى مەكتەپتى ۇناتادى. وتە ۇلكەن، ءارى ادەمى سپورتتىق الاڭ اشىلىپ وتىر ەكەن. ەندىگى جەردە مەكتەپتە سالاۋاتتى ءومىر سالتىن ۇستاناتىن وقۋشىلار كوبەيەرى انىق. بولاشاقتا ءدال وسى مەكتەپتەن، ءدال وسى الاڭدا وتەتىن سپورتتىق ۇيىرمەلەردىڭ ارقاسىندا چەمپيوندارىمىز شىعىپ قالارى انىق. بالالاردىڭ اراسىندا سپورتتى ناسيحاتتاۋ، ولاردى سپورتقا باۋلۋ وتە ماڭىزدى»، – دەدى اقىن ا.ەلگەزەك.
ال وقۋشىلاردىڭ قۋانىشىندا شەك جوق. ەندى ولار، وزدەرىنە ۇنايتىن سپورت تۇرلەرىمەن جاڭا الاڭدا شۇعىلدانا الادى. ءتىپتى قالاسا تەگىن ۇيىرمەلەرگە قاتىسىپ، ۋاقىتتارىن ءتيىمدى پايدالانا الادى.
– مەكتەبىمىزدە بۇرىن-سوڭدى مۇنداي ۇلكەن سپورتتىق الاڭ بولعان ەمەس. وقۋشىلاردىڭ ءبارى ءدان ريزا. سەبەبى، قالاعان سپورت تۇرلەرىمەن اينالىسا الادى. ءتىپتى، ارالارىندا بولاشاق الەم چەمپيونى بولامىن دەپ وتىرعاندار دا از ەمەس. وسىنداي سپورتتىق الاڭ سالىپ بەرگەنى ءۇشىن بارىنە العىسىمدى ايتامىن، – دەدى مەكتەپ تۇلەگى اليمنۇر قادىرباي.