الماتىدا مەكتەپكە دەيىنگى ءبىلىم بەرۋ ۇيىمدارىنا مەملەكەتتىك ءبىلىم بەرۋ تاپسىرىسى بويىنشا ورىن سانى 33 پايىزعا ارتتى.
بيىل مەكتەپكە دەيىنگى تاربيە مەن وقىتۋعا مەملەكەتتىك ءبىلىم بەرۋ تاپسىرىسى بويىنشا جەرگىلىكتى بيۋدجەت ەسەبىنەن 7860 ورىن (2023 جىلى 5905 ورىن بولىنگەن) ءبولىندى. اعىمداعى جىلدىڭ اقپان ايىندا 72 جەكەمەنشىك بالاباقشاعا 3274 ورىنعا مەملەكەتتىك تاپسىرىستى ورنالاستىرۋعا كونكۋرس وتكىزىلدى، وسىعان بايلانىستى جەكەمەنشىك بالاباقشالاردا مەملەكەتتىك ءبىلىم بەرۋ تاپسىرىسى بويىنشا ورىن سانى ارتتى، دەپ حابارلايدى Almaty-akshamy.kz.
مەكتەپكە دەيىنگى تاربيە مەن وقىتۋدى، ورتا، تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋدى، سونداي-اق جوعارى جانە جوعارى وقۋ ورنىنان كەيىنگى ءبىلىم بەرۋدى جان باسىنا شاققانداعى نورماتيۆتىك قارجىلاندىرۋ ادىستەمەسىنە سايكەس وقىتۋدىڭ كرەديتتىك تەحنولوگياسىن ەسكەرە وتىرىپ، 2024 جىلعا ارنالعان جان باسىنا شاققانداعى قارجىلاندىرۋ كولەمى جالپى بالاباقشالاردا 1510 تەڭگەگە دەيىن، ارنايى توپتاردا 2106 تەڭگەگە دەيىن، مەكتەپالدى دايارلىق توپتارىندا 739 تەڭگەگە دەيىن ءوستى.
الايدا، اتا-انا تولەمىنىڭ - 25 000 تەڭگە- مولشەرى وزگەرگەن جوق.
مەگاپوليستە بارلىعى 980 مەكتەپكە دەيىنگى تاربيە مەن وقىتۋ ۇيىمى بار، ولارعا 84 797 بالا (194 مەملەكەتتىك، 786 جەكەمەنشىك بالاباقشا) بارادى. قازىرگى تاڭدا 701 جەكەمەنشىك مەكتەپكە دەيىنگى ۇيىم 45 430 ورىنعا مەملەكەتتىك تاپسىرىس بەرگەن.
مەملەكەتتىك تاپسىرىس كولەمىن ۇلعايتۋ تۋرالى قاۋلى جوباسىن تالقىلاۋ ءۇشىن نقا پورتالىندا ورنالاستىرىلدى. قىزىعۋشىلىق تانىتقان ازاماتتار جوبانى تالقىلاۋعا كەلەسى سىلتەمە ارقىلى قاتىسا الادى: https://legalacts.egov.kz/npa/view؟id=14998934