الماتىنىڭ كوك بازارىندا فيليپپيندىك بلوگەرگە اعىلشىن تىلىندە ەركىن سويلەپ، كادەسىي ساتقان بالانىڭ ۆيدەوسى جەلىنى جاردى. از عانا ۋاقىت ىشىندە 3 ميلليونعا جۋىق قارالىم جيناعان ۆيدەوداعى بالا - نۇرجول ساتىبالدى. اqshamnews.kz ءتىلشىسى جەلى جۇلدىزىنا اينالعان بالانى تاۋىپ، تىلدەسىپ قايتتى.
سۋرەت: Almaty-akshamy.kz.
نۇرجولدىڭ جەلىدە جارق ەتۋ جولى
نۇرجول - تالعار اۋدانى، بەساعاش اۋىلىنداعى №45 مەكتەپ-گيمنازياسىنىڭ 8-سىنىپ وقۋشىسى. 14 جاستاعى جەتكىنشەك ساباقتان تىس ۋاقىتتا اتا-اناسىنىڭ ساۋدا كاسىبىنە كومەكتەسىپ تۇرادى. ۆيرۋسقا اينالعان ۆيدەودان كەيىن نۇرجولدىڭ الەۋمەتتىك جەلىدەگى وقىرماندارى كوبەيىپ، كورگەن جۇرت جىلى لەبىزىن جاۋدىرعان.
ول اعىلشىن ءتىلىن تاجىريبەدە ءجيى قولداناتىنىن، بازارعا شەتەلدىك تۋريستەردىڭ ءجيى كەلىپ تۇراتىنىن ايتتى.
"جەلىدە تانىمال بولعان ۆيدەو وتكەن اپتانىڭ دەمالىس كۇندەرىنىڭ بىرىندە تۇسىرىلگەن بولاتىن. ول ءتۋريستىڭ بلوگەر ەكەنىن بىلمەدىم. قولىنداعى كامەراسىن بايقادىم، ءبىراق جەلىگە سالعان سوڭ جۇرت وسىنداي رەاكسيا بىلدىرەدى دەپ ويلامادىم. ادەتتە كوك بازارعا تۋريستەر ءجيى كەلەدى. ولارمەن وسىلاي اعىلشىنشا تىلدەسىپ ساۋدا جاساي بەرەمىن. مەن ءۇشىن قالىپتى جاعداي بولىپ كەتكەن. جالپى شەتەلگە شىققاندا، كۇندەلىكتى ومىردە اعىلشىن ءتىلىنىڭ كەرەك ەكەنىن ءتۇسىندىم. سولايشا كۋرستارعا جازىلىپ، مەكتەپتە دە اعىلشىن ءتىلىن قىزىعىپ وقي باستادىم. قاتتى بىلەمىن دەپ ايتا المايمىن، ءبىراق وسىلاي كۇندە تاجىريبەدە پايدالانىپ تۇرامىن" دەيدى نۇرجول.
سۋرەت: Almaty-akshamy.kz.
"قازاقتىڭ ءبىر ءسوزىن بولسىن ۇيرەنىپ كەتسە ەكەن دەدىم"
نۇرجول ۆيدەو سوڭىندا تۋريستكە "راقمەت" ءسوزىن ۇيرەتۋىن دە تۇسىندىرە كەتتى.
"وزگە ءتىل تىرلىك ءۇشىن، ءوز ءتىلىڭ بىرلىك ءۇشىن" دەگەن ءسوز بار عوي. سول سەكىلدى مەنىڭ بۇل ۆيدەوداعى تۋريستكە قازاقشا العىس ايتۋدى ۇيرەتكەنىم - قازاقتىڭ ءبىر ءسوزىن بولسىن ءبىلىپ جۇرسە ەكەن دەدىم. مەنىڭشە ناعىز پاتريوت بولۋ، ۇلتىڭدى ءسۇيۋ وسىنداي كىشىگىرىم دۇنيەلەردەن باستالادى" دەيدى ول.
سۋرەت: Almaty-akshamy.kz.
"بولاشاقتا اۋەجاي قىزمەتكەرى بولعىم كەلەدى"
نۇرجول ءقازىر ءوز اۋىلىنداعى فۋتبول كلۋبىنىڭ قاقپاشىسى. اياق دوبىن حوببي ەتكەن ءجاسوسپىرىم كەلەشەكتە اۋەجايدا جۇمىس ىستەگىسى كەلەتىنىن ايتتى.
"ءحوببيىم- فۋتبول ويناۋ. ءوز اۋىلىمداعى "سۇڭقار" فۋتبول كلۋبىنىڭ قاقپاشىسىمىن. ءجيى جارىستارعا شىعىپ، جۇلدەگەر بولىپ تۇرامىز. ءبىراق بولاشاقتا اپكەم سەكىلدى اۋەجاي قىزمەتكەرى بولعىم كەلەدى. شەتەلدەرگە ءجيى شىعىپ، تانىمىمدى ارتتىرىپ، الەمدى ارالاعىم كەلەدى" دەيدى نۇرجول.