الماتىدا تاۋلىك بويى جۇمىس ىستەيتىن كىتاپحانالار جەلىسىن كەڭەيتۋ جۇمىستارى مەملەكەت باسشىسى قاسىم-جومارت توقايەۆتىڭ الماتىنى «ەشقاشان ۇيىقتامايتىن» مەگاپوليسكە اينالدىرۋ جونىندەگى تاپسىرماسى اياسىندا جالعاسۋدا، دەپ حابارلايدى aqshamnews.kz
اقپان ايىنان باستاپ تاعى ەكى قالالىق كىتاپحانا — اۋەزوۆ اۋدانىنداعى قازاقستان جازۋشىلارى كىتاپحاناسى جانە بوستاندىق اۋدانىنداعى الماتى كىتاپحانالارىنىڭ فيليالى 24/7 رەجيمىندە قىزمەت كورسەتەدى.
بۇعان دەيىن قالادا ءۇش كىتاپحانا تاۋلىك بويى جۇمىس ىستەۋ تارتىبىنە كوشكەن بولاتىن. ولار جامبىل اتىنداعى قالالىق جاسوسپىرىمدەر كىتاپحاناسى، Alatau Creative Hub ورتالىعى جانە مۇحتار اۋەزوۆ اتىنداعى كىتاپحانا. وسىلايشا، الماتىداعى تاۋلىك بويى جۇمىس ىستەيتىن كىتاپحانالار سانى بەسەۋ بولدى.
الماتى قالاسىنىڭ 11-شاعىناۋدانىندا، التىنسارين داڭعىلى بويىنداعى №37 ۇيدە ورنالاسقان قازاقستان جازۋشىلارى كىتاپحاناسى 1962 جىلى اشىلعان جانە اۋەزوۆ اۋدانىنداعى جەتەكشى زياتكەرلىك ورتالىقتاردىڭ ءبىرى سانالادى. 2020 جىلى جۇرگىزىلگەن جاڭعىرتۋ جۇمىستارىنان كەيىن كىتاپحانا كەڭىستىگى زاماناۋي ءارى كەلۋشىلەرگە قولايلى فورماتتا قايتا جابدىقتالدى. كىتاپحانانىڭ جالپى اۋماعى 410 شارشى مەتر، كىتاپ قورى 40 مىڭنان اسادى، ال جىل سايىنعى كەلۋشىلەر سانى 145 مىڭ ادام. مۇندا ەرەكشە قاجەتتىلىكتەرى بار ازاماتتارعا ارنالعان ارنايى جۇمىس ورىندارى قاراستىرىلعان، ەلەكتروندى وقۋ زالى جۇمىس ىستەيدى، RFID راديوجيىلىكتى سايكەستەندىرۋ جۇيەسى ەنگىزىلگەن جانە «Almaty-library» كىتاپحانالىق-اقپاراتتىق جۇيەسى قولجەتىمدى.
الماتى كىتاپحانالارىنىڭ روزىباكييەۆ كوشەسى، 247 ءۇي، 7-بلوك مەكەنجايىندا ورنالاسقان فيليالى 2025 جىلدىڭ سوڭىندا اشىلدى. كىتاپحانا عيماراتىنىڭ جالپى اۋماعى 503 شارشى مەتر، قورىندا شامامەن 20 مىڭ كىتاپ بار. مۇندا جوعارى جىلدامدىقتاعى ينتەرنەت پەن Wi-Fi جەلىسىنە قوسىلعان كومپيۋتەرلەر ورناتىلعان، «Almaty-library» جۇيەسىنە قوسىلعان، سونداي-اق RFID قاقپالارى مەن وزىنە-وزى قىزمەت كورسەتۋ تەرمينالى بار.
كىتاپحانالاردىڭ تاۋلىك بويى جۇمىس ىستەۋ رەجيمىنە كوشۋى قالانىڭ تاعى ەكى اۋدان تۇرعىندارىنا كىتاپحانا قىزمەتىن وزدەرىنە ىڭعايلى ۋاقىتتا، سونىڭ ىشىندە كەشكى جانە تۇنگى مەزگىلدە پايدالانۋعا جول اشتى. بۇل ءوز كەزەگىندە ءبىلىم الۋ، ءوزىن-وزى دامىتۋ جانە مادەني دەمالىس ءۇشىن قوسىمشا جاعداي جاسايدى.
ايتا كەتەيىك، بۇگىندە الماتى قالاسىندا 30 قالالىق كىتاپحانا جۇمىس ىستەيدى. تاۋلىك بويى قىزمەت كورسەتۋ تاجىريبەسىن كەڭەيتۋ — كىتاپحانا جەلىسىن جاڭعىرتۋ مەن مەگاپوليستىڭ مادەني ورتاسىن دامىتۋعا باعىتتالعان كەشەندى باعدارلامانىڭ ءبىر بولىگى.