الماتى – ەلىمىزدىڭ جۇرەگى، ءار كۇنى قوزعالىسپەن باستالاتىن قالا.
قالادا تىركەلگەن جانە باسقا ايماقتاردان كەلەتىن ميلليوننان استام كولىك - كۇن سايىن تىعىز كولىك اعىنىنىڭ ءبىر بولىگىنە اينالادى، دەپ حابارلايدى aqshamnews.kz Polisia.kz-كە سىلتەمە جاساپ.
- "ءقاۋىپسىز جول" رەسپۋبليكالىق جەدەل-پروفيلاكتيكالىق ءىس-شاراسى اياسىندا الماتى قالاسىنىڭ پوليسەيلەرى جول-كولىك وقيعالارىن ازايتۋعا جانە جولدارداعى قۇقىق بۇزۋشىلىقتاردىڭ الدىن الۋعا باعىتتالعان اۋقىمدى جۇمىستاردى اتقارۋدا. بۇل ناۋقان مەملەكەت باسشىسى جاريالاعان "زاڭ جانە ءتارتىپ" قاعيداسىنا سايكەس جۇرگىزىلۋدە. جول قوزعالىسى ەرەجەلەرىن ساقتاۋ - ءوزىڭىزدىڭ، جولاۋشىلاردىڭ، جاياۋ جۇرگىنشىلەردىڭ، باسقا دا جۇرگىزۋشىلەردىڭ ومىرىنە دەگەن قۇرمەت. ءاربىر جىلدامدىقتى ارتتىرۋ، باعدارشامنىڭ قىزىل بەلگىسىنەن ءوتۋ، ابايسىزدا جاسالعان مانيەۆر قايعىلى وقيعاعا اينالۋى مۇمكىن ءقاۋىپ، - دەيدى الماتى قالالىق پد جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.
پوليسيا جولدا ساق بولۋعا، اسىقپاۋعا شاقىرادى.
- ءوتىنىش، اسىقپاڭىزدار، اراقاشىقتىقتى ساقتاڭىزدار، بىر-بىرلەرىڭىزدى سىيلاڭىزدار. ءبىزدىڭ قالا ەڭ ءقاۋىپسىز قالا بولسىن. بالالار جۇرگىزۋشىنىڭ توقتايتىنىن ءبىلىپ، سەنىمدى تۇردە جولدان ءوتسىن. ۇيدەن شىققان ءاربىر ادام قايتىپ كەلەتىنىنە سەنىمدى بولسىن. ەرەجەلەردى ساقتاڭىز! وزىڭىزگە جانە باسقالارعا قامقور بولىڭىز، - دەيدى پوليسيا قىزمەتكەرلەرى