ءماجىلىس دەپۋتاتى ەرمۇرات ءباپي كونستيتۋسيالىق رەفورمالارعا قاتىستى قوعامدا ايتىلىپ جۇرگەن سىني پىكىرلەرگە توقتالدى، - دەپ حابارلايدى aqshamnews.kz ءتىلشىسى.
ءماجىلىستىڭ وتىرىسىندا ءسوز سويلەگەن دەپۋتات ەرمۇرات ءباپي مۇنداي اۋقىمدى ساياسي وزگەرىستەر كەزىندە دەپۋتاتتاردىڭ ءۇنسىز قالۋى - ەرتەڭ سىنعا ۇرىندىراتىن جاۋاپسىزدىق بولاتىنىن ايتتى.
دەپۋتات ءوز سوزىندە قوعامدا كەيىنگى التى ايدا ۇسىنىلعان كونستيتۋسيالىق وزگەرىستەرگە بايلانىستى الەۋمەتتىك جەلىلەردە ايتىلىپ جۇرگەن سىندى اتاپ ءوتتى. ول سىن ايتۋ - دەموكراتيالىق قوعامنىڭ قۇندىلىعى ەكەنىن مويىنداي وتىرىپ، ءدال وسى مۇمكىندىكتىڭ ءوزى بۇرىنعى اۆتوريتارلى كەزەڭدە بولماعانىن ەسكە سالدى.
"نازاربايەۆ داۋىرىندە دەموكراتيالىق تىنىسى تۇنشىعىپ تۇرعان قوعام ءدال وسى قۇندىلىقتاردىڭ ارقاسىندا بۇگىن ەركىن پىكىر ايتىپ وتىر. مۇنى دا باعالاي ءبىلۋىمىز كەرەك"، - دەدى ەرمۇرات ءباپي.
دەپۋتات ۇلتتىق نامىستان تۋىنداعان تالاپتاردى جوققا شىعارۋعا بولمايتىنىن ايتتى. الايدا ءتىلدى ساياسي قاقتىعىستىڭ قۇرالىنا اينالدىرۋ ەلگە پايدا اكەلمەيتىنىن ەسكەرتتى.
ونىڭ پىكىرىنشە، گەوساياسي احۋال ۋشىعىپ تۇرعان قازىرگى كەزەڭدە قازاقستانعا سابىرلى ديپلوماتيا مەن بايىپتى ساياسات قاجەت. ەلدىڭ تاۋەلسىزدىگى مەن قاۋىپسىزدىگىن ساقتاۋ ءۇشىن ىشكى تۇراقتىلىق اسا ماڭىزدى.
ەرمۇرات ءباپي جاڭا كونستيتۋسيا جوباسىنىڭ باستى ماقساتى مەملەكەتتىڭ تۇتاستىعى مەن قاۋىپسىزدىگىن نىعايتۋ ەكەنىن اتاپ ءوتتى. ول سىرتقى ساياسي تاۋەكەلدەر كۇشەيىپ تۇرعان شاقتا قوعامدى دۇرلىكتىرۋ ءقاۋىپتى ەكەنىن جەتكىزدى.
"سىرتقى الەم تەڭسەلىپ تۇرعان كەزدە، ءبىز ءوز قولىمىزبەن ىشكى تۇراقتىلىعىمىزدى شايقاۋعا قاقىمىز جوق"، - دەدى دەپۋتات.
48-باپقا قاتىستى الاڭداۋشىلىققا جاۋاپ
سونداي-اق، دەپۋتات كونستيتۋسيا جوباسىنىڭ 48-بابىنا قاتىستى قوعامدا تۋىنداعان كۇماندەرگە توقتالدى. ونىڭ ايتۋىنشا، ەكس-پرەزيدەنتكە قاتىستى نورمالار بۇرىنعى پرەزيدەنتتىڭ وتباسى بيلىككە قايتا كەلەدى دەگەندى بىلدىرمەيدى. سەبەبى 2022 جىلعى 8 ماۋسىمدا قابىلدانعان كونستيتۋسيالىق زاڭدا پرەزيدەنتتىڭ وتباسى مۇشەلەرىنىڭ مەملەكەتتىك قىزمەت اتقارۋىنا تىيىم سالىنعان.
ءسوز اياعىندا ەرمۇرات ءباپي قازاقستاندىقتاردى بىرلىك پەن پاراساتقا شاقىردى. ونىڭ ايتۋىنشا، ەلدىڭ قاۋىپسىزدىگى مەن ەگەمەندىگى - ءاربىر ازاماتتىڭ ورتاق جاۋاپكەرشىلىگى.
"دانا حالىق ەكەنىمىزدى كورسەتۋ - بيلىكپەن سالاۋاتتى ءارى ساليقالى مامىلە جۇرگىزە الاتىن دەڭگەيگە جەتكەنىمىزدى دالەلدەۋ"، - دەپ تۇيىندەدى دەپۋتات.