فريلانستى بۇرىن باتىس فيلمدەرىنەن عانا كورىپ، ەستيتىن بولساق، وزىمىزدە دە ءقازىر قالىپتى جاعدايعا اينالدى. فريلانس – بۇل جاي عانا جۇمىس ءتۇرى ەمەس، بۇل ءومىر سالتى. فريلانس تۋرالى ارماندايتىن ادامدارعا ول تولىق ەركىندىك، جۇماق ءومىر سياقتى كورىنەدى، كۇنىنە 2 ساعات جۇمىس ىستەپ، اقشا وزىنەن-وزى كەلىپ جاتقانداي اسەر قالدىرادى. ءبىراق بۇل شىنىمەن سولاي ما؟
ءيا، فريلانستا قانشا ۋاقىت ارەكەت ەتۋدى، قاي جەردە قالاي جۇمىس ىستەۋدى، قانشا تابىس تابۋدى ءوزىڭ بەلگىلەۋگە ەركىندىك بارى راس. الايدا فريلانس كەز كەلگەنگە سايكەس كەلە بەرمەيدى. ونىڭ ارتىقشىلىقتارىمەن قاتار، ايقىن كەمشىلىكتەرى دە بار.
فريلانستىڭ ارتىقشىلىقتارى
جۇمىس ورنى مەن ۋاقىتتى تاڭداۋ ەركىندىگى
فريلانستىڭ ەڭ باستى ارتىقشىلىعى – تاڭمەن تالاسا تۇرىپ، ايالدامادا كولىك كۇتۋدىڭ، جول ءجۇرىپ شارشاپ، كەڭسەگە بارۋدىڭ كەرەگى جوق. بۇگىن قايدا جۇمىس ىستەيتىنىڭىزدى ءوزىڭىز تاڭدايسىز: ۇيدە، كافەدە، كوۆوركينگتە نەمەسە ءتىپتى باسقا ەلدە. قالاعان ۋاقىتتا وياناسىز، قالاعان كەزدە دەمالىس الاسىز. دەمالىس پەن ەڭبەك دەمالىسىن سۇراپ الۋدىڭ قاجەتى جوق، ونى دا ءوزىڭىز بەلگىلەيسىز. بۇل – شىنايى ەركىندىك.
جۇمىستان ءلاززات الۋ
فريلانس – بۇل جان قالاۋى. ەگەر ءوز ءىسىڭىزدى سۇيمەسەڭىز، فريلانستا ۇزاققا بارۋ قيىن. كەز كەلگەن فريلانسەردەن سۇراساڭىز، ول: «مەن جۇمىسىمدى جاقسى كورەمىن» دەمەيدى، «مەن ءوز ىسىممەن ءومىر سۇرەمىن» دەيدى.
تابىس كولەمى دە وزىڭىزگە بايلانىستى
فريلانستا جالاقىنى باستىق ەمەس، ءوزىڭىز بەلگىلەيسىز. جوبانىڭ باعاسىن دا، ءبىر ساعاتتىق ەڭبەگىڭىزدىڭ اقىسىن دا ءوزىڭىز قوياسىز. باستاپقىدا كوبىرەك جۇمىس ىستەۋگە تۋرا كەلەدى. ءبىراق تاجىريبە مەن كليەنتتەردىڭ جاقسى پىكىرلەرى كوبەيگەن سايىن، باعانى ءوسىرىپ، از جۇمىس ىستەپ، كوپ تابىس تابۋعا بولادى.
فريلانستا تابىستىڭ شەگى جوق، ونىڭ اۋقىمى ءسىزدىڭ كاسىبي دەڭگەيىڭىزگە، تاجىريبەڭىزگە جانە ءوزىڭىزدى دۇرىس ۇسىنا بىلۋىڭىزگە، ياعني جارنامالاۋىڭىزعا بايلانىستى.
جۇمىس ىستەۋگە كەدەرگى كەلتىرەتىن ارىپتەستەر جوق
كەڭسەدە ارىپتەستەردىڭ ارتىق اڭگىمەسى، كوڭىل بولەتىن جاعدايلار ءجيى كەزدەسەدى. ال فريلانستا ءسىز كىممەن ارالاساتىنىڭىزدى ءوزىڭىز شەشەسىز.
وتباسىڭىزدىڭ جانىندا بولا الاسىز
فريلانس سىزگە جۇبايىڭىزبەن، بالالارىڭىزبەن كوبىرەك ۋاقىت وتكىزۋگە مۇمكىندىك بەرەدى. كەيدە جاقىنىڭىزدىڭ جانىڭىزدا بولۋدىڭ ءوزى جەتكىلىكتى. وتباسىلى ادامداردىڭ كوبى وسى سەبەپتەن فريلانسقا اۋىسۋدى قالايدى.
ۇنەمى دامۋعا مۇمكىندىك بار
كەڭسەدە كەيبىرەۋلەر جىلدار بويى ءبىر ورىندا تۇرىپ قالادى. ال فريلانسەرلەر ۇنەمى دامۋعا ءماجبۇر. سەبەبى ۋاقىتىڭىز كوبىرەك، تابىسىڭىز تەك سىزگە بايلانىستى، ەڭ باستىسى – ءبىلىمىڭىز وسپەسە، تابىس تا كوبەيمەيدى. فريلانستا «ەشتەڭە ىستەمەي-اق اقشا الۋ» دەگەن جوق.
فريلانستىڭ كەمشىلىكتەرى
جۇمىس ىستەيتىن جەر ءاردايىم ىڭعايلى بولا بەرمەيدى
فريلانسەرلەر كوبىنە ۇيدە، كافەدە، كوۆوركينگتە جۇمىس ىستەيدى. كوۆوركينگ – ەڭ ىڭعايلى نۇسقا. ال ۇيدە وتباسى مۇشەلەرى، كورشىلەر نەمەسە تۇرمىستىق شارۋالار كەدەرگى كەلتىرۋى مۇمكىن. كافەدە – شۋ، اڭگىمە، ادامدار كەدەرگى بولادى. كەيدە پويىزدا، ۇشاقتا، جول ۇستىندە جۇمىس ىستەۋگە دە تۋرا كەلەدى. دەگەنمەن ۋاقىت وتە كەلە فريلانسەر كەز كەلگەن ورتاعا بەيىمدەلىپ ۇيرەنەدى.
تاپسىرىس بەرۋشىمەن تىكەلەي بايلانىس
كەڭسەدە كليەنتپەن كوبىنە مەنەدجەر سويلەسەدى. ال فريلانستا بۇل مىندەتتى ءوزىڭىز عانا اتقاراسىز. تابىستىڭ 90%-ى ادامدارمەن دۇرىس قارىم-قاتىناس ورناتۋعا بايلانىستى. كليەنتكە ۇناپ قالساڭىز، ول سىزبەن ۇزاق جۇمىس ىستەيدى جانە تانىستارىنا دا ءسىزدى ۇسىنادى.
ءاردايىم بايلانىستا بولۋ قاجەت
كليەنت دەمالىس كۇنى نەمەسە كەشكى ۋاقىتتا جازۋى مۇمكىن. ەگەر ءسىز جەدەل جاۋاپ بەرسەڭىز، كليەنتتى ۇستاپ قالا الاسىز. ارينە، جۇمىس ۋاقىتىڭىزدى الدىن الا بەلگىلەۋگە دە بولادى. ءبىراق كەيدە شۇعىل ماسەلە شىقسا، كليەنت ءسىزدى كۇتىپ وتىرماي، باسقا مامان ىزدەپ تابۋى مۇمكىن.
جۇرت ءسىزدى «جۇمىس ىستەمەيدى» دەپ ويلايدى
ۇيدە وتىرعان سوڭ، ولار ءسىزدى ءاردايىم بوس دەپ ەسەپتەيدى دە، تۋىس-تانىستار "ءبىر جەرگە اپارىپ تاستا، كومەكتەسە سال، ءبىر جەرگە بارايىق" دەپ مازالاۋى مۇمكىن. سوندىقتان تۋىس-تانىستارىڭىزعا ۇيدە دە جۇمىس ىستەيتىنىڭىزدى ءتۇسىندىرىپ ايتقان ءجون.
تابىستىڭ تۇراقسىزدىعى
ءبىر اي وتە تابىستى بولسا، كەلەسى اي تاپسىرىس بولماۋى مۇمكىن. كەيدە كليەنت تولەمدى كەشىكتىرەدى نەمەسە مۇلدە تولەمەۋى مۇمكىن. بۇل ماسەلەلەر فريلانستا ءاردايىم كەزدەسىپ تۇرادى. ءبىراق ءدال وسى تۇراقسىزدىق دامۋعا يتەرمەلەيدى.
اقىلى دەمالىس جوق
فريلانسەردى ەشكىم ەڭبەك دەمالىسىنا جىبەرمەيدى، جۇمىسقا جارامسىزدىق انىقتاماسىن بەرمەيدى، دەكرەتتىك تولەم تولەمەيدى. دەگەنمەن كەڭسە قىزمەتكەرىنەن كوبىرەك تابىس تاباتىن فريلانسەرلەرگە بۇل جاعداي كەدەرگى ەمەس.