«زاڭگەر» الاياقتاردىڭ سحەماسى قانداي؟
بۇل تۋرالى aqshamnews.kz Stopfake.kz-كە سىلتەمە جاساي وتىرىپ حابارلايدى.
سحەما قالاي جۇمىس ىستەيدى؟
بۇل الاياقتىق ءادىسى ەكى بولىكتەن تۇرادى.
ءبىرىنشىسى – الاياقتىقتىڭ ءوزى. سحەما ءارتۇرلى بولۋى مۇمكىن: «بانك قىزمەتكەرى»، «پوليسەي» قوڭىراۋ سوعادى نەمەسە «ءتيىمدى» ينۆەستيسيالار جانە ت.ب. ۇسىنىلادى.
ەكىنشىسى – «زاڭگەرلەر كومەگى». جابىرلەنۋشىمەن ونى توناپ كەتكەن الاياقتارعا قارسى سوت ءىسىن دايىنداپ جاتقان زاڭ فيرماسىنىڭ اتىنان بىرەۋلەر بايلانىسقا شىعادى. «زاڭگەرلەر» اقشانى قايتارۋعا كومەكتەسەتىندەرىن ايتادى. ولار بۇل ءىستى الداعى كۇندەرى سوتقا بەرەمىز، سوندىقتان، ۇجىمدىق تالاپ-ارىزعا قوسىلىپ، زاڭگەرلەر توبىنىڭ قىزمەتتەرى ءۇشىن ءدال ءقازىر تولەم جاساۋ كەرەك دەيدى.
شىن مانىندە نە بولادى؟
ءىس جۇزىندە بۇل «زاڭگەرلەر» – باياعى الاياقتار. ولار جابىرلەنۋشىنىڭ شاراسىز جاعدايىن پايدالانىپ، ودان تاعى دا اقشا الۋدى كوزدەيدى.
جالعان زاڭگەرلەردى قالاي تانۋعا بولادى
بىرنەشە بەلگىسى:
ولار ءسىزدى وزدەرى تاۋىپ الادى.
شىنايى زاڭگەرلەر ەشقاشان الاياقتىقتىڭ قۇرباندارىن وزدەرى ىزدەپ تاۋىپ، قىزمەتىن ۇسىنبايدى.
- جالعان زاڭگەرلەر تەك ولار عانا كومەكتەسە الادى دەپ سەندىرەدى.
ولار بۇل ىسپەن بۇرىننان اينالىسىپ جاتقانىن، اقشانى قالاي قايتارۋدى ناقتى بىلەتىنىن ايتىپ سەندىرەدى. باسقا زاڭگەرلەردىڭ كومەگى ءتيىمسىز بولادى دەپ قورقىتادى.
- اسىقتىرادى.
ءسىزدىڭ ءىسىڭىزدى ۇجىمدىق سوت ىسىنە قوسۋ ءۇشىن جەڭىلدىك جاساۋعا جانە پروسەستى ءبىر كۇنگە نەمەسە ءتىپتى بىرنەشە ساعاتقا كەشىكتىرۋگە دە دايىن بولادى. ءبىراق ول ءۇشىن مىندەتتى تۇردە تولەم جاساۋىڭىزدى سۇرايدى. مۇنداي قىسىم جاعدايىندا ادام ەموسياعا بەرىلىپ، الاياقتاردىڭ ايلاسىنا وڭاي ءتۇسىپ قالۋى مۇمكىن.
- زاڭگەرلەر تولەمدى بانك كارتاسىنا اۋدارۋدى سۇرايدى.
مۇنداي تولەم زاڭسىز. زاڭ اياسىندا جۇمىس ىستەيتىن زاڭگەر تولەم جاسايتىن شوت جىبەرەدى، تولەمدى POS-تەرمينال ارقىلى قابىلدايدى نەمەسە قولما-قول اقشامەن الادى، چەك بەرەدى.
ەگەر زاڭگەر جالداعىم كەلسە، الاياققا تاپ بولماۋ ءۇشىن نە ىستەۋ كەرەك؟
- قۇقىق قورعاۋشىنى ءوزىڭىز تاڭداڭىز. جەلىدەگى پىكىرلەردى وقىڭىز نەمەسە تانىستارىڭىزدان سەنىمدى ماماندى ۇسىنۋىن سۇراڭىز. ءوزى حابارلاسىپ، قىزمەتىن تىقپالاعان زاڭگەرلەرمەن جۇمىس ىستەمەڭىز.
- اقشا تولەمەس بۇرىن كەلىسىمشارتقا وتىرىڭىز. ەڭ دۇرىسى – زاڭگەردىڭ كەڭسەسىندە جەكە كەزدەسىپ، رەسمي تۇردە راسىمدەۋ.
- كارتادان كارتاعا اۋدارىم ارقىلى تولەم جاساماڭىز.
ەموسياعا ەرىك بەرمەي، سابىر ساقتاپ، بايىپپەن ارەكەت ەتسەڭىز – جالعان زاڭگەردى تانۋ قيىن ەمەس.
«Kaspi.kz الاياقتارعا قارسى» ناۋقانى اياسىندا وسىنداي جالعان زاڭگەرلەردىڭ جۇمىسى تۋرالى جاڭا روليك شىقتى. وندا الاياقتاردىڭ قالاي ارەكەت ەتەتىنى كورسەتىلگەن.