الماتى قالاسى، الماتى جانە جەتىسۋ وبلىستارى بويىنشا قاج دەپارتامەنتىنە قاراستى №12 جانە №14 مەكەمەلەرىندە تەرروريزم جانە زكسترەميزم ءۇشىن سوتتالعاندارعا تەرروريزم مەن ەكسترەميزمگە قارسى كۇرەس تۋرالى ءدارىس وتكىزىلدى، دەپ حابارلايدى aqshamnews.kz.
ءدارىستى ءىىم ش.قابىلبايەۆ اتىنداعى قوستاناي اكادەمياسى ەكسترەميستىك يدەولوگياعا قارسى ءىس-قيمىل بويىنشا قاج ماماندارىن دايارلاۋ ورتالىعىنىڭ باستىعى مىرزابەك تۋيعانوۆ وتكىزدى. ءدارىس بارىسىندا سپيكەر تەرروريزم مەن ەكسترەميزمنىڭ دۇنيەجۇزىندە ەڭ ءقاۋىپتى جانە وتكىر ماسەلەلەرىنىڭ بىرىنە اينالىپ وتىرعانىنا ناقتى مىسالدار كەلتىردى. سونىمەن قاتار ول ەلدىڭ تۇراقتىلىعى مەن ۇلتتىڭ قاۋىپسىزدىگىنە كەرى ىقپال ەتەتىن راديكالدى يدەولوگيانىڭ تارالۋىنا قارسى كۇرەسۋدىڭ ماڭىزدىلىعى جايلى كەڭىنەن اڭگىمەلەپ، ءدىن بوستاندىعى دەسترۋكتيۆتى، توتاليتارلىق سيپاتتاعى اعىمداردىڭ تارالۋىنا اكەلىپ سوققانىنا توقتالدى.
ءدارىس بارىسىندا ۇلتتىق سالت-داستۇرلەردىڭ قۇندىلىعى مەن قازاقستان رەسپۋبليكاسىنىڭ الەمدىك ساياساتتاعى ۇستانىپ وتىرعان وڭ باعىتتارى دا نازاردان تىس قالعان جوق. م.تۋيعانوۆ ءوز ءسوزىن تۇيىندەي كەلە، سوتتالعانداردى ءداستۇرلى ەمەس ءدىني باعىتتاردىڭ زيانىن تەرەڭ تۇسىنۋگە، ەلىمىزدە تۇراقتىلىق پەن بەيبىتشىلىكتى ساقتاۋعا ات سالىسۋعا شاقىردى.