الماتىدا ورنالاسقان لا-155/6 مەكەمەسى – ەلىمىزدەگى كامەلەتكە تولماعان قىلمىسكەرلەر جازاسىن وتەيتىن جالعىز وقشاۋلاۋ ورنى. قازىرگى ۋاقىتتا تۇزەۋ مەكەمەسىندە باس بوستاندىعىنان ايىرىلعان 59 ءجاسوسپىرىم وتىر.
بالالار كولونياسىندا ولار ءتورت قابىرعادا قامالىپ وتىرعان جوق، ارينە. مەكتەپتە وقيدى. كاسىپتىك ءبىلىم الادى. ءتۇرلى ادەبي-مادەني ءىس-شارالارعا قاتىسادى. ال مەكەمە ىشىندە جۇمىس ىستەپ تۇرعان كىتاپقا باي كىتاپحانانىڭ ورنى ءتىپتى ەرەكشە. جازاسىن وتەۋشىلەر بوس ۋاقىتىندا وسى جەردەن وزدەرىنە كەرەكتى اقپارات الادى، كوركەم شىعارمالار وقيدى. ال بۇل اياعىن جازا باسقان جەتكىنشەكتەر ءۇشىن اسا قاجەت ەكەنى ايتپاسا دا تۇسىنىكتى.
قازىرگى تاڭدا مەكەمە كىتاپحاناسىنىڭ قورىندا بارلىعى 3020 كىتاپ بار. ونىڭ 1200ء-ى قازاق تىلىندە، ال 1820-ى ورىسشا. مۇندا ادەبي كىتاپتار، فانتاستيكالىق، دەتەكتيۆ شىعارمالار، شەتەلدىك كلاسسيكا، پسيحولوگيالىق جانردا جازىلعان تۋىندىلار كوپ. سونداي-اق، كىتاپحانا سورەسىندە قازاقستان مۇسىلماندارى ءدىني باسقارماسى رۇقسات ەتكەن 55 ءدىني كىتاپ بار. وسى ورايدا ايتا كەتسەك، ق ر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ وكىلدەرى كىتاپحاناعا ادىستەمەلىك قولداۋ كورسەتۋ ماقساتىندا بىلتىر 43 كىتاپ سىيلاعان.
جۋىردا كولونيا كىتاپحاناسى تاعى دا جاڭا كىتاپتارمەن تولىقتى. كىتاپ بولعاندا قانداي! قر-نىڭ ادام قۇقىقتارى جونىندەگى ۋاكىلى ەلۆيرا ءازىموۆا جاسوسپىرىمدەرگە 5 ەلەكتروندى پلانشەت-كىتاپ تارتۋ ەتتى. سونداي-اق، شاھارداعى جامبىل اتىنداعى جاسوسپىرىمدەر كىتاپحاناسىنىڭ ماماندارى سورەگە 100 كىتاپ اكەپ قوستى. ال «كاراۆان» گازەتىنىڭ ۇجىمى 350 كىتاپ سىيلادى.
لا-155/6 مەكەمەسىندە باس بوستاندىعىنان ايىرىلعان بالالارمەن تاربيەلىك جۇمىستار جۇرگىزەتىن مامان ە.جەڭىسحاننىڭ ايتۋىنشا، جاسوسپىرىمدەر بوس ۋاقىتىندا كىتاپحاناعا، كىتاپ وقۋعا اسىعىپ تۇرادى ەكەن. بۇل جاقسى عوي. دەمەك، اياعىن جازا باسقان بالالاردىڭ تۇزەلۋىنە، ەرتەڭگە دەگەن سەنىمىن جوعالتپاۋىنا كەپىلدىك بار.