جاڭا ۇكىمەتتىڭ الدىندا ەلىمىزدىڭ ەكونوميكالىق الەۋەتىن تولىق قالپىنا كەلتىرۋ مىندەتى تۇر - پرەزيدەنت
وتكەن جىلى ەل ەكونوميكاسى 4 پايىزعا ءوستى. بۇل تۋرالى ۇكىمەتتىڭ كەڭەيتىلگەن وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وتكەن جىلى ەل ەكونوميكاسى 4 پايىزعا ءوستى. وڭدەۋ ونەركاسىبى 5،5، قۇرىلىس يندۋسترياسى 7،6 پايىزعا ارتتى. قىزمەت كورسەتۋ سالاسىندا وڭ ءۇردىس بار. ساۋدا-ساتتىق 9،2، كولىك سالاسى 3،6 پايىزعا ۇلعايدى. دەگەنمەن، ينفلياسيا دەڭگەيى مەجەدەن اسىپ كەتتى. بۇل كورسەتكىش 8،4 پايىز بولدى. وكىنىشكە قاراي، قاڭتار وقيعاسى قالىپتى ءومىرىمىزدى تۇبەگەيلى وزگەرتتى. زاڭسىز ارەكەتتەردىڭ سالدارىنان كوپتەگەن ازاماتىمىز زارداپ شەكتى. شاعىن جانە ورتا بيزنەس وكىلدەرى شىعىنعا ۇشىرادى»، - دەپ اتاپ ءوتتى مەملەكەت باسشىسى.
ق ر پرەزيدەنتى قازىرگى مالىمەتتەر بويىنشا بيزنەسكە 100 ملرد تەڭگەدەن استام كولەمدە زالال كەلگەنىن اتاپ ءوتتى.
«جاڭا ۇكىمەتتىڭ الدىندا ەلىمىزدىڭ ەكونوميكالىق الەۋەتىن تولىق قالپىنا كەلتىرۋ مىندەتى تۇر. بۇل وتە ماڭىزدى مىندەت. سوندىقتان ونى باسىمدىقتاردىڭ ءبىرى رەتىندە ساناۋىمىز قاجەت. جوسپارلانعان رەفورمالاردى جۇزەگە اسىرۋ جانە ينفلياسيانى تومەندەتۋ باستى مىندەتتەردىڭ ءبىرى. ەڭ باستىسى ازاماتتارىمىزدىڭ تابىسىن ارتتىرۋىمىز قاجەت»،- دەدى قاسىم-جومارت توقايەۆ.
قازىرگى ۋاقىتتا ق ر پرەمەر-مينيسترى ءاليحان سمايىلوۆ ەلىمىزدى دامىتۋ ءۇشىن اتقارىلعان شارالار مەن ۇكىمەتتىڭ الداعى جوسپارى تۋرالى بايانداپ جاتىر. ودان كەيىن ۇلتتىق بانك ءتوراعاسى عالىمجان ءپىرماتوۆ اقشا-نەسيە ساياساتى تۋرالى ايتادى. الماسادام ساتقالييەۆ «سامۇرىق-قازىنا» قورىنىڭ قىزمەتى جانە ونى رەفورمالاۋ تۋرالى باياندايدى. مۇنان بولەك، الماتى، جامبىل جانە باسقا دا وبلىستاردىڭ اكىمدەرى جانە الماتى قالاسىنىڭ اكىمى وڭىرلەردىڭ الەۋمەتتىك-ەكونوميكالىق دامۋ بارىسى جاعىنان ەسەپ بەرەدى.