قىركۇيەك ايىنىڭ سوڭعى كۇندەرىندە تەڭگە قۇنى قۇلدىرادى. ارينە، بۇل جۇرتشىلىقتى ءبىرشاما الاڭداتتى. ويتكەنى، ساۋدا جۇيەسىندەگى باعا بولجامى دا وسىعان تىكەلەي بايلانىستى.
ۇلتتىق بانكتىڭ ءتوراعاسى تيمۋر سۇلەيمەنوۆ جاھاندىق ينۆەستورلارمەن كەزدەسۋىندە سوڭعى ەكى اپتادا تەڭگەنىڭ كۇرت قۇلدىراۋ سەبەبىن ءتۇسىندىردى، دەپ حابارلايدى اlmaty-akshamy.kz بانكتىڭ باسپا ءسوز قىزمەتىنە سىلتەمە جاساپ.
«اقش دوللارىنىڭ جاھاندىق دەڭگەيدە كۇشەيۋى (دامىعان ەلدەردىڭ ۆاليۋتالار قورجىنىنا قاتىستى اقش دوللارىنىڭ يندەكسى قىركۇيەكتە 2،5%-عا ءوستى)، يمپورتتاۋشىلار تاراپىنان ماۋسىمدىق سۇرانىستىڭ ارتۋى، بازالىق مولشەرلەمەنى تومەندەتۋ بويىنشا قابىلدانعان شەشىم ۇكىمەتتىڭ كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى مىندەتتى تۇردە ساتۋ تۋرالى نورمانى قولدانۋىنىڭ توقتاتۋى. وسى فاكتورلاردىڭ جيىنتىعى تەڭگە باعامىنىڭ قىسقامەرزىمدى السىرەۋىنە اكەلدى. ماڭىزدى فاكتورلار تۇرعىسىنان الىپ قاراعاندا، مۇناي باعاسىنىڭ ءوسىمى مەن تولەم بالانسىنىڭ جالپى جاعدايى تۇراقتاندىرۋشى اسەرگە يە بولىپ، ۇزاق مەرزىمدە تەڭگەگە قولداۋ كورسەتەدى»، دەدى ول.
ينۆەستورلارمەن كەزدەسۋ بارىسىندا تيمۋر سۇلەيمەنوۆ قازىرگى ەكونوميكالىق جاعداي مەن جۇرگىزىلىپ جاتقان مونەتارلىق ساياساتتىڭ نەگىزگى باعىتتارى مەن الداعى سىن-تەگەۋرىندەرگە قاتىستى ماسەلەنى قوزعاعان.
«ۇلتتىق بانكتىڭ نەگىزگى مىندەتى – پروينفلياسيالىق قىسىمدى جۇمسارتۋ جانە ينفلياسيانى ورتامەرزىمدى ماقساتقا جاقىن 5% دەڭگەيىندە تۇراقتاندىرۋ. بارلىق كۇش-جىگەر وسى ماقساتقا جەتۋگە باعىتتالادى. الايدا، تەڭگەنىڭ ايىرباس باعامى ەركىن وزگەرمەلى قالپىندا قالا بەرەدى. سوندا عانا ەكونوميكا كەز كەلگەن وزگەرىستەرگە تەز بەيىمدەلەتىن بولادى»، دەدى ول.
بانك باسشىسى اقشا-كرەديت ساياساتىنىڭ ۇلتتىق بانكتىڭ بۇرىنعى ىس-ارەكەتتەرى مەن اقپاراتتىق ساياساتىنا سايكەس جۇرگىزىلەتىنىن مالىمدەدى. ەگەر، ناقتى ينفلياسيانىڭ باسەڭدەۋ ءۇردىسى قارقىندى بولسا، بازالىق مولشەرلەمەنى دە قالىپتى ءتۇسىرۋ جالعاساتىنىن، دەگەنمەن، فيسكالدى ىنتالاندىرۋداعى الەۋەتتى ۇلعايۋ تاۋەكەلدەرى جانە ەكونوميكاداعى تۇراقتى سۇرانىس جاعدايىندا ينفلياسيالىق كۇتۋلەردىڭ جوعارى دەڭگەيى ونىڭ تومەندەۋ كەڭىستىگىن شەكتەۋى مۇمكىن ەكەنىن دە ايتتى.
ال اقشا-كرەديت ساياساتى ادەتتەگىدەي اشىقتىققا، جۇيەلىلىككە، تۇسىنىكتى ءارى بولجامدى بولۋ قاعيداتتارىنا نەگىزدەلمەك. بانك باسشىسى رەتتەۋشىنىڭ ىقتيمال اۋىتقۋلارعا دەر كەزىندە دەن قويۋ ءۇشىن جىلدىق ينفلياسيانىڭ تارگەتكە كەلۋ تراەكتورياسىن قاداعالاپ وتىراتىنىن ايتتى.
ينۆەستورلارمەن بولعان ديالوگ كەزىندە ۇلتتىق بانك قىزمەتىنىڭ باسىم باعىتتارى رەتىندە باعا تۇراقتىلىعىن قامتاماسىز ەتۋدەن بولەك، مونەتارلىق جانە فيسكالدىق ساياساتتى ۇيلەستىرۋ، ىشكى قارجى نارىعىنىڭ تۇراقتى جۇمىس ىستەۋىن قامتاماسىز ەتۋ جانە ونى ودان ءارى قالىپتى دامىتۋ ىسىندە ۇكىمەتپەن ءتيىمدى جۇمىس جاسالاتىنى ايتىلدى.
ول سونداي-اق، ۇلتتىق بانكتىڭ اشىق تا ايقىن كوممۋنيكاسيالىق ساياساتتى جالعاستىرۋعا نيەتتى ەكەنىن جانە ونى ودان ءارى جەتىلدىرۋگە كۇش سالاتىنىن اتاپ ءوتتى.