سومالي ەلىنىڭ استاناسى موگاديشو قالاسىندا ەكى ءىرى جارىلىس بولدى. وقىس وقيعا قالا ورتالىعىندا، مەملەكەتتىك مەكەمەلەردىڭ جانىندا بولدى، دەپ حابارلايدى Almaty-akshamy.kz Inbusiness.kz-كە سىلتەمە جاساپ.
قازا تاپقاندار بار. ازىرگە ولاردىڭ ناقتى سانى بەلگىسىز، الايدا جەرگىلىكتى بيلىك كوشەدەگى جۇرگىنشىلەر مەن قوعامدىق كولىك جولاۋشىلارى وقىس وقيعا قۇربانى بولعانىن حابارلادى. بىرىنشىسىنەن ءبىراز ۋاقىت وتكەن سوڭ، قۇتقارۋشىلار قايعىلى وقيعا ورنىنا كەلگەن كەزدە ەكىنشى جارىلىس ەستىلگەن. بولجام بويىنشا، كولىكتەرگە جارىلعىش زات قويىلعان.
جارىلىس بولعان كۇنى سومالى ۇكىمەتى "اش-شاباب" ەكسترەميستىك توبىنىڭ سودىرلارىنا قارسى باعىتتالعان اۋقىمدى وپەراسيانى تالقىلاپ جاتقان كەزدە بولعان. بۇل تەررورلىق اكتىنى دە "اش-شاباب" ەكسترەميستىك توبى ۇيىمداستىردى دەگەن كۇدىك بار.
سومالي استاناسىندا، ءدال وسى قيىلىستا بەس جىل بۇرىن جۇك كولىگى جارىلىپ، 500-دەن استام ادامنىڭ ءومىرىن قيعان بولاتىن. ول كەزدە دە تەررورلىق شابۋىلدى "اش-شاباب" توبى ۇيىمداستىرعان بولاتىن.