تاجىكستان استاناسى دۋشانبە قالاسىندا مما بويىنشا ازيا چەمپيوناتى ءوتىپ جاتىر. بۇل تۋرالى Almaty-akshamy.kz Inform.kz-كە سىلتەمە جاساپ حابارلايدى.
ازيا بىرىنشىلىگىنە 18 ەلدەن 200 شاقتى سپورتشى جينالعان. قازاقستاننىڭ اتىنان ۇلتىق قۇرامانىڭ 37 سپورتشىسى قاتىسىپ جاتىر. فينالعا شىعۋ ءۇشىن 23 قازاقستاندىق ب ا ق سىناسا، ونىڭ 15ء-ى جەكپە-جەكتى جەڭىسپەن اياقتادى.
ءۇشىنشى كۇن قازاقستاندىق سپورتشىلار ءۇشىن جارقىن جەكپە-جەكتەرمەن جانە مەرزىمىنەن ەرتە جەڭىستەرمەن ەرەكشەلەندى. بىردەن ەكى قازاقستاندىق پانچەر – ەرۇلان قابدۋلوۆ پەن اليك دومنيچ ۇزدىك مارەلەردىڭ توپ بەستىگىنە ەندى.
جارىس كۇنىن قازاقستان قۇراماسى 47،6 كەلى سالماقتا تۇيمەگۇل ءجۇنىستىڭ جەڭىسىمەن اشتى. ول ءۇندىستاندىق سپورتشى حۋشبۋ نيشادتى ۇتىپ، جەڭىسكە جەتتى.
52،2 كەلى سالماقتا ەرۇلان قابدۋلوۆ ءۇندىستاننان كەلگەن شاباريش اياناردى ءۇشىنشى راۋندتا نوكاۋتقا ءتۇسىردى. دارحان يسماعۇلوۆ پەن رۋسلان ءابدىراحمانوۆ تاجىكستاندىق سپورتشىلار ۆوحيد شوحيدزودا مەن يسروفيل كوميلزودادان تورەشىلەرىنىڭ شەشىمىمەن جەڭىلىپ، قولا جۇلدەگەر اتاندى.
قىزدار اراسىندا ءدال وسى سالماقتا ماتيلدا باچۋرينا ءبىرىنشى راۋندتا تاجىكستاندىق ۆاتانسۋلتون شاكارشويەۆانى «گيلوتينا» قىلقىندىرۋ ادىسىمەن جەڭدى.
56،7 كەلى سالماقتا وڭعار سماعۇل موڭعوليالىق وتگونبااتار بولتبااتاردان «گيلوتيناعا» ءتۇسىپ، «قولا» يەگەرى اتاندى. ال، ەرسۇلتان شاكەنباي وزبەك مۇحاممەدسيدديك يۋلداشيەۆتى تورەشىلەر شەشىمىمەن جەڭدى.
قىزدار اراسىندا وسى سالماقتا يناس اشىربەك پەن ايگەرىم تورەحانوۆا سىنعا ءتۇستى. يناس باحرەين اتىنان شىققان برازيليالىق فابيولا سيلۆادان تەحنيكالىق نوكاۋتپەن ۇتىلىپ، قولا جۇلدەگەر اتاندى. ال، ايگەرىم تورەحانوۆا پاكىستاندىق ەمان حانمەن قيىن بەلدەسۋدە تورەشىلەردىڭ شەشىمىمەن جەڭىسكە جەتتى.
61،2 كەلى سالماقتاعى ادەل ماحامەتوۆا تاجىكستاندىق مانيجا سامادوۆانى ءبىرىنشى راۋندتا تەحنيكالىق نوكاۋتپەن جەڭدى.
بۇل سالماقتا ەرلەر اراسىندا سالاۋات قابي تاجىكستاندىق اكروم ۇزاقوۆتان تورەشىلەر شەشىمىمەن جەڭىلدى. شىڭعىس ىدىرىسوۆ تا ۇپاي سانى بويىنشا تاجىكستان جاستار قۇراماسىنىڭ ەڭ مىقتى سپورتشىسى وتابەك رادجابوۆتان جەڭىلدى. ەكى قازاقستاندىق تا قولا جۇلدەگە قول جەتكىزدى.
جاستار اراسىندا 65،8 كەلىگە دەيىنگى سالماقتا سامعات شابدان تاجىكستاندىق سۋحروبجون چاكالوۆتى تورەشىلەر شەشىمىمەن جەڭدى.
70،3 كەلى سالماقتا بەلگىباي ادىلبەك ءبىراۋىزدان ليۆاندىق بوكسشى توني بوۋ راچەدانى جەڭدى. نەيمات اسادوۆ تاجىكستاندىق ماسۋد ودينايەۆتان جەڭىلىپ، قولا جۇلدەگەر اتاندى.
قىزدار اراسىندا وسى ساناتتاعى جارتىلاي فينالدىق كەزدەسۋدە جانەركە جامالوۆا وزبەكستاندىق ۋگيلوي دجۋمانوۆاعا ەسە جىبەردى.
77،1 كەلىگە دەيىنگى جارتىلاي ورتا سالماقتا بەلدەسكەن دوسجان كەنجەبايەۆ تورەشىلەردىڭ ءبىراۋىزدان شەشىمىمەن وزبەكستاندىق بوكسشى مۋنيس مۋمينجونوۆتى جەڭدى. دانييل گۋبين وزبەك سپورتشىسى شاحريوربەك ماماتقۇلوۆتان ۇپاي سانى بويىنشا ۇتىلىپ، ءۇشىنشى ورىنعا يە بولدى.
83،9 كەلىگە دەيىنگى ورتا سالماقتا دەنيس چەرەپەنكو تاجىكستاندىق سپورتشى توحير ۆالييەۆتى «ءۇشبۇرىش» قىلقىندىرۋ ءادىسىن قولدانىپ، مەرزىمىنەن بۇرىن بەرىلۋگە ءماجبۇر ەتتى. ال، دياس وسەر سۇلەيدىڭ شەشىمىمەن تاجىكستاندىق دوۆيدجون زيويەۆتى جەڭدى.
93 كەلىگە دەيىنگى سالماقتا اليك دومنيچ تاجىكستاندىق ابدۋللو نازاروۆتى نوكاۋتقا ءتۇسىردى.
اسا اۋىر سالماقتاعى ءنۇرادىل قايىربەرگەن ۇلى قارسىلاسى وزبەكستاندىق شوحدجاحون تۇراقۇلوۆپەن تەڭ جەكپە-جەك وتكىزدى. تورەشىلەر ءبىرجاقتى شەشىم شىعارا الماي، قوسىمشا راۋند جاريالادى. ونىڭ قورىتىندىسى بويىنشا مينيمالدى باسىمدىقپەن جەڭىس تۇراقۇلوۆقا بەرىلدى.
120،2 كەلىدەن اسا سالماقتا راسۋل حاتايەۆ ءبىرىنشى راۋندتا تاجىكستاندىق ابدۋباشير بافويەۆتى «قولمەن ءۇشبۇرىش» قىلقىندىرۋ ادىسىمەن جەڭدى.