سولتۇستىك ارالعا جىل باسىنان شامامەن 2 ملرد تەكشە مەتر سۋ جىبەرىلدى
2024 جىلدىڭ باسىنان سولتۇستىك ارال تەڭىزىنە 1،9 ملرد تەكشە مەتر سۋ جىبەرىلدى. وسىلايشا، بۇگىندە سولتۇستىك ارالداعى جالپى سۋ كولەمى 22 ملرد تەكشە مەترگە جەتتى، دەپ حابارلايدى aqshamnews.kz.
بۇل تۋرالى حالىقارالىق ارالدى قۇتقارۋ قورى باسقارماسىنىڭ وتىرىسىندا سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ مالىمدەدى. ايتا كەتەيىك، وتىرىس تاجىكستان، تۇرىكمەنستان، وزبەكستان جانە قىرعىزستاننان كەلگەن دەلەگاسيالاردىڭ قاتىسۋىمەن ءوتتى.
«وزدەرىڭىز بىلەتىندەي، بۇگىنگى تاڭدا پرەزيدەنتىمىز حالىقارالىق ارالدى قۇتقارۋ قورىنىڭ باسشىسى بولىپ سايلاندى. قوردىڭ ءتوراعاسى رەتىندە ءبىزدىڭ ەلىمىزگە ۇلكەن جاۋاپكەرشىلىك جۇكتەلگەن جانە ءبىز ورتالىق ازيانىڭ باسقا مەملەكەتتەرىمەن تىعىز قارىم-قاتىناستا بولامىز. بىرلەسىپ ارال تەڭىزىن ساقتاۋ بويىنشا ەلەۋلى ناتيجەلەرگە قول جەتكىزدىك جانە وسى باعىتتاعى جۇمىستى ءارى قاراي جالعاستىرۋعا نيەتتىمىز. بيىل سولتۇستىك ارالعا تۇراقتى تۇردە سۋ كەلەدى. سۋارۋ كەزەڭىنىڭ ورتاسىندا سىرداريا وزەنى ارقىلى تەڭىزگە سەكۋندىنا 80 تەكشە مەترگە دەيىن سۋ جىبەرىلدى. سالىستىرمالى تۇردە، ءبىر جىل بۇرىن سەكۋندىنا 6 تەكشە مەتر عانا بارعان بولاتىن. سوڭعى جىلدارى سولتۇستىك ارالدا سۋ كولەمى تومەندەدى، ءبىراق 2024 جىلدىڭ باسىنان سۋ دەڭگەيى قايتا كوتەرىلە باستادى جانە بۇگىندە 22 ملرد تەكشە مەترگە جەتتى. سولتۇستىك ارالدا سۋ كولەمىنىڭ ودان ءارى ۇلعايۋىن قامتاماسىز ەتۋ ءۇشىن ءبىز سۋ ديپلوماتياسىن كۇشەيتىپ، سولتۇستىك ارال تەڭىزىن قالپىنا كەلتىرۋ جونىندەگى جوبانىڭ ەكىنشى كەزەڭىن ازىرلەپ جاتىرمىز»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
سونىمەن قاتار، قاتىسۋشىلار قازاقستاننىڭ 2024-2026 جىلدارى حاقق ءتوراعالىق ەتۋ كەزەڭىنە ارنالعان اتقارۋ كوميتەتىنىڭ جۇمىس جوسپارىن بەكىتتى. قۇجات قۇرىلتايشى مەملەكەتتەردىڭ باسشىلارى مەن حاقق پرەزيدەنتىنىڭ تاپسىرمالارىن ىسكە اسىرۋ، قوردىڭ ۇيىمدىق قۇرىلىمى مەن شارتتىق-قۇقىقتىق بازاسىن جەتىلدىرۋ جانە ت.ب. ماسەلەلەر بويىنشا 10 باعىتتان جانە 40-تان استام ءىس-شارادان تۇرادى.
ەستەرىڭىزگە سالا كەتەيىك، استانادا قازاقستاننىڭ توراعالىعىمەن حالىقارالىق ارالدى قۇتقارۋ قورى باسقارماسىنىڭ ءبىرىنشى وتىرىسى ءوتتى. جيىنعا ق ر پرەمەر-مينيسترى ولجاس بەكتەنوۆ، ق ر پرەمەر-مينيسترىنىڭ ورىنباسارى قانات بوزىمبايەۆ، حاقق اتقارۋ كوميتەتىنىڭ ءتوراعاسى اسحات ورازباي، تاجىكستان رەسپۋبليكاسى پرەمەر-مينيسترىنىڭ ورىنباسارى سۋلايمون ءزيوزودا، تۇرىكمەنستان مينيسترلەر كابينەتى ءتوراعاسىنىڭ ورىنباسارى تانگرىكۋلي اتاحاللىيەۆ، وزبەكستان رەسپۋبليكاسى پرەزيدەنتىنىڭ كەڭەسشىسى شۋحرات گانييەۆ قاتىستى.
ايتا كەتەيىك، سىرداريا وزەنى اعىنىنىڭ 75%–ى قىرعىزستاندا، 20%–ى وزبەكستاندا جانە 5%-ى قازاقستاندا قالىپتاسادى.