قولجازبالار جانە سيرەك كىتاپتار ۇلتتىق ورتالىعى «ارحيۆ 2025» باعدارلاماسى اياسىندا فرانسيادان تابىلعان قازاقستان تاريحىنا قاتىستى قۇندى قولجازبانىڭ كوشىرمەسىن جاريالادى.
فرانسيا ۇلتتىق كىتاپحاناسىندا ساقتالعان «تاڭدامالى شەجىرەلەر» تاريحي شىعارماسى حيجرانىڭ 816 جىلى / ياعني 1413 جىلى شيرازدا جازىلعان. ياعني، بۇل شىعارما XV عاسىرعا ءتان. پارسى تىلىندە اراب جازۋىمەن جازىلعان كىتاپ 15 تاقىرىپ بويىنشا 15 تاراۋدان تۇرادى. كىتاپ 413 بەتتى قۇرايدى. اتاپ ايتقاندا، كىتاپتا اق ورداعا تولىق سيپاتتاما بەرىلىپ، اق وردا حاندارىنىڭ بيلىگىنىڭ تولىق حرونولوگياسى قامتىلعان. سونداي-اق، اق وردا بيلەۋشىلەرىنىڭ ءاتى-جونى، اكەلەرى مەن شەشەلەرىنىڭ ءاتى-جونى جانە جەرلەنگەن جەرلەرى تۋرالى قۇندى كەستە بەرىلگەن.
كىتاپتا التىن وردانىڭ كوك جانە اق وردالارعا ىدىراۋ كەزەڭى سيپاتتالعان. سونىمەن قاتار، سىعاناقتا اق وردانىڭ 10 بيلەۋشىسى جەرلەنگەنى تۋرالى دا ايتىلادى.
مۋين اد دين ناتانزي XIV عاسىردىڭ ەكىنشى جارتىسىندا يسفاحان ماڭىنداعى ناتانز اۋىلىندا (يراندا) دۇنيەگە كەلگەن. داۆلاتشاح ءسامارقانديدىڭ «تازكيرات اش-شۋارو» («اقىنداردىڭ ءومىربايانى») شىعارماسىنا سايكەس، XV عاسىردىڭ باسىندا مۋين اد دين ناتانزي شيرازدا مىرزا يسكاندەر (ءامىر تەمىردىڭ نەمەرەسى) سارايىندا تۇردى جانە حايدار حورەزمي، حافيز حورەزمي جانە ت. ب. سياقتى اقىنداردىڭ زامانداسى بولعان.
ەستەرىڭىزگە سالا كەتەيىك، بيىل ەلىمىزدە جوشى ۇلىسىنىڭ 800 جىلدىعى اتاپ وتىلۋدە.