ۆەناداعى اتوم ەنەرگياسى حالىقارالىق اگەنتتىگى باس كونفەرەنسياسىنىڭ 68ء-شى سەسسياسى اياسىندا قازاقستان پاۆيلونى اشىلدى، دەپ حابارلايدى aqshamnews.kz.
سالتاناتتى شاراعا اگەنتتىكتىڭ باس ديرەكتورى رافاەل گروسسي قازاقستاننىڭ ۆەناداعى حالىقارالىق ۇيىمدار جانىنداعى تۇراقتى وكىلى، ەلىمىزدىڭ اۆسترياداعى ەلشىسى مۇحتار تىلەۋبەردى جانە ەنەرگەتيكا ءمينيسترى الماسادام ساتقالييەۆ قاتىستى.
كورمە بەيبىت اتوم ەنەرگەتيكاسىن دامىتۋعا، ەلىمىزدىڭ جاھاندىق يادرولىق قاۋىپسىزدىككە قوسقان ۇلەسىنە جانە ۋراننىڭ تۇراقتى جەتكىزىلىمىن قامتاماسىز ەتۋگە ارنالعان. قازاقستان پاۆيلونىنىڭ اشىلۋىندا «قازاتومونەركاسىپ» ۇلتتىق كومپانياسى يننوۆاسيالىق ونىمدەرىمەن تانىستىردى. ولار تابيعي ۋران كونسەنتراتتارىنىڭ بىرەگەي دەرەكقورىن قامتيدى.
ساراپشىلاردىڭ پىكىرىنشە، بۇل وسى ستراتەگيالىق رەسۋرستىڭ اينالىمى مەن قاۋىپسىزدىگىن باقىلاۋدى ارتتىرۋعا، سونداي-اق يادرولىق جانە راديواكتيۆتى ماتەريالداردىڭ زاڭسىز اينالىمىنا قارسى تۇرۋعا مۇمكىندىك بەرەدى. سونىمەن قاتار يادرولىق فيزيكا ينستيتۋتىندا ەلدەگى اتوم قاۋىپسىزدىگىن قامتاماسىز ەتۋ شارالارىن كۇشەيتەتىن يادرولىق سوت-ساراپتامالىق زەرتتەۋلەر زەرتحاناسى جۇمىس ىستەيدى.
- وسى كونفەرەنسيا بارىسىندا قازاقستاننىڭ يادرولىق قاۋىپسىزدىكتى قامتاماسىز ەتۋدەگى ەلەۋلى جەتىستىكتەرى جانە حالىقارالىق نارىقتارعا ۋراندى تۇراقتى جەتكىزۋدى قامتاماسىز ەتۋ تۇرعىسىنان جاھاندىق ەنەرگەتيكالىق قاۋىپسىزدىكتى قامتاماسىز ەتۋگە قوسقان ۇلەسىمىز اتاپ ءوتىلدى. جالپى ۋران كەن ورىندارىن يگەرۋدە بىرەگەي تاجىريبەسى بار، حالىقارالىق نارىققا ۋران ونىمدەرىن تۇراقتى جەتكىزۋشى بەدەلىنە يە قازاقستاننىڭ اتوم ونەركاسىبىن دامىتۋدا زور الەۋەتى بار دەپ ايتا الامىز، - دەدى ق ر ەنەرگەتيكا ءمينيسترى الماسادام ساتقالييەۆ.
قازاقستان پاۆيلونىن ارالاعان اتوم ەنەرگياسى جونىندەگى حالىقارالىق اگەنتتىكتىڭ باس ديرەكتورى رافاەل گروسسي ەلىمىزدىڭ اتوم ەنەرگەتيكاسىن دامىتۋدا شەشۋشى ءرول اتقاراتىنىن ايتتى. ول قازاقستاننىڭ وراسان زور رەسۋرستارى مەن يننوۆاسيالىق باستامالارى اگەنتتىكتىڭ جۇمىسىنا ەلەۋلى ۇلەس قوسىپ وتىرعانىن جەتكىزدى. سونداي-اق گروسسي قازاقستاننىڭ تومەن بايىتىلعان ۋران بانكىن ورنالاستىرۋداعى ورنىن ەرەكشە اتاپ ءوتتى.
- قازاقستاننىڭ بۇكىل الەمدىك يادرولىق قوعامداستىقتا اتقاراتىن ماڭىزدى ءرولىن اتاپ ءوتۋ – مەن ءۇشىن ۇلكەن مارتەبە. ءبىز ىنتىماقتاستىعىمىزدى، اسىرەسە تازا يادرولىق ەنەرگيانى دامىتۋ باعىتىنداعى قارىم-قاتىناسىمىزدى جوعارى باعالايمىز. اتوم ەنەرگياسى جونىندەگى حالىقارالىق اگەنتتىك وسى ماڭىزدى وتپەلى كەزەڭدە قازاقستاندى قولداۋعا دايىن، دەپ حابارلايدى اتوم ەنەرگياسى حالىقارالىق اگەنتتىگىنىڭ باس ديرەكتورى رافاەل گروسسي.
رافاەل گروسسي يادرولىق قوعامداستىقتى جانە قازاقستاندى كورمەدە ۇسىنىلعان جەتىستىكتەرىمەن قۇتتىقتاپ، ىنتىماقتاستىقتى ودان ءارى جالعاستىرۋعا دايىن ەكەنىن ءبىلدىردى.