«ALMATY AQSHAMY» – 35. ءبىزدىڭ تۇلەكتەر
ارداقتى اعامىز، ۇلاعاتتى ۇستازىمىز قالي سارسەنباي 2005 جىلدىڭ كوكتەمىندە «الماتى اقشامى» گازەتىنە جۇمىسقا شاقىردى. سولايشا، الىپ شاھاردىڭ باس باسىلىمىندا، قازاق جۋرناليستيكاسىنىڭ كوريفەيلەرىنىڭ ءبىرى قالاعاڭنىڭ قولاستىندا قىزمەت ەتۋ باقىتى بۇيىردى.
باس رەداكتور العاشقى كۇننەن قالانىڭ قىم-قۋىت تىرشىلىگىنە، قايناعان قازانىنا سالدى دا جىبەردى. «ۇيىقتامايتىن الماتى»، «الماتىنى كىمدەر باسقاردى؟»، «الماتىعا سىيماي كەتكەن اقىندار»، «شاھار شارۋاشىلىعى» سەكىلدى جوبالار اشىلىپ، الاشتىڭ اياۋلى مەكەنىنە قاتىستى تاقىرىپتىڭ، تاريحتىڭ بارلىعى قوزعالدى. جۇرت ساناسىنان ءوشىپ بارا جاتقان ۋاقيعالاردىڭ ءبارى گازەت بەتىندە ءنومىر سايىن جارىق كورىپ جاتتى.
قالي قوشقار ۇلى «اقشامداعى» شىعارماشىلىق ۇجىمدى اعا بۋىن مەن جاس جۋرناليستەردىڭ تەپە-تەڭدىگىن ساقتاي وتىرىپ جاس اقت ادى. وتەش قىرعىزباي، ءسارس ەنبەك بەكمۇرات ۇلى، ەرمەك جۇماحمەت ۇلى، انۋاربەك اۋەلبەك، نۇرجامال بايساقال، رايا ەسكەندىر سەكىلدى مايتالمان قالامگەرلەرمەن قاتار دۋمان اناش، وركەن جويامەرگەن، جاندوس ءبايدىلدا، ازامات قاسىم، ءاسيا باعداۋلەت قىزى، ايگەرىم ساۋىتبەكوۆا، مانشۇك بەكبوسىن سەكىلدى جاستار قىزمەت ەتتى. بۇگىندە قالاعاڭنىڭ قايراعىنان وتكەن سول ازاماتتار وتاندىق جۋرناليستيكانىڭ ماڭدايالدى ماماندارىنا اينالدى. بۇل دا باس رەداكتوردىڭ تۇلپاردى تايىنان تانيتىن قاسيەتى بولسا كەرەك.
ءبىر قىزىق جاعداي بولدى. باس رەداكتورعا ماقالامىزدى اپارامىز. باسىندا رەداكسيالاپ، كەم-كەتىگىن تۇزەپ، ولقى تۇسىن تولىقتىرىپ وتىراتىن. تاقىرىپ مىندەتتى تۇردە اۋىسادى. كەيىننەن ماقالانىڭ ءون بويىنا تيىسپەيتىن بولدى. ءبىراق تاقىرىپ وزگەرەدى. قانداي تاقىرىپ قويىپ اپارساق تا، قالاعاڭنىڭ تالعامىنا ساي كەلمەيدى. سودان كەزەكتى ءبىر ماتەريالدى تاقىرىپسىز اپاردىق.
– مىنانىڭ تاقىرىبى قايدا؟ – دەدى قالاعاڭ كوزاينەگىنىڭ ۇستىنەن قاراپ.
– تاقىرىپتى ءبارىبىر اۋىستىرىپ تاستايسىز عوي، – دەدىك ءبىز.
«بارا بەر» دەگەندەي يەگىمەن ەسىكتى نۇسقادى. شىعىپ كەتتىك. ارتىمىزدان ماقالامىز كەلدى. تاقىرىبى جايناپ تۇر. سودان قالي اعاعا ماقالانى تاقىرىپ قويماي اپاراتىن ادەت شىعاردىق. ەركەلىگىمىزدى باسىندا كوتەرىپ ءجۇردى. ءبىر كۇنى شىداماي كەتتى.
– ءاي، تاقىرىپسىز ماقالا شالا تۋعان بالا سياقتى. نەگە ءبىرتۇتاس دۇنيە اكەلمەيسىڭ؟ الدە، سەنىڭ ماقالاڭا تاقىرىپ قويعاننان باسقا جۇمىسى جوق دەپ ويلايسىڭ با؟ – دەيدى ۇستازىمىز كۇيىپ. ءبىز دە اشۋىن قالجىڭمەن تارقاتپاق بولدىق پا، الدە ويلانباي ايتا سالدىق پا، بىلمەيمىن، تابان استىندا:
– اعا، سول ءۇشىن ايلىق الىپ وتىرعان جوقسىز با؟ – دەپپىز.
– ءوي، كۇشىك، قۇرى، – دەدى دە، سوڭىنان قارقىلداپ كۇلكىگە باستى باستىعىمىز.
قاتتى اشۋلانباعانىنا قۋانىپ جايراڭ قاعىپ كەتىپ بارا جاتتىق. كەيىننەن وسى جاعدايدى قالاعاڭ ءبىرازعا دەيىن ايتىپ ءجۇردى. ءبىراق بار عوي، سودان سوڭ قويعان تاقىرىبىمىز باس رەداكتوردان اۋىسپاي شىعاتىن بولدى.
«الماتى اقشامىنان» 2008 جىلى «انا تىلىنە» اۋىستىق. ۇجىممەن قيماي قوشتاستىق. تىلشىلەردىڭ بولمەسىندە ءاسيا، مانشۇك، ايگەرىمنىڭ كوزىنە جاس كەلىپ، جىگىتتەر جاعى قىزداردى جۇباتىپ، «سوعىسقا كەتىپ بارا جاتقان جوقپىن عوي» دەپ ازىلدەپ، ازەر تارقاسقان ەدىك.
«اقشام» مەنىڭ ومىرىمدەگى ونەگەلى مەكتەپتىڭ ءبىرى. سونىسىمەن دە ءبىز ءۇشىن قىمبات، قاستەرلى. سۇيىكتى گازەتىمىزدىڭ جارىق كورگەنىنە 35 جىل تولىپ جاتىر ەكەن. قۇتتى بولسىن ايتامىز. وسىپ-وركەندەي بەرىڭىزدەر، ءقادىرلى ارىپتەستەر!