«ALMATY AQSHAMY» – 35. ءبىزدىڭ تۇلەكتەر
قۇرمەتتى «اقشام»! مەن ءقازىر ەلۋدىڭ بەسەۋىنە جاقىنداعان باسالقالى جاستامىن. ءومىر اعىنى اۋدارما سالاسىنىڭ يىرىمىنە باتىرىپ جىبەرسە دە، سەن ۇشتاپ بەرگەن قالامىم قولىمنان تۇسكەن جوق دەپ ايتا الامىن. ال سەن 35 جاسقا تولىپ جاتىر ەكەنسىڭ. ون جاسقا تولتىرعان كەزىمىزدە، شىركىن، باقىتجان جيەنعاليداي باسپا ءسوز مايتالمانى، ەرعالي ساعاتتاي قازاقتىڭ اقسۇيەك، سىرباز قالامگەرى كوشباسىمىز بولىپ كوشەلى ءسوز باستاپ، كوسەم ءسوز ساپتاپ، اۋىزدارىنا قاراتىپ، كوپشىلىكتى ۇيىتىپ، باعىندىرىپ وتىراتىن.
ەسەنالى ەرالى، قانات قايىم اعالارىمىز رەداكتور ورىنباسارلارى، جەكسەن الپارتەگى اعامىز «جاۋحاتشى» بولىپ، مەن ءتىلشىسى بولعان ادەبيەت جانە ونەر ءبولىمىنىڭ مەڭگەرۋشىسى ءانۋار تاراق اعامىزبەن، ساياسات ساردارىنداي بەيبىت جۇماجان اپامىز، حاتتاردى سويلەتىپ، وعان ءوزىنىڭ شەشەن شالقىماسىن قوساتىن نۇرجامال بايساقال، ەكونوميكا تامىرشىسى مۇرات مۇقاش، جەلتوقسان ارداگەرى قۇتتىبەك ايماحان، ءانشى سەرىمىز نۇربولات سۇلتانعازى – ءبارىمىز شەتىمىزدەن قالام كورىگىن قىزدىرىپ، باسىلىمنىڭ ءتول وقىرمانىن توپتاستىرۋ ماقساتىنا وي كۇشىن دە، بوي كۇشىن دە سارپ ەتكەن ەدىك. روزا قارايەۆا، جاناربەك ءاشىمجان، الىبەك شەگەباي سياقتى ۇيقاس ورنەگى ايشىقتى اقىنداردىڭ العاشقى سالماقتى مەكتەبى «اقشام» بولدى دەپ ايتۋىمىزعا بولادى. جەلتوقساننىڭ قاھارمان قىزدارىنىڭ ءبىرى شولپان ءجۇمادىلدىڭ دە قولتاڭباسى بار ەسكى پاراقتاردا...
ءومىردىڭ جوڭكىلگەن اعىنى مەنى مەديسينالىق اۋدارما جاعالاۋىنان ءبىر-اق شىعاردى. 2010 جىلدان قازاقستان رەسپۋبليكاسى دەنساۋلىق ساقتاۋ مينيسترلىگىنە قاراستى «دارىلىك زاتتار مەن مەديسينالىق بۇيىمداردى ساراپتاۋ ۇلتتىق ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنىڭ قاراماعىنداعى اۋدارما جانە تىلدەردى دامىتۋ باسقارماسىنىڭ اۋدارماشى مامانى قىزمەتىن اتقارىپ كەلە جاتىرمىن.
وسىناۋ ماعىنالى بەلەستەردىڭ ءومىربايانىمدا جازىلىپ قالعانىنا مىڭ دا ءبىر شۇكىرشىلىك ەتەمىن. بۇرىنعى مەرەيتويلىق باسىلىمداردا «باعىمدى اشقان، شامىمدى جاققان اقشامىم» دەگەن اتپەن ەستەلىك جاريالاعان ەدىم. ءقازىر دە سول ءسوزدى بار داۋسىممەن ماقتانىشپەن قايتالاپ ايتا بەرەر ەدىم. «اقشامىم»، العىس ساعان، قاستەرلى بوساعاڭا باس يەمىن!