«ALMATY AQSHAMY» – 35. ءبىزدىڭ تۇلەكتەر
وسىدان ون سەگىز جىل بۇرىن ۋنيۆەرسيتەتتى ءتامامداپ، ديپلومدى جۋرناليست رەتىندە جۇمىس ىزدەپ جۇرگەن شاعىمىز ەدى. ستۋدەنت كەزىمىزدە ستۋدەنتتەر قالاشىعىنىڭ جانىنداعى «سپورت» گازەتىندە ءبىر جارىم جىلداي، جاڭادان اشىلعان «ايقىن» گازەتىندە شتاتتان تىس، «ازامات.كز» گازەتىندە ءۇش اي جۇمىس ىستەپ ازداپ تاجىريبە جيناپ قالعانبىز. ەندى تۇراقتى جۇمىس تابۋ كەرەك بولدى. ويتكەنى، بۇرىنعىداي تەگىن جاتاقحانا جوق، پاتەردە تۇرۋ ءۇشىن قارجى كەرەك.
مىنە، وسىنداي جاس تۇلەك ءۇشىن سىن ساتتە ۋنيۆەرسيتەتتە وقىتۋشىمىز بولعان بەلگىلى ايتىسكەر، اقىن بەكجان اشىربايەۆ اعامىز «الماتى اقشامىنا» قاراي جول سىلتەدى. بەكجان اعامىز الدىن الا ايتىپ قويعان سوڭ بىردەن باس رەداكتوردىڭ ءبىرىنشى ورىنباسارى نۇرجان قۋانتايۇ ل ى ن ا ج و ل ى ع ى پ ، تاپسىرما الىپ شىقتىق. سول كەزدە باسپاسوزدە ساياسي تاقىرىپتار قىزۋ تالقىلاناتىن. ساياسي ساراپشى رەتىندە گازەت بەتتەرىنەن تۇسپەيتىن ساراپشىلار دا بىرەن-ساران ەدى. سول ازدىڭ ءبىرى، ساياساتتانۋشى ءازىمباي عالي اعامىزدىڭ ۇيىنە بارىپ، سۇحبات الدىم. دەرەۋ ورىندالعان تاپسىرما كوپ ۇزاماي گازەتتىڭ قالىڭ بولىپ شىعاتىن بەيسەنبىلىك سانىندا «استانا مەن الماتى قازاقىلانباي، قازاقستان قازاقىلانبايدى» دەگەن تاقىرىپپەن ايقارما بەتتى الىپ جارق ەتە قالدى. سول 2005 جىلى گازەت باسشىلىعىنا كەلگەن قالي سارسەنباي اعامىزدىڭ بۇيرىعى دا كوپ كۇتتىرمەي، بىردەن قالا گازەتىنىڭ ءتىلشىسى رەتىندە جۋرناليستىك قىزۋ ەڭبەككە ارالاسىپ كەتكەن ەدىك. مىنە، سودان جەتى جىلدان اسا ۋاقىت ەڭبەك ەتىپ بارىپ قوشتاسقان بۇل رەداكسيا ءبىزدىڭ «ايحاي، جيىرما بەسىمىز» وتكەن جالىندى جىلدارىمىزدىڭ جارقىن كۋاسى رەتىندە ءاردايىم جۇرەگىمىزدىڭ ءبىر بۇرىشىن جىلىتىپ تۇراتىنىمەن ىستىق.
«اقشامدا» جاستار ءبىرشاما جينالدىق. الدى فوتوتىلشىلەر جەڭىس ىسقاباي، سامات قۇسايىن، تىلشىلەر ەرجان بايتىلەستەن باستاپ، وركەن جويامەرگەن، ازامات قاسىم، ءاسيا باعداۋلەت قىزى، مانشۇك بەكبوسىن، ايگەرىم ساۋىتبەك، دينارا مالىكوۆا، جاندوس ءبايدىلدا، ەرمۇحامەت ماۋلەن، ەربول تۇرىمبەت، ايكەرىم رايىس قىزى جانە ت.ب. قىز-جىگىتتەر قالالىق گازەتتىڭ مازمۇندى دا وقىلىمدى شىعۋىنا ءبىر كىسىدەي اتسالىستىق، ءوزىمىز دە ىسىلدىق، تانىلدىق. ءقازىر باسىم بولىگى ءارتاراپتا جاۋاپتى قىزمەت ەتىپ ءجۇر. بىزگە اعالىق تانىتقان قالي قوشقارۇلىنان باستاپ، سارسەنبەك بەكمۇرات ۇلى، وتەش قىرعىزباي ۇلى، انۋاربەك اۋەلبەك، قۇتتىبەك ايماحان، ايناباي ءمادي، باقىت ويسا جانە اپايلارىمىز نۇرجامال بايساقال، رايا ەسكەندىر سەكىلدى عازيز جانداردىڭ تاربيەسىن كورگەنىمىزگە قۋانامىز.
«الماتى اقشامى» سول جىلدارى قالالىق گازەت بولسا دا رەسپۋبليكالىق كوپتەگەن باسىلىمداردان قىزعىلىقتى، وقىلىمدى شىققانى ەسىمدە. ءتىپتى، كوپتەگەن ايدارلار، جوبالار، تاقىرىپتاردىڭ اتاۋلارىنا دەيىن ءالى ەسىمدە. ماسەلەن، 2008 جىلى گازەتتىڭ جيىرما جىلدىعىنا وراي سەگىز قوسىمشا شىقتى. ءبىز «ءبىز...» دەگەن قوعامدىق-ساياسي قوسىمشاعا شىعارۋشى-رەداكتور بولدىق. سول كەزدە ماگيستراتۋرادا وقيتىن ازامات قاسىم «اۋلا» دەگەن قالانىڭ كوممۋنالدىق قىزمەتىنە قاتىستى قوسىمشا شىعاردى. سوندا عوي، بىرگە وقىعان دوسى، ءقۋتىلدى ايتىسكەر اقىن اسحات قىلىشبەك «ازاماتقا قالاماقى بولسىن» دەپ كوشەگە شەمىشكە شاعىپ، قوقىس تاستاپ جۇرەتىنى...
مىنە، وسى سىقىلدى قىزىقتى دا اڭعال جاستىعىمىزدىڭ كۋاسى بولعان ارۋ الماتىنىڭ باس گازەتى ءبىزدى جاس تۇلەكتەن تاس تۇلەككە دەيىن باپتاپ، ءار قياعا ۇشىردى. وسى باسىلىمدا بىرگە ىستەگەن ايگەرىم ەكەۋمىز شاڭىراق قۇردىق. تويىمىزعا بۇكىل رەداكسيا قاتىستى. «جاس وتاۋ» نەكە سارايىنداعى سالتاناتتى ءىس-شارا ەرەكشە ەستە قالاتىنداي ۇيىمداستىرىلدى. سول كەزدە قالالىق ءماسليحات دەپۋتاتى رەتىندە قالي اعامىز بۇل ىسكە ۇيىتقى بولدى. ناۋرىزداعى نەكە قيۋ راسىمىندە ەككەن قوس قايىڭىمىز اتالعان سارايدىڭ الدىندا سايالى اعاشقا اينالدى. «اقشامنان» تۇلەپ ۇشقان سول جاستار دا بۇگىندە ساياسى بار اعاشتاي ەلگە ەڭبەك ەتىپ كەلە جاتقان ازاماتتارعا اينالىپ كەلەدى.
«اقشامدا» ءقازىر جاڭا بۋىن ەڭبەك ەتىپ جاتىر. ولاردىڭ ەلىمىزدىڭ ەڭسەلى بولۋىنا ءسىڭىرىپ جاتقان ەرەن ەڭبەگىنە تابىس تىلەيمىز!