4 مىڭنان استام جاڭا تۇراقتى جۇمىس ورنى اشىلادى
سولتۇستىك قازاقستان وبلىسىنا جۇمىس ساپارى اياسىندا پرەمەر-مينيستر ءاليحان سمايىلوۆ ءوڭىردىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى.
وبلىس اكىمى قۇمار اقساقالوۆ، ۇلتتىق ەكونوميكا ءمينيسترى الىبەك قۋانتىروۆ، يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ، اۋىل شارۋاشىلىعى ءمينيسترى ەربول قاراشوكەيەۆ، ەنەرگەتيكا، قارجى، ءبىلىم جانە عىلىم، ەكولوگيا، گەولوگيا جانە تابيعي رەسۋرستار ۆيسە-مينيسترلەرى بايانداما جاسادى، دەپ حابارلايدى Almaty-akshamy. kz.
بايانداماشىلاردى تىڭداعان پرەمەر-مينيستر مەملەكەت باسشىسىنىڭ تاپسىرماسى بويىنشا وتكەن جىلدىڭ مامىر ايىندا سولتۇستىك قازاقستان وبلىسىنىڭ 2025 جىلعا دەيىنگى الەۋمەتتىك-ەكونوميكالىق دامۋىنىڭ كەشەندى جوسپارى قابىلدانعانىن، وعان 1،8 ترلن تەڭگە قاراستىرىلعانىن اتاپ ءوتتى. بۇل جوسپار ءبىرقاتار ماڭىزدى جوبالاردى ىسكە اسىرۋعا، سونىڭ ىشىندە جاڭا ونىمدەر شىعارۋعا، تۇراقتى جۇمىس ورىندارىن قۇرۋعا، جالپى وبلىس تۇرعىندارىنىڭ تۇرمىس ساپاسىن جاقسارتۋعا مۇمكىندىك بەرەدى.
ءوڭىر باسشىلىعىنىڭ الدىندا تۇرعان نەگىزگى مىندەتتەردىڭ ءبىرى – بەلگىلەنگەن جوبالاردى ۋاقىتىلى جانە ساپالى ىسكە اسىرۋ، سەبەبى ولار الەۋمەتتىك-ەكونوميكالىق دامۋعا قوسىمشا سەرپىن بەرۋى ءتيىس. وسى ماقساتقا جەتۋ ءۇشىن ۇكىمەت تاراپىنان بارلىق قاجەتتى قولداۋ كورسەتىلىپ جاتىر، — دەدى ءاليحان سمايىلوۆ.
ماسەلەن، 2022 جىلى سولتۇستىك قازاقستان وبلىسىن دامىتۋعا 108،6 ملرد تەڭگە سوماسىندا شىعىندار كوزدەلگەن. رەسپۋبليكالىق بيۋدجەتتى ناقتىلاۋ كەزىندە قوسىمشا 72،7 ملرد تەڭگە بولىنەدى.
ءبىرىنشى كەزەكتە بۇل شىعىندار ءوڭىردىڭ الەۋمەتتىك جانە ينجەنەرلىك ينفراقۇرىلىمىن دامىتۋعا جۇمسالۋى ءتيىس. وسى باعىتتا ساپالى ناتيجەلەرگە قول جەتكىزۋ ءۇشىن بولىنگەن قاراجاتتىڭ ءتيىمدى يگەرىلۋىن قامتاماسىز ەتۋ قاجەت، — دەدى پرەمەر-مينيستر.
كەڭەس بارىسىندا ءاليحان سمايىلوۆ باسقا دا ءبىرقاتار ماسەلەگە نازار اۋداردى.
الەمدەگى ازىق-تۇلىك تاۋارلارى باعاسىنىڭ كۇرت ءوسۋىن اتاپ وتكەن ۇكىمەت باسشىسى بارلىق مەملەكەتتىك ورگاندار مەن وڭىرلەردىڭ باسشىلىعىنىڭ مىندەتى ءتيىستى شارالاردى قابىلداپ، ىشكى نارىقتاعى باعانىڭ نەگىزسىز وسۋىنە جول بەرمەۋ ەكەنىن اتاپ ءوتتى.
«سولتۇستىك قازاقستان وبلىسىندا جىل باسىنان بەرى الەۋمەتتىك ماڭىزى بار ازىق-تۇلىك تاۋارلارىنىڭ باعاسى 12،6%-عا ءوستى. ازىق-تۇلىك تاپشىلىعى مەن باعا ءوسىمىن بولدىرماۋ ءۇشىن قولدا بار بارلىق تەتىكتەردى ءتيىمدى پايدالانعان ءجون. اكىمدىك باعا ۇستەمەسىن باقىلاۋدى كۇشەيتۋى كەرەك، ول 15%-دان اسپاۋى ءتيىس»، — دەدى پرەمەر-مينيستر.
ءاليحان سمايىلوۆ وڭتۇستىك وڭىرلەردەن جانە ورتالىق ازياداعى كورشى مەملەكەتتەردەن ەرتە پىسەتىن كوكونىستەردى اكەلۋ ءۇشىن تىكەلەي شارتتار جاساسۋ قاجەت ەكەنىن ايتتى.
سونىمەن قاتار ساۋدا جەلىلەرى ارقىلى «اينالىم سحەماسى» تەتىگىن كەڭىنەن پايدالانۋ قاجەت، ال فورۆاردتىق مەحانيزم ارقىلى اۋىل شارۋاشىلىعى ونىمدەرىن جەتكىزۋگە تىكەلەي كەلىسىمدەر جاساسۋ كەرەك.
سونداي-اق پرەمەر-مينيستر وبلىستا جالپى قۇنى 320 ملرد تەڭگە بولاتىن 37 ينۆەستيسيالىق جوبانىڭ پۋلى ىسكە اسىرىلىپ جاتقانىن اتاپ ءوتتى. سولاردىڭ ارقاسىندا 4 مىڭنان استام جاڭا تۇراقتى جۇمىس ورنى اشىلادى.
«بيىل 1 مىڭنان استام جاڭا جۇمىس ورنىن اشىپ، 36،2 ملرد تەڭگەگە 19 ينۆەستيسيالىق جوبانى جۇزەگە اسىرۋ جوسپارلانىپ وتىر. وبلىس اكىمدىگى بارلىق جوبالاردى جوسپارلانعان مەرزىمدە ساپالى ىسكە اسىرۋدى قامتاماسىز ەتۋى قاجەت»، — دەپ اتاپ ءوتتى ۇكىمەت باسشىسى.
ءاليحان سمايىلوۆ يندۋستريا جانە ينفراقۇرىلىمدىق دامۋ، قارجى جانە ۇلتتىق ەكونوميكا مينيسترلىكتەرىنە 2022 جىلعى شىلدە ايىنىڭ اياعىنا دەيىن رەسپۋبليكالىق ماڭىزى بار «پەتروپاۆل – قورعان» كۇرە جولىنىڭ ۋچاسكەسى بويىنشا جوبالاۋ-سمەتالىق قۇجاتتامانىڭ قۇنىن تۇزەتۋدى اياقتاۋدى؛ 2023 جىلدىڭ سوڭىنا دەيىن اتالعان ۋچاسكەنى رەكونسترۋكسيالاۋ جۇمىستارىن تولىق اياقتاۋدى؛ وسى جىلدىڭ سوڭىنا دەيىن نورماتيۆتىك جاعدايداعى جولداردىڭ جوعارى ۇلەسىن قامتاماسىز ەتۋدى تاپسىردى.
كەڭەستى قورىتىندىلاي كەلە، پرەمەر-مينيستر سولتۇستىك قازاقستان وبلىسى باسشىلىعىنىڭ الدىنا بارىنشا ءتيىمدى شەشۋدى قاجەت ەتەتىن اۋقىمدى جانە جاۋاپتى مىندەتتەر قويىلعانىن اتاپ ءوتتى.