ق ر پرەمەر-مينيسترى ءاليحان سمايىلوۆ 13 قاڭتاردا الماتى وبلىسىنا جۇمىس ساپارى اياسىندا بەرگەن تاپسىرمالارىنىڭ ورىندالۋ ماسەلەلەرى جونىندە كەڭەس وتكىزدى، دەپ حابارلايدى اlmaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
ورتالىق مەملەكەتتىك ورگاندار مەن اكىمدىك باسشىلارى الماتى اگلومەراسياسى، قونايەۆ قالاسى، G4 City ينتەگراسيالانعان قالاسىن جانە جالپى ءوڭىردى دامىتۋ جونىندەگى شارالار تۋرالى باياندادى.
تۇرعىن ءۇي، اكىمشىلىك جانە الەۋمەتتىك ماقساتتاعى وبەكتىلەردى سالۋ، اۆتوكولىك، تەمىرجول، ينجەنەرلىك جانە اگرارلىق ينفراقۇرىلىمدى جاڭعىرتۋ، جەردى اۋىل شارۋاشىلىعى اينالىمىنا تارتۋ، يندۋستريالىق ايماقتار مەن ونەركاسىپ وبەكتىلەرىنىڭ تيىمدىلىگىن ارتتىرۋ، جاڭا ينۆەستيسيالىق جوبالاردى ىسكە اسىرۋ تۋرالى اڭگىمە قوزعالدى.
اتاپ ايتقاندا، قونايەۆ قالاسىنداعى كارىز-تازارتۋ قۇرىلىستارىن رەكونسترۋكسيالاۋ ءمجا تەتىگى ارقىلى جۇرگىزىلەتىنى اتاپ ءوتىلدى. ماسەلەن، جەكە ارىپتەس انىقتالعاننان كەيىن كتق قۇرىلىسىنا جوبالىق-سمەتالىق قۇجاتتامانى ازىرلەۋ باستالادى.
سونىمەن قاتار كەڭەستە رەسپۋبليكالىق جانە حالىقارالىق دەڭگەيدە دە كوپتەگەن كورەرمەن تارتاتىن ءىرى مادەني-سپورتتىق ءىس-شارالاردى ۇيىمداستىرۋ جانە وتكىزۋ ماسەلەلەرى اڭگىمە وزەگىنە اينالدى. سولاردىڭ ءبىرى – MotoGP موتوسيكل جارىسى بويىنشا الەم چەمپيوناتى.
تالقىلاۋدى قورىتىندىلاي كەلە، ءاليحان سمايىلوۆ بارلىق قاتىسۋشى مەملەكەتتىك ورگاندار جاڭا وبلىس ورتالىعى – قونايەۆ قالاسىن، G4 City قالاسىن جانە بۇكىل ءوڭىردى دامىتۋ جونىندەگى تاپسىرمالاردى ورىنداۋعا جاۋاپكەرشىلىكپەن قاراۋ قاجەتتىگىن اتاپ ءوتتى.
«ءبىز بارلىق ماسەلەلەردى تالقىلادىق. مەملەكەتتىك ورگاندار قويىلعان مىندەتتەردى تيىسىنشە پىسىقتاۋى قاجەت. وبلىس تۇرعىندارى قونايەۆ پەن ءوڭىردىڭ قارقىندى دامۋىن كۇتىپ وتىر، سوندىقتان ءقازىر اكىمشىلىك راسىمدەردى كەشىكتىرمەي، قاجەتتى شەشىمدەر قابىلداۋ ماڭىزدى»، - دەدى پرەمەر-مينيستر.
ۇكىمەت باسشىسىنىڭ ايتۋىنشا، قابىلدانىپ جاتقان شارالار وبلىستىڭ دامۋىنا ەلەۋلى سەرپىن بەرۋى ءتيىس، بۇل ءوز كەزەگىندە ءوڭىر تۇرعىندارىنىڭ ءومىر ءسۇرۋ ساپاسى مەن ءال-اۋقاتىن ارتتىرۋعا مۇمكىندىك بەرەدى.