الماتىلىق وقۋشىلار حالىقارالىق بايقاۋدا جەڭىسكە جەتتى

الماتىلىق وقۋشىلار ماتەماتيكا جانە مەحانيكا بويىنشا حالىقارالىق بايقاۋدا جەڭىسكە جەتتى.

 الماتى قۇراما كومانداسى ءو.جولداسبەكوۆ اتىنداعى ماتەماتيكا جانە مەحانيكا بويىنشا XII حالىقارالىق عىلىمي جوبالار بايقاۋىندا 4 التىن، 2 كۇمىس جانە 4 قولا مەدال جەڭىپ الدى. بايقاۋعا تاجىكستان، قىرعىزستان جانە قازاقستاننان 150-دەن استام وقۋشى قاتىسقان، دەپ حابارلايدى اlmaty-akshamy.kz 

جارىس الماتىدا 1-3 ناۋرىز ارالىعىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ مەحانيكا-ماتەماتيكا فاكۋلتەتىنىڭ بازاسىندا ءوتتى.

بايقاۋعا قاتىسۋشىلار ماتەماتيكا، قولدانبالى ماتەماتيكا، مەحانيكا جانە ەكونوميكاداعى ماتەماتيكالىق ادىستەر سىندى بىرنەشە سەكسيا بويىنشا عىلىمي جوبا قورعادى. سايىس بارىسىندا وقۋشىلار جوباسىن تانىستىرىپ، ەرەكشەلىگىن ايتتى.

«مەكتەپ وقۋشىلارىنىڭ جەڭىسىنە ءاردايىم قۋانامىز. بۇگىن ولار تاعى دا جۇلدەلى ورىندارعا يە بولدى. ولاردى جەڭىستەرىمەن قۇتتىقتايمىز! ءبىلىم الۋعا دەگەن ىنتا ەشقاشان سونبەسىن. حالىقارالىق بايقاۋ جىل سايىن عىلىمي-زەرتتەۋگە قىزىعۋشىلىق تانىتقان دارىندى وقۋشىلاردى انىقتاۋ ءۇشىن وتكىزىلەدى. وسىلايشا، ناقتى عىلىمدى زەرتتەۋگە ىنتالاندىرامىز»، – دەدى الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا.

№159 گيمنازيانىڭ وقۋشىلارى اباي باعجان مەن جوكەن ديار، سونىمەن قاتار، № 178 مامانداندىرىلعان ليسەيدىڭ وقۋشىلارى مۇقاش ەرمۇحان مەن اۋباكىر ىڭكار جەڭىمپاز اتاندى.

ال № 178 مامانداندىرىلعان ليسەيدىڭ ەكى وقۋشىسى – جالعاسبەك ادال جانە اياجان ماراتوۆا كۇمىس جۇلدەگەر اتاندى.

ءۇشىنشى ورىندى №159 گيمنازيانىڭ وقۋشىلارى ەراسىل ەسەنگەلدين، نۇرالى ورالبەكوۆ، جانبوتا داۋلەنحان جانە №39 مامانداندىرىلعان ليسەيدىڭ وقۋشىسى ولجاس مايسى ۇلى يەلەندى. №83 گيمنازيانىڭ وقۋشىسى اياۋلىم شاياحمەت قاتىسقانى ءۇشىن گراموتا الدى.

ايتا كەتەيىك، بىلتىر 70-كە جۋىق الماتىلىق وقۋشى حالىقارالىق بايقاۋلارعا قاتىسىپ، 43 وقۋشى جۇلدەلى ورىندار العان.