351 جىلجىمايتىن مۇلىك نىسانى زارداپ شەكتى
پرەمەر-مينيستر ءاليحان سمايىلوۆ ۇكىمەتتىڭ سيفرلىق كەڭسەسىندە ورتالىق مەملەكەتتىك ورگانداردىڭ باسشىلارىنىڭ جانە وڭىرلەر اكىمدەرىنىڭ قاتىسۋىمەن پرەزيدەنت قاسىم-جومارت كەمەل ۇلى توقايەۆتىڭ وسى جىلدىڭ باسىنان بەرى بەرگەن تاپسىرمالارىن ىسكە اسىرۋ جونىندە كەڭەس وتكىزدى، دەپ حابارلايدى Almaty-akshamy.kz پرەمەر-مينيستردىڭ باسپا ءسوز قىزمەتىنە سىلتەمە جاساپ.
ەلدە ورىن العان تارتىپسىزدىكتەر كەزىندە 351 جىلجىمايتىن مۇلىك نىسانى زارداپ شەكتى، ولاردى جوندەۋ-قالپىنا كەلتىرۋ جۇمىستارىن جۇرگىزۋ قاجەت. ونىڭ ىشىندە 8 وڭىردەگى 45 مەملەكەتتىك ورگان عيماراتى جانە 306 كوممەرسيالىق نىسان بار. ولار الماتى، شىمكەنت قالالارىندا، الماتى، جامبىل، قىزىلوردا، اتىراۋ، اقتوبە جانە شىعىس قازاقستان وبلىستارىندا.
بيزنەسكە الدىن الا كەلتىرىلگەن شىعىن مولشەرى 98،1 ملرد تەڭگەنى قۇرايدى، ونىڭ 97%-ى الماتى قالاسىنا تيەسىلى.
ءا. سمايىلوۆ يندۋستريا جانە ينفراقۇرىلىمدىق دامۋ مينيسترلىگىنە وڭىرلەردىڭ اكىمدىكتەرىمەن بىرلەسىپ، بەلگىلەنگەن مەرزىمدە بۇلىنگەن عيماراتتاردى تەحنيكالىق-ساراپتامالىق تەكسەرۋدەن وتكىزۋ جانە جوندەۋ قۇنىن باعالاۋ جۇمىستارىن اياقتاپ، قاجەتتى قۇجاتتامانى قارجى مينيسترلىگىنە ەنگىزۋدى تاپسىردى.
تارتىپسىزدىكتەردەن كەلتىرىلگەن زالالدى باعالاۋ جونىندەگى ۇكىمەتتىك كوميسسياعا جەرگىلىكتى اتقارۋشى ورگاندارمەن بىرلەسىپ، زالالدى باعالاۋدى جەدەل اياقتاۋ جانە زارداپ شەككەن بيزنەس سۋبەكتىلەرىنىڭ ءتىزىمى مەن ولارعا كەلتىرىلگەن زالال كولەمىن ۇلتتىق ەكونوميكا مينيسترلىگىنە جىبەرۋ تاپسىرىلدى.
«ۇكىمەت اپتا سايىن زارداپ شەككەن كاسىپكەرلەرگە جەدەل كومەك كورسەتۋ ءۇشىن قاراجات ءبولۋ بويىنشا قاجەتتى شارالاردى جۇرگىزۋگە دايىن»، — دەدى ءا. سمايىلوۆ.
ۇكىمەت باسشىسى كومىر باعاسىنىڭ وسۋىنە جول بەرمەۋدىڭ ماڭىزدىلىعىن اتاپ ءوتىپ، بۇل ماسەلەنى كومىر ءوندىرۋشى كومپانيالارمەن پىسىقتاۋدى، سونداي-اق كومىر تاسىمالداۋ تاريفتەرىنىڭ نەگىزسىز وسۋىنە جول بەرمەۋ ءۇشىن تالداۋ جۇرگىزۋدى تاپسىردى.
«كەيبىر كومپانيالاردىڭ كىرمە جولدار مەن تۇيىق جولدارداعى قىزمەت كورسەتۋ ءتاريفى جوعارى، ولاردى قايتا قاراستىرۋ قاجەت»، — دەدى ءا. سمايىلوۆ.