ەلدەگى جاپپاي ەرەۋىل كەزىندە 8 قالادا عيماراتتار تالقاندالدى

جالپى شىعىن كولەمى - 28،8 ملرد تەڭگە

ونىڭ ىشىندە مەملەكەتتىك ورگانداردىڭ 45 عيماراتى جانە 306 كوممەرسيالىق نىسان بار. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى مالىمەت تاراتتى، دەپ حابارلايدى Almaty-akshamy.kz.

ۆەدومستۆو عيماراتتار 8 وڭىردە: الماتى جانە شىمكەنت قالالارىندا، الماتى، جامبىل، قىزىلوردا، اتىراۋ، اقتوبە جانە شىعىس قازاقستان وبلىستارىندا زارداپ شەككەنىن اتاپ كورسەتتى.

اكىمدىكتەردىڭ الدىن الا باعالاۋىنشا، زارداپ شەككەن عيماراتتاردى جوندەۋگە جانە قالپىنا كەلتىرۋگە جۇمسالاتىن جالپى شىعىن كولەمى - 28،8 ملرد تەڭگە.
ونىڭ ىشىندە ق ر پرەزيدەنتىنىڭ ءىس باسقارماسى قالپىنا كەلتىرەتىن ق ر پرەزيدەنتىنىڭ الماتىداعى رەزيدەنسياسىن ەسەپكە الماعاندا، مەملەكەتتىك ورگانداردىڭ عيماراتتارى بويىنشا زالال سوماسى - 28،7 ملرد تەڭگە.

جالپى كەلگەن زالال كولەمى ءالى دە ناقتىلانۋدا.

ول الماتى قالاسىنداعى بارلىق جىلجىمايتىن مۇلىك وبەكتىلەرىن تولىق زەرتتەپ، باعالاعاننان كەيىن تۇپكىلىكتى انىقتالادى.
مينيستر كوممەرسيالىق نىساندارعا قاتىستى جالپى سوماسى 109،2 ملن تەڭگە بولاتىن جوندەۋ قاجەت ەكەنىن ايتتى.

بۇل ساناتتاعى زالال نەگىزىنەن تاۋارلاردىڭ ءبۇلىنۋى مەن جوعالۋىنا بايلانىستى.
مەملەكەت باسشىسىنىڭ تاپسىرماسىمەن قۇرىلعان كوميسسيانىڭ باعالاۋىنشا، جالپى ەل بويىنشا كەلگەن شىعىن عيماراتتاردى جوندەۋگە كەتكەن شىعىنمەن قوسا مۇلىكتىڭ ءبۇلىنۋىن دە ەسەپكە العاندا 136،8 ملرد تەڭگەنى قۇرادى.