ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ق ر ەڭبەكمينىنىڭ 2023 جىلعى جۇمىسىن قورىتىندىلادى جانە بارلىق ازاماتتارعا دەنساۋلىق، اماندىق پەن باقىت تىلەي وتىرىپ، قازاقستاندىقتاردى كەلە جاتقان 2024 جىلمەن قۇتتىقتادى، دەپ حابارلايدى Almaty-akshamy.kz.
«قۇرمەتتى قازاقستاندىقتار! وتكەن 2023 جىل مەملەكەت باسشىسى قويعان تاپسىرمالار مەن جانە الەۋمەتتىك قولداۋدى كۇشەيتۋگە، قازاقستاندىقتاردىڭ ءومىر ءسۇرۋ ساپاسى مەن ءال-اۋقاتىن ارتتىرۋعا باعىتتالعان مىندەتتەردى ىسكە اسىرۋدا ءبىزدىڭ مينيسترلىك ءۇشىن وتە جاۋاپتى جىل بولدى.
مينيسترلىكتىڭ باستى جەتىستىگى 2023 جىلعى 1 شىلدەدەن باستاپ كۇشىنە ەنگەن الەۋمەتتىك كودەكستىڭ قابىلدانۋى بولىپ تابىلادى. بۇل تمد اۋماعىنداعى الەۋمەتتىك قامسىزداندىرۋ سالاسىنداعى زاڭنامانى شوعىرلاندىرعان جانە ازاماتتاردىڭ تۋعاننان باستاپ ەگدە جاسقا دەيىنگى قۇقىقتارىنا كەپىلدىك بەرەتىن العاشقى قۇجات. الەۋمەتتىك كودەكس جاڭا الەۋمەتتىك ساياساتتى ىسكە اسىرۋ قۇرالى بولىپ تابىلادى جانە كەلەسىلەردى كوزدەيدى: وتباسىنىڭ سيفرلىق كارتاسىن ەنگىزۋ؛ اتاۋلى الەۋمەتتىك قولداۋدى كۇشەيتۋ؛ الەۋمەتتىك قىزمەت كورسەتۋ جۇيەسىن ترانسفوماسيالاۋ، مۇگەدەكتىگى بار ادامدار ءۇشىن ارناۋلى الەۋمەتتىك قىزمەتتەردىڭ قولجەتىمدىلىگىن ارتتىرۋ؛ ازاماتتاردى الەۋمەتتىك ساقتاندىرۋ جانە زەينەتاقىمەن قامسىزداندىرۋ جۇيەسىنىڭ تيىمدىلىگىن ارتتىرۋ؛ حالىقتى جۇمىسپەن قامتۋدى قامتاماسىز ەتۋ سالاسىنا جاڭا تاسىلدەر.
مەملەكەت باسشىسىنىڭ تاپسىرمالارى مەن الەۋمەتتىك كودەكستى ىسكە اسىرۋ شەڭبەرىندە 1 شىلدەدەن باستاپ ءبىرقاتار جاردەماقىلار قوسىمشا 14،5 %-عا ارتتى. ولاردىڭ ىشىندە مۇگەدەكتىگى بويىنشا جاردەماقىلار؛ اسىراۋشىسىنان ايىرىلۋ جاعدايى بويىنشا؛ I توپتاعى مۇگەدەكتىگى بار ادامعا كۇتىم جاسايتىن ادامدارعا جانە باسقالارعا. سونداي-اق، مەملەكەتتىك الەۋمەتتىك ساقتاندىرۋ قورىنان تولەنەتىن ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ جاعدايلارى بويىنشا الەۋمەتتىك تولەمدەردىڭ مولشەرى 14،5 %-عا ارتتىرىلدى. جىل باسىندا جاردەماقىلار مەن الەۋمەتتىك تولەمدەر مولشەرىنىڭ 8،5 %-عا ۇلعايۋىن ەسكەرە وتىرىپ، ولاردىڭ مولشەرى جىلدىق ماندە 23 %-عا ءوستى.
مەملەكەت باسشىسىنىڭ تاپسىرمالارىن جانە الەۋمەتتىك كودەكستى جۇزەگە اسىرۋ اياسىندا بيىل حالىقتىڭ ءارتۇرلى ساناتتارىن، اسىرەسە بالالى وتباسىلار مەن مۇگەدەكتىگى بار ادامداردى الەۋمەتتىك قولداۋ شارالارى ايتارلىقتاي كۇشەيتىلگەنىن اتاپ ءوتۋ قاجەت. ارناۋلى الەۋمەتتىك قىزمەتتەر كورسەتۋ جۇيەسىن ترانسفورماسيالاۋ جانە حالىقتى جۇمىسپەن قامتۋدىڭ جاڭا تاسىلدەرىن ىسكە اسىرۋ بويىنشا جۇمىس باستالدى.
سونداي-اق، مەملەكەت باسشىسىنىڭ تاپسىرماسى بويىنشا وسى جىلى وتباسىنىڭ سيفرلىق كارتاسى ەنگىزىلدى، ونىڭ باستى ماقساتى – قازاقستاندىقتاردىڭ مەملەكەتتىك قولداۋ جۇيەسىنە تەڭ قولجەتىمدىلىگىن قامتاماسىز ەتۋ. وتباسىنىڭ سيفرلىق كارتاسى الەۋمەتتىك ساياساتتىڭ ورتا مەرزىمدى جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى، سونداي-اق ازاماتتاردىڭ الەۋمەتتىك مارتەبەسىنە بايلانىستى كەپىلدى مەملەكەتتىك قولداۋدىڭ قانداي دا ءبىر ءتۇرىن الۋعا قۇقىلى ەكەندىگىن جەتكىزىپ وتىراتىن «ەلەكتروندى جارشى» قىزمەتىن اتقارادى. وتباسىنىڭ سيفرلىق كارتاسىن ەنگىزۋدىڭ ارقاسىندا وسى جىلدىڭ 1 قاڭتارىنان باستاپ مەملەكەتتىك قىزمەتتەردى پرواكتيۆتى كورسەتۋ ءۇشىن 795 مىڭنان استام ادام SMS الدى. بۇل رەتتە 313 مىڭنان استام ادام جاردەماقى نەمەسە تولەمدى ءوتىنىشسىز الۋ مۇمكىندىگىن پايدالاندى.
قازاقستاندىقتاردى زەينەتاقىمەن قامسىزداندىرۋدى جاقسارتۋ ماقساتىندا مەملەكەت باسشىسىنىڭ تاپسىرماسى بويىنشا 2023 جىلى ەڭ تومەنگى بازالىق زەينەتاقى مولشەرى ەڭ تومەن كۇنكورىس دەڭگەيىنىڭ 54 %-دان 60 %-عا دەيىن ۇلعايتىلدى، ال ىنتىماقتى زەينەتاقىنى ەسەپتەۋ ءۇشىن قابىلداناتىن ەڭ جوعارى تابىس مولشەرى 46-دان 55 ايلىق ەسەپتىك كورسەتكىشكە دەيىن ۇلعايتىلدى.
ەڭبەك جاعدايلارى زياندى جۇمىستا ىستەيتىن قازاقستاندىقتاردىڭ الەۋمەتتىك قورعاۋ دەڭگەيىن ارتتىرۋ ءۇشىن مەملەكەت باسشىسىنىڭ تاپسىرماسى بويىنشا ارناۋلى الەۋمەتتىك تولەمدى ەنگىزۋدى كوزدەيتىن زاڭناماعا تۇزەتۋلەر ازىرلەنىپ، ماقۇلداندى. 2024 جىلعى 1 قاڭتاردان باستاپ مۇنداي جۇمىسكەرلەر 55 جاسقا تولعان جانە ولار ءۇشىن كەمىندە 7 جىل مىندەتتى كاسىپتىك زەينەتاقى جارنالارى اۋدارىلعان كەزدە 4 قارجى كوزىنەن جۇزەگە اسىرىلاتىن تولەمدى الا الادى. جۇمىسكەرلەر زەينەتكەرلىك جاسقا تولعانعا دەيىن ارناۋلى الەۋمەتتىك تولەمدەر الادى، باستى شارت – ەڭبەك جاعدايلارى زياندى جۇمىسپەن اينالىسپاۋ.
سونىمەن قاتار، مينيسترلىك مەملەكەت باسشىسىنىڭ تاپسىرماسى بويىنشا ءۇش ماڭىزدى باعدارلامالىق قۇجاتتى دايىنداۋ بويىنشا ۇلكەن جۇمىس جۇرگىزدى. ولار قازاقستاننىڭ 2023 – 2027 جىلدارعا ارنالعان كوشى-قون ساياساتىنىڭ تۇجىرىمداماسى، 2024 – 2029 جىلدارعا ارنالعان ەڭبەك نارىعىن دامىتۋ تۇجىرىمداماسى جانە 2030 جىلعا دەيىنگى ءقاۋىپسىز ەڭبەك تۇجىرىمداماسى. ولاردى ىسكە اسىرۋ شەت ەلدەردەن قاجەتتى جوعارى بىلىكتى مامانداردى تارتۋ جانە قولدا بار ەڭبەك رەسۋرستارىن وڭىرلەر اراسىندا ۇتىمدى ءبولۋ ەسەبىنەن ەل ەكونوميكاسىنىڭ دامۋىن، 2029 جىلعا قاراي 3،8 ملن ساپالى جۇمىس ورىندارىنىڭ قۇرىلۋىن قامتاماسىز ەتەدى، بۇل جۇمىسپەن قامتۋدىڭ جالپى قۇرىلىمىندا 45 پايىزدى قۇرايدى، سونداي-اق وندىرىستىك جاراقاتتانۋ دەڭگەيىن، ەڭبەكتى قورعاۋ سالاسىنداعى بۇزۋشىلىقتار سانىن ازايتۋعا، ەڭبەك جاعدايلارى زياندى جانە ءقاۋىپتى جۇمىس ورىندارىنىڭ سانىن ازايتۋ ىقپال ەتەتىن بولادى.
بۇدان باسقا، بيىل ۇلتتىق بىلىكتىلىك جۇيەسىن دامىتۋ ءۇشىن زاڭنامالىق نەگىز قۇرعان «كاسىپتىك بىلىكتىلىك تۋرالى» زاڭ قابىلدانىپ، كۇشىنە ەندى. ول ءوز كەزەگىندە ەكونوميكا سالالارى مەن ءبىلىم بەرۋ جۇيەسى اراسىنداعى ءوزارا بايلانىستى، الىنعان ءبىلىم مەن داعدىلاردىڭ ەڭبەك نارىعىنىڭ سۇرانىستارىنا سايكەستىگىن قامتاماسىز ەتەدى، فورمالدى جانە فورمالدى ەمەس وقىتۋ، سونداي-اق جۇمىس ورنىندا وقىتۋ شەڭبەرىندە بىلىكتىلىكتى تانۋدىڭ ءبىرىڭعاي فورماتىن قالىپتاستىرۋعا مۇمكىندىك بەرەدى.
مەملەكەت مۇگەدەكتىگى بار ادامداردى دا نازاردان تىس قالدىرمايدى. سوندىقتان جىلدىڭ ماڭىزدى وقيعاسى ءبىرى مۇگەدەكتىگى بار ادامداردىڭ قۇقىقتارى تۋرالى كونۆەنسياعا فاكۋلتاتيۆتىك حاتتامانى راتيفيكاسيالاۋ، ول ءبىزدىڭ ازاماتتارعا مۇگەدەكتەردىڭ قۇقىقتارى تۋرادى بۇۇ كوميتەتىنىڭ قاراۋىنا جەكە وتىنىشتەر جىبەرۋگە مۇمكىندىك بەرەدى.
جالپى، مۇگەدەكتىگى بار ادامداردىڭ ءومىر ءسۇرۋ ساپاسىن ارتتىرۋ شەڭبەرىندە جۇمىسقا ورنالاستىرۋ جانە ارنايى جۇمىس ورىندارىن قۇرۋ جونىندە شارالار قابىلدانۋدا. مۇگەدەكتىگى بار ەرەسەك ازاماتتار مەن بالالارعا ارنالعان وڭالتۋ ورتالىقتارى اشىلۋدا. رەسپۋبليكانىڭ بارلىق وڭىرلەرىندە كەدەرگىسىز ورتا قۇرۋ بويىنشا جۇمىستار جۇرگىزىلۋدە. مۇگەدەكتىگى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن جانە ولاردى جەتكىزۋشىلەردى ءوز بەتىنشە تاڭداۋعا مۇمكىندىك بەرەتىن الەۋمەتتىك قىزمەتتەر پورتالىنىڭ جۇمىسى جەتىلدىرىلدى. مەديسينالىق-الەۋمەتتىك ساراپتامانى سىرتتاي پرواكتيۆتى فورماتتا جۇرگىزۋ جونىندەگى پيلوتتىق جوبانى ىسكە اسىرۋ جالعاسۋدا، ول كۋالاندىرۋ ءراسىمىن الدەقايدا وڭتايلاندىردى جانە جەڭىلدەتتى.
سونداي-اق، وتكەن جىلى مەملەكەتتىڭ بارلىق الەۋمەتتىك مىندەتتەمەلەرى ۋاقتىلى جانە تولىق كولەمدە ورىندالعانىن اتاپ وتكىم كەلەدى. بۇگىنگى كۇنى رەسپۋبليكالىق بيۋدجەت قاراجاتى ەسەبىنەن بازالىق جانە ىنتىماقتى زەينەتاقىنى قوسا العاندا، الەۋمەتتىك تولەمدەردىڭ 41 ءتۇرى تولەنەدى. بيىل جاردەماقىلار مەن زەينەتاقىلاردى تولەۋگە 4،4 ملن ادامعا، ونىڭ ىشىندە 2،3 ملن زەينەتكەر مەن 2،1 ملن مەملەكەتتىك جاردەماقى الۋشىعا 4،6 ترلن تەڭگە جۇمسالدى.
وسى جىلدىڭ 11 ايىندا ومىرلىك قيىن جاعدايعا تاپ بولعان 595،7 مىڭنان استام قازاقستاندىق 52،4 ملرد تەڭگەدەن استام سوماعا اتاۋلى الەۋمەتتىك كومەك تۇرىندە مەملەكەتتەن قولداۋ الدى. ااك الۋشىلار اراسىنان 1 جاستان 6 جاسقا دەيىنگى ءاربىر بالاعا 1،5 اەك مولشەرىندە 6،7 ملرد تەڭگە سوماسىنا 186،1 مىڭ بالاعا قوسىمشا تولەم تاعايىندالدى.
جۇمىسپەن قامتۋعا جاردەمدەسۋ شارالارىنىڭ كەشەنىن ىسكە اسىرۋ جۇمىسسىزدىق دەڭگەيىن 4،7 %-عا دەيىن تومەندەتۋگە ىقپال ەتتى. بيىل 961،9 مىڭ قازاقستاندىق جۇمىسقا ورنالاستىرىلدى. وقىتۋ جانە كاسىپتىك باعدار بەرۋ تۇرىندە حالىقتى جۇمىسپەن قامتۋعا جاردەمدەسۋدىڭ قوسىمشا شارالارىمەن شامامەن 311،1 مىڭ ادام قامتىلدى.
2023 جىلى كاسىپكەرلىكتى دامىتۋ جونىندەگى ۇلتتىق جوبانى ىسكە اسىرۋ شەڭبەرىندە الەۋمەتتىك وسال ساناتتارعا جاتاتىن قازاقستاندىقتارعا 9،1 مىڭنان استام گرانت بەرىلدى. مەملەكەت باسشىسىنىڭ جاستاردىڭ كاسىپكەرلىك باستامالارىن ىسكە اسىرۋ ءۇشىن جىلدىق مولشەرلەمەسى 2،5% جەڭىلدەتىلگەن ميكروكرەديتتەر بەرۋ جونىندەگى تاپسىرماسىن ىسكە اسىرۋ شەڭبەرىندە 5،5 مىڭنان استام ميكروكرەديت بەرىلدى.
وسى جەتىستىكتەردىڭ ءبارى الەۋمەتتىك سەرىكتەستەرىمىزدىڭ كومەگىمەن جانە قولداۋىمەن بولىپ وتىر. حالىقارالىق ۇيىمدارعا، بارشا جۇمىس بەرۋشىلەرگە، كاسىپوداق ۇيىمدارىنا، ۇكىمەتتىك ەمەس ۇيىمدار مەن قوعامدىق بىرلەستىكتەر وكىلدەرىنە مينيسترلىكپەن بەلسەندى ءوزارا ءىس-قيمىل جاساعانى ءۇشىن ەرەكشە العىسىمدى بىلدىرەمىن جانە ودان ءارى جەمىستى جۇمىس جاسايمىز دەگەن ۇمىتتەمىن.
زاماناۋي جاڭا سىن-قاتەرلەر ءبىزدىڭ الدىمىزعا جاڭا مىندەتتەر قويىپ وتىر، الداعى جىلى ازاماتتارىمىزدىڭ ءال-اۋقاتىن ارتتىرۋدى قامتاماسىز ەتۋ ءۇشىن ءبىراز جۇمىستار اتقارۋىمىز كەرەك، وعان تەك بىرلەسىپ قانا قول جەتكىزە الامىز.
قۇرمەتتى قازاقستاندىقتار! سىزدەردى كەلە جاتقان 2024 جىلمەن شىن جۇرەكتەن قۇتتىقتايمىن!
جاڭا جىل – ءارقايسىمىز ءۇشىن ەرەكشە مەرەكە. جاڭا جىل ومىرىمىزگە جاقسى وزگەرىستەر اكەلەدى دەپ سەنەمىز، ەلىمىزدىڭ سەنىمدى دامۋىنا ءۇمىت ارتامىز.
وسى جىلى وتانىمىزدىڭ يگىلىگى ءۇشىن جاۋاپكەرشىلىكپەن ەڭبەك ەتكەن ازاماتتارعا زور العىس ايتقىم كەلەدى. جاڭا 2024 جىلى حالىقتىڭ ءومىر ءسۇرۋ ساپاسىنىڭ ارتۋىن، وتباسى مەن رۋحاني قۇندىلىقتاردىڭ نىعايۋىن شىن جۇرەكتەن تىلەيمىن! كەلە جاتقان جىل ءبىزدىڭ ەلىمىز ءۇشىن جاقسىلىق پەن جاسامپازدىققا تولى جىل بولسىن.
بارلىق قازاقستاندىقتارعا زور دەنساۋلىق، ءار وتباسىعا قۇت-بەرەكە، باقىت پەن شاتتىق، قۋانىش پەن ءوزارا تۇسىنىستىك تىلەيمىن!»، – دەلىنگەن سۆەتلانا جاقىپوۆانىڭ ۇندەۋىندە.