ەلىمىزدە وسىنداي اتاۋمەن رەسپۋبليكالىق اكسيا باستالدى.
ءقازىر ەلىمىزدە 3 مىڭعا جۋىق ۋچاسكەلىك پوليسيا پۋنكتى بار، دەپ حابارلايدى Almaty-akshamy.kz Polisia.kz مالىمەتىنە سىلتەمە جاساپ.
ءوز ىسىنە جاۋاپتى، مۇقيات، ادالدىق – ۋچاسكەلىك پوليسيا ينسپەكتورىنىڭ ستاندارتى. ول قۇقىق قورعاۋ ورگاندارىنىڭ اراسىنداعى ادامعا ەڭ جاقىن وكىل. ۋچاسكەلىك پوليسەيلەر حالىقپەن كۇندەلىكتى تىكەلەي بايلانىستا، ازاماتتارعا ءبىرىنشى بولىپ كومەككە كەلىپ، پروبلەمالارىن زەرتتەيدى، شەشۋ جولدارىن تابادى. ولار قىلمىستىڭ جولىن كەسىپ، ازاماتتاردىڭ ءومىر ءسۇرۋ ساپاسىن جاقسارتىپ، ولاردىڭ تىنىشتىعىن ساقتايدى.
ءىىم حالىققا جاقىنىراق بولۋ ءۇشىن “ءسىزدىڭ ۋچاسكەلىك پوليسەي!” اتتى رەسپۋبليكالىق اكسياسىن باستادى. ۆەدومستۆودا اتاپ وتكەندەي، اكسيانىڭ ماقساتى – ءاربىر تۇرعىنعا جەتۋ جانە بەلگىلى ءبىر اۋماقتا قۇقىقتىق ءتارتىپتى نىعايتۋ، پوليسيا جۇمىسى تۋرالى اقپارات الۋ، سونداي-اق قىزمەت كورسەتىلەتىن اكىمشىلىك ۋچاسكە بويىنشا اقپاراتتى تولىق يەلەنۋ.
شارا بارىسىندا ۋچاسكەلىك پوليسيا ينسپەكتورلارى ۆيزيت كارتوچكالارىن تاراتا وتىرىپ، پاتەرلەردى ارالايدى، سونداي-اق وتباسىلىق-تۇرمىستىق قاتىناستار سالاسىنداعى قۇقىق بۇزۋشىلىقتاردى انىقتاپ، ۇساق بۇزاقىلىق جاساۋ، سپيرتتىك ىشىمدىكتەر ءىشۋ جانە قوعامدىق ورىنداردا ماس كۇيىندە جۇرگەندەردى انىقتاۋ جانە جولىن كەسۋ بويىنشا جۇمىس جۇرگىزەدى.
سونىمەن قاتار ۋچاسكەلىك پوليسەيلەر تۇرعىندار قۇرعان الەۋمەتتىك جەلىلەردەگى چاتتارىندا بەلسەندى بايلانىس ورناتىپ، وندا اقپارات پەن شۇعىل حابارلامالارمەن الماسادى. ءىىو قىزمەتىن جەتىلدىرۋدىڭ باسىم باعىتتارىنىڭ ءبىرى – ازاماتتارمەن تىعىز سەنىمدى قارىم-قاتىناس ورناتۋ جانە اكىمشىلىك ۋچاسكەلەردەگى قۇقىق بۇزۋشىلىقتاردىڭ الدىن الۋ جۇمىستارىن جانداندىرۋ.
سونداي-اق، جەرگىلىكتى اتقارۋشى ورگاندار مەن باسقا دا ۇيىمدار وكىلدەرىنىڭ قاتىسۋىمەن تۇرعىندارمەن كەزدەسۋلەر وتكىزۋ، ۋچاسكەلىك پوليسيا پۋنكتتەرىندە ازاماتتاردى قابىلداۋ جوسپارلانۋدا.
اكسيا بارىسىندا “ۇزدىك ۋچاسكەلىك پوليسيا ينسپەكتورى” اتاعىنا كونكۋرس وتەدى. ول ءۇش كەزەڭدە وتكىزىلەدى. باستى ماقسات – كاسىبي جانە ىسكەرلىك قاسيەتتەرگە، سونداي-اق وسى لاۋازىمعا بەلگىلەنگەن بىلىكتىلىك تالاپتارىنا سايكەس كەلەتىن ەڭ قۇزىرەتتى ۋچاسكەلىك پوليسيا ينسپەكتورىن انىقتاۋ. ايتا كەتۋ كەرەك، بۇگىندە ەلىمىزدە 3 مىڭعا جۋىق ۋچاسكەلىك پوليسيا پۋنكتى بار. 7 مىڭنان استام ۋچاسكەلىك پوليسەي قىزمەت اتقارادى، ونىڭ 3،9 مىڭى – قالالاردا، 3،4 مىڭى – اۋىلداردا. ۋچاسكەلىك ۋچاسكەلەرگە بارلىعى 6 مىڭ اكىمشىلىك ۋچاسكە بەكىتىلدى. اتالعان رەسپۋبليكالىق اكسيا قاراشا ايىنىڭ سوڭىنا دەيىن جالعاسادى.