16 جەلتوقسان – قازاقتىڭ ايگىلى وپەرا ءانشىسى، قازاقستاننىڭ حالىق ءارتىسى بيبىگۇل تولەگەنوۆانىڭ تۋعان كۇنىنە وراي، ديماش قۇدايبەرگەن ءوز الەۋمەتتىك جەلىسىندە انشىگە ارناپ جۇرەكجاردى جازبا جاريالادى، دەپ حابارلايدى aqshamnews.kz
ديماش ءوزىنىڭ جازباسىندا بيبىگۇل احمەت قىزىنىڭ تەرەڭ ءارى اسەرلى داۋىسى تەك قازاقستاندا عانا ەمەس، شەتەلدە دە كورەرمەندەردىڭ جۇرەگىن جاۋلاعانىن اتاپ ءوتتى. ول قازاق مۋزىكا مادەنيەتىنە دەگەن سۇيىسپەنشىلىگىن جاستارعا جەتكىزىپ، قانشاما بۋىندى شابىتتاندىرىپ كەلە جاتقان بيبىگۇل اپايىنىڭ ۇلاعاتتى ۇستازدىق ەڭبەگىن ەرەكشە قۇرمەتتەيتىنىن جەتكىزدى.
– قۇرمەتتى بيبىگۇل احمەت قىزى! كۇنى كەشە العان ماراپاتىمدى ءسىزدىڭ 95 جىلدىق مەرەيتويىڭىزدىڭ قارساڭىندا سىزگە ارناۋعا رۇقسات ەتىڭىز. ءسىزدىڭ ونەرىڭىزدەن ءنار الىپ، بالا كەزىمنەن سۋسىنداپ ءوستىم. انالىق قامقورلىعىڭىز بەن ۇستازدىق وسيەتىڭىز ماعان ۇلكەن شابىت بەرىپ، وسى كۇنگە دەيىن جەتكەن جەتىستىكتەرىمنىڭ نەگىزى بولدى.
سونداي-اق، ديماش ءوز جازباسىندا #dears جانكۇيەرلەرىنە جانە بارشا جەرلەستەرىنە شىن جۇرەكتەن العىس ءبىلدىرىپ:
– ەلىمىز امان، جۇرتىمىز تىنىش بولسىن! – دەگەن ىزگى تىلەگىن جولدادى.
بيبىگۇل احمەت قىزىنىڭ 95 جىلدىق مەرەيتويى – قازاق ونەرى ءۇشىن ەرەكشە مەرەكە!