سيسيليادا اپتاپ ىستىق جانە تەمپەراتۋرا رەوردتىق دەڭگەيگە جەتتى. كاتانيادا جوعارى تەمپەراتۋرادان جارىق پەن سۋ ءسوندىرىلدى، سەبەبى جۇيەنىڭ شاماسى جەتپەي جاتىر، دەپ حابارلايدى Almaty-akshamy.kz Euronews-كە سىلتەمە جاساپ.
جەرگىلىكتى ازاماتتىق قورعانىس قىزمەتىنىڭ مالىمەتىنشە، دۇيسەنبى كۇنى كاتانيادا 47،6°C تىركەلگەن. اپتاپ ىستىقتان ءجۇز مىڭداعان سيسيليالىق جارىق پەن سۋسىز وتىر.
«ءبىر جاعىنان، كليماتتىڭ وزگەرگەنى ءۇشىن زاردابىن تارتىپ جاتىرمىز. بۇعان بىرنەشە جىل بۇرىن نازار اۋدارۋىمىز كەرەك ەدى. ەكىنشى جاعىنان – جاڭا جاعدايعا سايكەس كەلمەيتىن ينفراسترۋكتۋرا ءۇشىن»، - دەدى يتاليا ازاماتتىق قورعانىس ءمينيسترى نەللو مۋسۋمەچي.
بەيسەنبىدەن باستاپ كاتانيادا 500 مىڭ ادام كەزەكپەن جارىقسىز وتىرادى، دەدى مۋنيسيپاليتەت وكىلى.
E-distribuzione – Enel الىپ يتاليالىق كومپانيانىڭ ەنشىلەس فيرماسى مۇنداعى ەلەكتر ەنەرگياسىن تاراتۋمەن اينالىسادى. ونىڭ مالىمەتىنشە، «بىرنەشە اپتا بويى اسفالت تەمپەراتۋراسى 50°C-قا جۋىقتاعان». وعان ىلعال اۋا قوسىلعاندا، «جىلۋ دۇرىس تاراماي، كابەلدەردى زاقىمداپ جاتىر».
ەلەكتر ەنەرگياسىنىڭ ءوشۋى سالدارىنان بىرنەشە ۇيدە سۋ توقتاعان. جالپى، 200-300 مىڭ ادام سۋسىز قالعان، دەدى سيدرا سۋ بەرۋ جەلىسى.
E-distribuzione كومپانياسى جۇزدەگەن تەحنيكالىق مامان مەن ونداعان گەنەراتوردى تارتقانىن مالىمدەدى. جەرگىلىكتى بيلىك قارت ادامدارعا جانە باسقا دا وسال توپتاعى ادامدارعا، سونداي-اق ۇيسىزدەرگە كونديسيونەرلەر بەرىپ، تۇرعىنداردان كونديسيونەرلەردى قالىپتى پايدالانۋدى سۇرادى.
كەشە سيسيليالىق ءورت سوندىرۋشىلەر بىرنەشە ءورت وشاعىمەن كۇرەستى. پالەرمو اۋەجايىنىڭ جانىندا ءورت شىعىپ، سەيسەنبى كۇنى تاڭەرتەڭ اۋە ايلاعى بىرنەشە ساعاتقا جابىلدى. ورتتەن تەمىرجول كولىگى زارداپ شەكتى.