1972 جىلعى وليمپيادادا باسكەتبولدان ەرلەر اراسىنداعى فينالدىق ويىندا قازاق ءالجان جارمۇحامەدوۆ تە بولدى.
1972 جىلعى وليمپيادا ويىندارىنىڭ باسكەتبولدان ەرلەر اراسىنداعى فينالدىق ويىندا اقش پەن كسرو كوماندالارى كەزدەسەدى. اقش قۇراماسى ءسوزسىز فاۆوريت سانالدى. سەبەبى 1936 جىلدان بەرى، ياعني باسكەتبول جازعى ويىندار باعدارلاماسىنا قوسىلعاننان باستاپ، امەريكالىق سپورتشىلار ەشقاشان جەڭىلمەگەن.
ولار قاتارىنان 7 رەت التىن الىپ، جەڭىس سەرياسىن كسرو-عا قارسى شەشۋشى كەزدەسۋگە دەيىن 63 ويىنعا دەيىن جەتكىزگەن. الايدا، كەڭەس قۇراماسى دا ءالسىز بولمادى. تاجىريبەلى سەرگەي جانە الەكساندر بەلوۆتار باستاعان كوماندا كەم دەگەندە 7 جىلداي قۇراما ساپىندا بىرگە ويناپ، شەبەر ۇجىمعا اينالعان. ولاردىڭ ساپىندا قازاق باسكەتبولشىسى ءالجان جارمۇحامەدوۆ تە بولدى.
شەشۋشى كەزدەسۋ وليمپيادا ءۇشىن ارنايى سالىنعان جانە 7 مىڭعا جۋىق كورەرمەن سىياتىن ميۋنحەندەگى «رۋدي-زەدلما- يەر-حاللە» ارەناسىندا ءوتتى. قارسىلاس كوماندانىڭ فاۆوريت ەكەنىنە قاراماستان، ويىننىڭ باسىنان-اق كەڭەستىك ويىنشىلار وزدەرىن بەلسەندى كورسەتە ءبىلدى. العاشقى ءۇش مينۋتتان سوڭ ەسەپ كسرو باسىمدىلىعىمەن 5:0 بولدى. امەريكالىق ويىنشىلاردىڭ قارىمتا شابۋىلدارىنا قاراماستان، ويىن بويى كەڭەستىك باسكەتبولشىلار 4:8 ۇپايعا الدا وتىردى. كەزدەسۋدىڭ ءبىرىنشى جارتىسى 26:21 ەسەبىمەن اياقتالدى. ماچتىڭ ەكىنشى جارتىسى دا سوڭعى مينۋتتارعا دەيىن ءدال وسىنداي كەيىپتە ءوتتى. تەك ويىننىڭ بىتۋىنە 6 سەكۋند قالعاندا 49:48 ەسەبىمەن جەڭىپ تۇرعان كسرو قۇراماسى الەكساندر بەلوۆ قاتەلىگىنەن كەيىن ويىن بويى العاش رەت ارتتا قالدى.
ەسەپ تاقتاسىندا كەزدەسۋ سوڭىنا دەيىن 3 سەكۋند قالعانى كورسەتىلدى. ءبىراق بۇل تاقتادا بىرنەشە رەت تەحنيكالىق اقاۋلار بولىپ، دوپ ويىنعا 3 قايتارا ەنگىزىلدى. ءۇش مارتە دوپتى ويىنعا قوسقان ەدەشكونىڭ بۇل جولعى پاسى بار الاڭدى ۇشىپ ءوتىپ، الەكساندر بەلوۆقا ءدال جەتتى دە، كەڭەستىك باسكەتبولشى دوپتى ساقيناعا كيگىءزىپ جىبەردى. سيقىرعا تولى 3 سەكۋند كەڭەستىك قۇرامانى وليمپيادا چەمپيونى ەتتى.