اباي وبلىسىنىڭ پوليسەيلەرى «سينتەتيكانىڭ» اسا ءىرى پارتياسىن وتكىزۋشىنى ۇستادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
وبلىستىق پروكۋراتۋرانىڭ ۇيلەستىرۋىمەن اباي وبلىسى پد-نىڭ ەسىرتكى قىلمىسىنا قارسى ءىس-قيمىل باسقارماسى اسا ءىرى مولشەردە ەسىرتكى قۇرالدارىن جەتكىزۋ ارناسىنىڭ جولىن كەسۋ بويىنشا ارنايى وپەراسيا جۇرگىزدى. سونىمەن قاتار جالدامالى تۇرعىن ءۇيدى ءتىنتۋ بارىسىندا وبلىس ورتالىعىنىڭ 25 جاستاعى تۇرعىنىنان ىشىندە اق ءتۇستى ۇنتاق زاتى بار 84 ZIP-پاكەت پەن ءبىر پوليەتيلەن پاكەت تابىلىپ، تاركىلەندى. سونداي-اق پاتەردە تارازى، ولشەۋىش قاسىق جانە ەسىرتكىنى ولشەپ وراۋعا قاجەتتى زاتتار تابىلدى. ساراپتاما قورىتىندىسىنا سايكەس، الىنعان زات جالپى سالماعى 770 گرامنان اساتىن مەفەدرون پسيحوتروپتىق زاتى ەكەندىگى انىقتالدى. بۇل جاعدايدا تاركىلەنگەن ەسىرتكى قۇرالدارىنىڭ سانى 1540 ءبىر رەتتىك دوزادان اسادى، ولاردىڭ قارا نارىقتاعى قۇنى 16 ملن تەڭگەنى قۇرايدى.
«اتالعان دەرەك ق ر قك-نىڭ 297-بابى 3-بولىگى (ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارىن اسا ءىرى مولشەردە وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ) بويىنشا سوتقا دەيىنگى تەرگەپ-تەكسەرۋ باستالدى. وسى باپتىڭ سانكسياسىمەن 15 جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن»، – دەدى اباي وبلىسى پد باستىعىنىڭ ورىنباسارى ناريمان كۇلدىكوۆ.