ءبىلىم بەرۋ باعىتتارى بويىنشا ەڭ جوعارى جۇمىسقا ورنالاسۋ دەڭگەيى «ۆەتەريناريا» باعىتىندا.
قازاقستاندا جوعارى ءبىلىم بەرۋ باعدارلامالارىنىڭ رەيتينگى جاسالدى، دەپ حابارلايدى Almaty-akshamy.kz
وندا ناقتى قانداي ماماندىق بويىنشا جۇمىسقا تۇرۋ كورسەتكىشى جوعارى ەكەنىن، جالاقى مولشەرىن دە كورۋگە بولادى.
رەيتينگتى جوعارى ءبىلىم جانە عىلىم مينيسترلىگىنىڭ باستاماسىمەن جاسالدى. وسى جۇمىسقا «اتامەكەن» ۇلتتىق كاسىپكەرلەر پالاتاسى دا اتسالىستى.
پالاتانىڭ باسقارۋشى ديرەكتورى ازامات بەيسەنبايەۆتىڭ ايتۋىنشا، رەيتينگتى ازىرلەۋ كەزىندە ەكى مىڭنان استام ءبىلىم بەرۋ باعدارلاماسى زەردەلەندى. سونداي-اق، 80 مىڭداي تۇلەك، 200-دەن استام ساراپشى مەن 100-گە جۋىق وقۋ ورنى قامتىلدى.
نەگىزگى تالاپتار: جۇمىسقا ورنالاسۋ دەڭگەيى، ورتاشا جالاقى، ءبىلىم بەرۋ باعدارلامالارىن اككرەديتاسياسى مەن وقىتۋشىلاردىڭ ساپاسى.
تالداۋ بارىسىندا تۇلەكتەردىڭ اي سايىنعى زەينەتاقى اۋدارىمدارى دا ەسكەرىلدى.
«ءبىلىم بەرۋ باعىتتارى بويىنشا ەڭ جوعارى جۇمىسقا ورنالاسۋ دەڭگەيى «ۆەتەريناريا» باعىتىندا بولىپ تۇر. بۇل كورسەتكىش - 88 پايىز. ال دەنساۋلىق ساقتاۋ مەن الەۋمەتتىك قامسىزداندىرۋ بويىنشا ەڭ جوعارى جالاقى تىركەلدى. وسى سالادا تۇلەكتەر بىردەن اي سايىن 221 841 تەڭگە الادى، بۇل – مەدياندىق جالاقى*. ال «ونەر جانە گۋمانيتارلىق عىلىمدار» باعىتىندا ەڭ تومەن ورتاشا جۇمىسقا ورنالاسۋ دەڭگەيى تىركەلدى»، - دەدى بەيسەنبايەۆ ورتالىق كوممۋنيكاسيالار قىزمەتىندە وتكەن بريفينگتە.
رەيتينگكە سايكەس، باتىس قازاقستان وبلىسىنىڭ تۇلەكتەرى جۇمىسقا ورنالاسۋ كورسەتكىشى بويىنشا 86 پايىزدى كورسەتتى، ەكىنشى ورىندا الماتى وبلىسىنىڭ تۇلەكتەرى - 85 پايىز، ءۇشىنشى ورىندا اتىراۋ وبلىسىنىڭ تۇلەكتەرى - 84 پايىز.
ال قىزىلوردا جانە تۇركىستان وبلىستارىندا ەڭ تومەن جۇمىسقا ورنالاسۋ كورسەتكىشى - 73 پايىز تىركەلدى.
«ەڭ جوعارى جالاقىنى الماتى وبلىسىنىڭ تۇلەكتەرى الاتىنى انىقتالدى، وبلىس بويىنشا تۇلەكتەردىڭ وقۋ بىتىرگەننەن كەيىنگى العاشقى جىلداعى مەدياندىق جالاقىسى 196 769 تەڭگەنى قۇراعان. ەڭ تومەن جالاقى شىمكەنت قالاسىنىڭ تۇلەكتەرىندە – 124 895 تەڭگە»، - دەدى پالاتا وكىلى.
رەيتينگ مينيسترلىك پەن پالاتانىڭ سايتىندا جاريالاندى.
* مەدياندىق جالاقى. ول شارتتى تۇردە جالپى جالاقى شكالاسىن ەكىگە ءبولىپ، ءدال ورتاسىن كورسەتەدى. ازاماتتاردىڭ جارتىسى وسى سومادان كوپ، ال ەكىنشى جارتىسى ءدال وسى سومادان از الادى دەگەندى بىلدىرەدى.