پارلامەنت پالاتالارىنىڭ بىرلەسكەن وتىرىسىندا پرەزيدەنت قاسىم-جومارت توقايەۆ ساراپشىلار قاۋىمىن سيفرلاندىر سالاسىن رەتتەيتىن ءبىرتۇتاس قۇجات ازىرلەۋگە شاقىردى، دەپ حابارلايدى Almaty-akshamy.kz.
«ۇكىمەت جاساندى ينتەللەكتىنى دامىتۋ ىسىنە باسا نازار اۋدارۋعا ءتيىس. الەمدە الداعى بىرنەشە جىلدا وسى سالاعا ءبىر تريلليون دوللاردان استام ينۆەستيسيا سالىنادى دەگەن بولجام بار. جاساندى ينتەللەكت ونى دامىتا بىلگەن ەلدەردىڭ ىشكى جالپى ونىمىنە ايتارلىقتاي ۇلەس قوسۋى مۇمكىن. جاساندى ينتەللەكتىنىڭ مۇمكىندىكتەرىن تولىق پايدالانساق، ءبىلىم ەكونوميكاسىنا تىڭ سەرپىن بەرەمىز. جەتەكشى حالىقارالىق كومپانيالارمەن ىنتىماقتاستىق ورناتۋ كەرەك. بىلىكتى ماماندار دايارلاۋىمىز قاجەت. كەمىندە ءۇش بەلگىلى جوعارى وقۋ ورنى جاساندى ينتەللەكت سالاسىنا قاجەتتى كادر دايارلاۋمەن جانە زەرتتەۋ جۇرگىزۋمەن اينالىسۋى كەرەك»، - دەدى قاسىم-جومارت توقايەۆ.
مەملەكەت باسشىسىنىڭ پىكىرىنشە، قازاقستان ەسەپتەۋ قۋاتتارىن جاھاندىق تۇتىنۋشىلارعا ساتاتىن ورىنعا اينالا الادى.
«سوندىقتان ءىرى مالىمەت ورتالىقتارىن سالۋعا ينۆەستيسيا تارتۋ ءۇشىن ءتۇرلى جەڭىلدىكتەردى دە قامتي وتىرىپ، بارىنشا قولايلى جاعداي جاساۋ كەرەك. سونداي-اق مالىمەتتى ساقتاۋ جانە وڭدەۋ سالاسىندا قازاقستاننىڭ مۇددەسىن ىلگەرىلەتۋ قاجەت. سيفرلاندىرۋ ىسىندە باسشىلىققا الىناتىن قاعيداتتاردى زاڭ جۇزىندە بەكىتەتىن كەز كەلدى. ۇكىمەتتەن، ساراپشىلار قاۋىمىنان، پارلامەنت دەپۋتاتتارىنان ءبىرتۇتاس سالالىق قۇجات ازىرلەۋ ماسەلەسىمەن اينالىسۋدى سۇرايمىن»، - دەدى پرەزيدەنت.