استانا، الماتى، شىمكەنت جانە اقتوبە اۋەجايلارى مۋلتيمودالدى ورتالىق بولۋى ءتيىس. بۇل تۋرالى بۇگىن قازاقستان حالقىنا جولداۋىن جاريالاۋ كەزىندە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«بىزگە تەڭىز ينفراقۇرىلىمىن دامىتۋعا ارنالعان ءبىرتۇتاس جوسپار كەرەك. وندا قۇرىق پورتىنا ايرىقشا ءمان بەرىلۋگە ءتيىس. قۇرىقتى اقتاۋ پورتى سياقتى تولىققاندى لوگيستيكالىق كلاستەرگە اينالدىرۋىمىز قاجەت. «سولتۇستىك-وڭتۇستىك» حالىقارالىق ءدالىزى دە وتە ماڭىزدى. سول ارقىلى پارسى شىعاناعىنا شىعۋعا بولادى. بىرتىندەپ بۇل باعىتتاعى تەمىرجول جەلىسىنىڭ وتكىزۋ مۇمكىندىگىن ەكى ەسە ارتتىرۋ كەرەك. الدىمەن، «بولاشاق-چەليابينسك» تەمىرجول جەلىسىنىڭ قازاقستانداعى بولىگىن جاڭعىرتۋعا كىرىسۋ قاجەت»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، حالىقارالىق دالىزدەرمەن ءتيىمدى بايلانىس ورناتۋ ءۇشىن لوگيستيكا قىزمەتىن تولىق ۇسىنۋ ماڭىزدى. استانا، الماتى، شىمكەنت جانە اقتوبە اۋەجايلارى مۋلتيمودالدى ورتالىق بولۋى ءتيىس. بۇل ورتالىقتار باسەكەگە قابىلەتتى بولۋ ءۇشىن جۇكتەردى قابىلداۋ جانە تاراتۋ قىزمەتى ساپالى اتقارىلۋى كەرەك. جالپى، سالانى دامىتۋ ءۇشىن تاريف جانە رەتتەۋ ساياساتى دۇرىس جۇرگىزىلۋگە ءتيىس. جەكە ينۆەستيسيانى كوپتەپ تارتۋ كەرەك.
«قازاقستان تەمىر جولىن» تولىققاندى كولىك-لوگيستيكا كومپانياسى ەتىپ قايتا قۇرۋ جۇمىسىن جۋىق ارادا اياقتاۋ قاجەت»، - دەدى مەملەكەت باسشىسى.