اقمولا وبلىسىندا براكونەرلەر مەملەكەتتىك قورىق اۋماعىندا ءسىبىر ەلىگىن اتىپ العان، دەپ حابارلايدى Almaty-akshamy.kz.
وبلىستىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، وقيعا قىركۇيەكتىڭ 30-ىندا بولعان. زەرەندى اۋداندىق پوليسيا بولىمىنە «كوكشەتاۋ» مەملەكەتتىك ۇلتتىق تابيعي پاركىنىڭ قىزمەتكەرلەرىنەن «ورماندى بۇلاق» اۋماعىندا براكونەرلەر ۇستالعاندىعى تۋرالى اقپارات تۇسكەن.
«انىقتالعانداي، «ۋاز» كولىگىنىڭ ىشىندە جۇرگىزۋشى مەن ءۇش جولاۋشىسى بولدى. تەكسەرۋ كەزىندە كولىكتىڭ ىشىنەن ءسىبىر ەلىگىنىڭ ۇشاسى جانە 2 مىلتىق تابىلدى. وسىعان بايلانىستى قىلمىستىق كودەكستىڭ 337-بابى 1 بولىگى بويىنشا ءىس قوزعالدى. سونىمەن بىرگە، تىركەلمەگەن قارۋدى زاڭسىز ساقتاۋ بويىنشا تەرگەۋ امالدارى جۇرگىزىلە باستادى»، - دەدى ۆەدومستۆودان.
ايتا كەتسەك، اتباساردا اڭشى جىگىت بالىق اۋلاپ وتىرعان ادامعا وق اتقان ەدى.