تەرروريزم تۋرالى جالعان حابار بەرگەن 28 ادام جاۋاپقا تارتىلدى
تەك كەيىنگى 2 ايدا ينتەرنەت ارقىلى جالعان حابارلامالار جىبەرگەن 5 ادام انىقتالدى.
جىل باسىنان بەرى تەرروريزم اكتىلەرى تۋرالى ءتۇرلى مەكەمەلەرگە قاساقانا جالعان بەرگەن 28 ادام جازالانعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا تۇرلىبەك ايتىپ بەردى.
«پوليسيا تەرروريزم اكتىلەرى تۋرالى ءتۇرلى مەكەمەلەرگە قاساقانا جالعان حابار بەرگەن ادامداردى انىقتاپ جاتىر. 22 قىركۇيەكتە الماتى وبلىسىنىڭ ىلە اۋدانىندا ءۇش جالپى ءبىلىم بەرەتىن مەكتەپتىڭ ەلەكتروندى پوشتاسىنا جارىلعىش قۇرىلعىلار تۋرالى حابارلامالار تۇسكەن. كەلەسى كۇنى پوليسيا ورگاندارى ۇقك-مەن بىرلەسىپ، وسى قىلمىستى جاساعان 12 جاستاعى وقۋشىنى تاپتى. قىلمىستىق جاۋاپكەرشىلىك جاسىنا جەتپەۋىنە بايلانىستى وقۋشىعا قاتىستى قىلمىستىق ءىس توقتاتىلدى. ءبىراق، ونىڭ اتا-اناسى كامەلەتكە تولماعان بالانى تاربيەلەۋ جونىندەگى مىندەتتەرىن ورىنداماعانى ءۇشىن اكىمشىلىك قۇقىقبۇزۋشىلىق تۋرالى كودەكستىڭ 127-بابى بويىنشا جاۋاپقا تارتىلدى، 10 اەك كولەمىندە ايىپپۇل سالىندى»، - دەدى شۇعىلا تۇرلىبەك اپتالىق ونلاين بريفينگىدە.
ونىڭ ايتۋىنشا، ينتەرنەتتە باسقا ادامداردىڭ اتىنان جەدەل قىزمەتتەرگە جاپپاي جالعان حابارلاما جىبەرەتىن «سۆاتينگ» اتتى ءانونيمدى قاۋىمداستىقتار جۇمىس ىستەيدى. ونىڭ موتيۆتەرى دە ءار ءتۇرلى – جەكە كەك، جانجال، باسقا ادامعا قيىندىق تۋعىزۋعا ۇمتىلۋ.
«قازاقستاندىق وقۋشىلار اراسىندا دا وسىنداي توپتارعا قىزىعۋشىلىق بايقالادى. سوندىقتان، قۇقىق قورعاۋ ورگاندارى اتا-انالاردان بالاسىنىڭ ينتەرنەتتەگى ىس-ارەكەتىنە مۇقيات قاراۋدى سۇرايدى. ق ر ءىىم ارنايى ورگاندارمەن بىرلەسىپ، شابۋىلداۋشىلاردىڭ IP مەكەنجايلارىن، اككاۋنتتارىن جانە باسقا دا مالىمەتتەرىن بەلگىلەۋ ءۇشىن شەتەلدىك قۇقىق قورعاۋ ورگاندارىمەن، ينتەرنەت-پروۆايدەرلەرمەن ءوزارا جۇمىس ىستەيدى. تەك كەيىنگى 2 ايدا ينتەرنەت ارقىلى جالعان حابارلامالار جىبەرگەن 5 ادام انىقتالدى. جىل باسىنان بەرى مۇنداي ارەكەتتەر ءۇشىن 28 ادام قىلمىستىق جاۋاپكەرشىلىككە تارتىلدى، ولاردىڭ 8ء-ى باس بوستاندىعىنان ايىرىلدى»، - دەدى مينيسترلىك وكىلى.