پرەزيدەنت شىۇ-عا مۇشە مەملەكەتتەر باسشىلارى كەڭەسىنىڭ وتىرىسىنا قاتىستى.
وندا مەملەكەت باسشىسى ەنەرگەتيكالىق ىنتىماقتاستىقتى نىعايتۋ باعىتىنداعى ءوزارا جۇيەلى ىس-ارەكەتتەردى جولعا قويۋدىڭ وزەكتىلىگى ارتىپ كەلە جاتقانىن ايتتى، دەپ حابارلايدى Almaty-akshamy.kz.
«بىزگە ەنەرگەتيكالىق تەپە-تەڭدىكتى قامتاماسىز ەتۋ جۇمىستارىن ۇيلەستىرۋ قاجەت. سونداي-اق ەنەرگەتيكانىڭ جاڭا تۇرلەرىنە كوشۋگە، ەكونوميكا مەن ونەركاسىپتى كومىرتەگىنەن ارىلتۋعا باعىتتالعان كەلىسىمدى ىس-ارەكەتتەر كەرەك. وسىعان بايلانىستى كەلەسى استانا سامميتىنە دەيىن شىۇ-نىڭ ەنەرگەتيكالىق ستراتەگياسىن كەلىسۋدى ۇسىنامىن. بۇل قۇجاتتىڭ قابىلدانۋى ورنىقتى دامۋ سالاسىنداعى بۇۇ كۇن ءتارتىبىنىڭ ماقساتتارىن جۇزەگە اسىرۋعا ىقپال ەتەدى»، – دەدى مەملەكەت باسشىسى.
پرەزيدەنت اتالعان ماسەلەنىڭ اسا ماڭىزدى ەكەنىن ەسكەرە وتىرىپ، قازاقستاندا شىۇ-نىڭ ەنەرگەتيكالىق فورۋمىن وتكىزۋگە دايىن ەكەنىمىزدى جەتكىزدى. بۇل سالاداعى ىنتىماقتاستىقتىڭ پەرسپەكتيۆالارىن جان-جاقتى تالقىلاۋ ەلدەرىمىزدىڭ ەنەرگەتيكالىق قاۋىپسىزدىگى مەن تەڭگەرىمدى دامۋىن قامتاماسىز ەتۋ ءۇشىن بىرلەسكەن ادىستەر ازىرلەۋگە مۇمكىندىك بەرەدى.
پرەزيدەنت ءارتۇرلى ەلدەر مەن الەۋمەتتىك توپتار اراسىنداعى «سيفرلىق الشاقتىق» وزەكتى پروبلەماعا اينالىپ وتىرعانىن اتاپ ءوتتى. «سوندىقتان سيفرلىق تەڭسىزدىكتى جوسپارلى تۇردە ازايتۋ ءبىزدىڭ ۇيىم قىزمەتىندە ناقتى باسىمدىققا اينالۋعا ءتيىس» دەدى.
«ءۇندىستان شىۇ-عا ءتوراعالىق ەتكەن كەزەڭدە بۇل باعىتتاعى ىنتىماقتاستىقتى دامىتۋ ءۇشىن اۋقىمدى جۇمىس اتقاردى. ەندى وسى ستراتەگيالىق ماڭىزدى سالاداعى ۇزدىك تاجىريبەلەردى الماسۋ ءىسىن ودان ءارى جالعاستىرىپ، جولعا قويىلعان بايلانىستاردى ساقتاۋ جانە نىعايتۋ ماڭىزدى. بىلتىر قازاقستان بۇۇ-نىڭ ەلەكتروندى ۇكىمەتتى دامىتۋ يندەكسى بويىنشا 28-ورىندى يەلەندى. بۇل – شىۇ-عا مۇشە مەملەكەتتەر اراسىنداعى ەڭ جوعارى كورسەتكىش»، – دەدى پرەزيدەنت.