مينيسترلەر بىرلەسكەن كومميۋنيكە قابىلدادى جانە ەكى جىل مەرزىمگە كەزەكتى ىنتىماقتاستىق جوسپارىن بەكىتتى.
تاجىكستان استاناسى دۋشانبە قالاسىندا شانحاي ىنتىماقتاستىق ۇيىمىنا مۇشە مەملەكەتتەر قورعانىس مينيسترلەرىنىڭ كەڭەسى بولىپ ءوتتى، دەپ حابارلايدى Almaty-akshamy.kz.
ءىس-شاراعا قورعانىس ۆەدومستۆولارىنىڭ باسشىلارى: ءۇندىستاننان – رادجناتح سينگح، قازاقستاننان – گەنەرال-لەيتەنانت نۇرلان ەرمەكبايەۆ، قىتايدان – گەنەرال-پولكوۆنيك ۆەي فەنحە، قىرعىزستاننان – گەنەرال-مايور تاالايبەك ومۋرالييەۆ، پاكىستاننان – پەرۆەز حاتتاك، رەسەيدەن – ارميا گەنەرالى سەرگەي شويگۋ، تاجىكستاننان – گەنەرال-پولكوۆنيك شەرالي ميرزو جانە وزبەكستاننان – گەنەرال-لەيتەنانت باحودير كۋربانوۆ قاتىستى.
رەسمي مالىمەتتەرگە جۇگىنسەك، كەڭەسكە قاتىسۋشىلار دوستىق جانە سىندارلى ءوزارا ءىس-قيمىل جاعدايىندا شىۇ-عا مۇشە مەملەكەتتەر اراسىنداعى ءوزارا تۇسىنىستىكتىڭ جوعارى دەڭگەيىن اتاپ وتە وتىرىپ، حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى توڭىرەگىندە پىكىر الماستى. اۋعانستان اۋماعىندا ورىن الىپ جاتقان تاۋەكەلدەر مەن قاۋىپ-قاتەرلەردى بەيتاراپتاندىرۋ بويىنشا باعىتتار مەن ىقتيمال ارەكەتتەردى تالقىلادى.
«شانحاي ىنتىماقتاستىق ۇيىمىنىڭ وڭىردەگى جانە الەمدەگى ماڭىزى ارتتى. وڭىرلىك، سونداي-اق حالىقارالىق ۇيىمدارمەن جانە بىرلەستىكتەرمەن ىنتىماقتاستىق ءىس جۇزىندە نىعايۋدا»، – دەدى قازاقستاننىڭ قورعانىس ءمينيسترى، گەنەرال-لەيتەنانت نۇرلان ەرمەكبايەۆ.
كەڭەسكە قاتىسۋشىلار شىۇ-نىڭ وڭىرلىك سەرىكتەس ۇيىمدارمەن ءىس جۇزىندەگى ءوزارا ءىس-قيمىلدى ورىستەتۋ كەرەكتىگىن ايتتى.
«سونىمەن بىرگە، شىۇ-عا مۇشە مەملەكەتتەر قورعانىس ۆەدومستۆولارىنىڭ باسشىلارى بيىلعى جىلعى قىركۇيەكتە رەسەي فەدەراسياسىندا «بەيبىت ميسسيا – 2021» بىرلەسكەن تەرروريزمگە قارسى اسكەري كوماندالىق-شتابتىق وقۋ-جاتتىعۋلارىن وتكىزۋدى تالقىلادى»، – دەلىنگەن قورعانىس مينيسترلىگى باسپا ءسوز قىزمەتىنىڭ حابارلاماسىندا.
ءىس-شارا بارىسىندا شىۇ كەڭىستىگىندە قاۋىپسىزدىكتى نىعايتۋعا جانە تۇراقتىلىقتى قولداۋعا باعىتتالعان ىنتىماقتاستىقتى جالعاستىرۋ، سونداي-اق 2022 جىلى كەزەكتى وتىرىستى وزبەكستاندا وتكىزۋ تۋرالى ۋاعدالاستىقتارعا قول جەتكىزىلدى. شانحاي ىنتىماقتاستىق ۇيىمىنا مۇشە ەلدەردىڭ قورعانىس مينيسترلەرى كەڭەستىڭ قورىتىندىسى بويىنشا حاتتاماعا قول قويىپ، بىرلەسكەن كومميۋنيكە قابىلدادى جانە ەكى جىل مەرزىمگە كەزەكتى ىنتىماقتاستىق جوسپارىن بەكىتتى.