بۇل - COVID-19 پاندەمياسىمەن كۇرەستەگى ىنتىماقتاستىق شەڭبەرىندە جۇزەگە اسقان شارا.
قازاقستاننان قىرعىزستانعا «QazVac» يناكتيۆتەندىرىلگەن ۆاكسيناسىنىڭ 25 000 دوزا كولەمىندەگى ىزگىلىك كومەك جەتكىزىلدى، دەپ حابارلايدى Almaty-akshamy.kz ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
ونى بىشكەكتە تاپسىرۋ ءراسىمى قىرعىزستان دەنساۋلىق ساقتاۋ ءمينيسترى الىمكادىر بەيشەنالييەۆ، قازاقستان ەلشىسى ءراپىل جوشىبايەۆ پەن مەديسينالىق ۇيىمدار وكىلدەرىنىڭ قاتىسۋىمەن ءوتتى.
مينيستر الىمكادىر بەيشەنالييەۆ ەلدە كوروناۆيرۋستىق ينفەكسيانىڭ ودان ءارى تارالۋىنا قارسى ءىس-قيمىلدا ماڭىزدى قولداۋ كورسەتكەنى ءۇشىن قازاقستان تاراپىنا شىنايى ريزاشىلىعىن ءبىلدىردى.
«ءبىز رەسپۋبليكا تۇرعىندارىنىڭ Astra Zeneca، Sputnik V جانە باسقا دا شەتەلدىك ۆاكسينالارمەن قاتار QazVac-پەن دە ەكپە الاتىنىنا قۋانىشتىمىز»، - دەپ اتاپ ءوتتى ول وسى ورايدا.
ونىڭ ايتۋىنشا، قازاقستاندىق ۆاكسينا حالىقتى ۆاكسينالاۋ پۋنكتتەرىنە جەدەل تاراتىلادى جانە ازاماتتاردىڭ كوروناۆيرۋستى جۇقتىرۋ ءقاۋپىن ازايتۋ بويىنشا رەسپۋبليكانىڭ مەديسينالىق جۇيەسىنىڭ مۇمكىندىكتەرىن نىعايتادى.
ءوز كەزەگىندە ءراپىل جوشىبايەۆ ۆاكسينانى جەتكىزۋدى قازاقستان پرەزيدەنتى قاسىم-جومارت توقايەۆتىڭ قىرعىزستان پرەزيدەنتى سادىر جاپاروۆپەن كەلىسسوزدەرىنىڭ ناتيجەلەرى بويىنشا بەرگەن تاپسىرماسىنا سايكەس قازاقستان ۇكىمەتى ۇيىمداستىرعانىن اتاپ ءوتتى.
«قىرعىزستان ءبىزدىڭ دوستارىمىز بەن حالىقارالىق سەرىكتەستەرىمىزدىڭ اراسىندا ءبىرىنشى بولىپ كوروناۆيرۋسقا قارسى قازاقستاندىق ۆاكسينا الادى، بۇل ەلدەرىمىز اراسىنداعى دوستىق پەن تاتۋ كورشىلەستىك قاتىناستارىن تاعى دا راستايدى»، – دەپ اتاپ ءوتتى ەلشى.
ول سونداي-اق قازاقستاننىڭ ىزگىلىك كومەگى كوپتەگەن ادامداردىڭ ءومىرىن قۇتقارۋعا جانە قىرعىزستانداعى سانيتارلىق-ەپيدەميولوگيالىق جاعدايدى جاقسارتۋعا كومەكتەسەتىنىنە سەنىم ءبىلدىردى.
«QazVac»-تى قازاقستاننىڭ ءبىلىم جانە عىلىم مينيسترلىگىنىڭ بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى ءوندىرىپ شىعارعان جانە 2021 جىلدىڭ باسىنان بەرى ول رەسەيلىك جانە قىتايلىق ماماندار ازىرلەگەن پرەپاراتتارمەن قاتار قازاقستاندىقتاردى ۆاكسينالاۋ ءۇشىن كەڭىنەن قولدانىلادى. قازاقستاندا كلينيكالىق سىناقتار مەن ونى كەڭىنەن قولدانۋ تاجىريبەسى «QazVac» ۆاكسيناسىنىڭ قاۋىپسىزدىگىن جانە ونىڭ كوروناۆيرۋستىق ينفەكسيا مەن ونىڭ اۋىر تۇرلەرىن جۇقتىرۋدىڭ الدىن الۋدا جوعارى تيىمدىلىگىن (90%-دان استام) كورسەتتى.
«QazVac»-پەن ۆاكسينالاۋ 18 جاستان اسقان ادامدارعا ۇسىنىلادى جانە بۇلشىقەت ىشىنە ەكى كەزەڭدە جۇرگىزىلەدى، ولاردىڭ اراسىنداعى ۇسىنىلاتىن ارالىق 21 كۇندى قۇرايدى. بۇدان بۇرىن حابارلانعانداي، سالالىق ورگاندار وتاندىق ۆاكسيناعا كەلىسىم الۋ ءۇشىن دۇنيەجۇزىلىك دەنساۋلىق ساقتاۋ ۇيىمىمەن جۇمىس جۇرگىزىپ جاتىر.