بەلارۋس رەسپۋبليكاسىنىڭ شانحاي ىنتىماقتاستىعى ۇيىمىنا كىرۋ پروسەسى اياقتالۋعا جاقىن.
بۇل تۋرالى مەملەكەت باسشىسى قاسىم-جومارت توقايەۆ شىۇ-عا مۇشە مەملەكەتتەر باسشىلارى كەڭەسىنىڭ وتىرىسىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەڭ الدىمەن، شانحاي ىنتىماقتاستىق ۇيىمىنا ءۇندىستان رەسپۋبليكاسىنىڭ تابىستى ءتوراعالىق ەتكەنى ءۇشىن پرەمەر-مينيستر نارەندرا مودي مىرزاعا العىس ايتامىن. ءسىزدىڭ ەلىڭىز ۇيىمىمىزدى دايەكتى دامىتۋعا جانە ونىڭ حالىقارالىق بەدەلىن ارتتىرۋعا ەلەۋلى ۇلەس قوستى. بۇگىنگى سامميت اشىقتىق، ءوزارا سەنىم مەن تەڭ قۇقىقتىق پرينسيپتەرىنە نەگىزدەلگەن جاھاندىق كوپجاقتى ديالوگقا تىڭ سەرپىن بەرەدى. شىۇ قارقىندى تۇردە كەڭەيىپ كەلەدى. بۇل ۇيىمنىڭ ءرولى ارتىپ كەلە جاتقانىن جانە كوپجاقتى ءوزارا ءتيىمدى ىنتىماقتاستىعىمىزدىڭ نىعايا تۇسكەنىن بىلدىرەدى.
وسى رەتتە ارىپتەسىمىز يران يسلام رەسپۋبليكاسىنىڭ پرەزيدەنتى يبراحيم ءرايسيدى شىۇ-عا تولىققاندى مۇشە مەملەكەت مارتەبەسىن يەلەنۋىمەن قۇتتىقتاۋعا رۇقسات ەتىڭىزدەر. بەلارۋس رەسپۋبليكاسىنىڭ دا ءبىزدىڭ ۇيىمعا مۇشە اتانۋ پروسەسى اياقتالۋعا جاقىن. وسى جاعدايدى پايدالانا وتىرىپ، ارىپتەسىمىز پرەزيدەنت الەكساندر گريگوريەۆيچ لۋكاشەنكونى كەشە وتكەن بەلارۋستىڭ تاۋەلسىزدىك كۇنىمەن قۇتتىقتايمىن. باۋىرلاس بەلورۋس حالقىنا اماندىق، باق-بەرەكە تىلەيمىن. بىرنەشە كۇننەن كەيىن وزبەكستان رەسپۋبليكاسىندا پرەزيدەنت سايلاۋى وتەدى. قۇرمەتتى پرەزيدەنت شاۆكات ميرومونوۆيچ ميرزيويەۆكە وسى ماڭىزدى شارانى تابىستى وتكىزۋگە تىلەكتەستىك بىلدىرەمىن»، - دەدى ق.توقايەۆ.
پرەزيدەنت اتاپ وتكەندەي، شانحاي ىنتىماقتاستىق ۇيىمىنىڭ حالىقارالىق بەدەلى جوعارى.
«بۇگىندە تابىستى ءارى كوپجاقتى ۇيىمعا اينالدى. جەر شارى حالقىنىڭ شامامەن جارتىسىن قامتيتىن شىۇ – كۇن تارتىبىندە اۋقىمدى ماسەلەلەردى قاراستىراتىن بىرەگەي ەۋرازيالىق ۇيىم. الەمدىك ءجىو-نىڭ تورتتەن ءبىرى، دۇنيەجۇزىلىك ساۋدانىڭ 15 پايىزى ءبىزدىڭ مەملەكەتتەرىمىزدىڭ ۇلەسىنە تيەسىلى»، - دەدى مەملەكەت باسشىسى.