پرەزيدەنت شىۇ-عا مۇشە مەملەكەتتەر باسشىلارى كەڭەسىنىڭ وتىرىسىنا قاتىستى.
مەملەكەت باسشىسى «ءۇش زۇلىم كۇشكە»، ترانسۇلتتىق ۇيىمداسقان قىلمىسقا، زاڭسىز ەسىرتكى اينالىمىنا جانە كيبەرقىلمىسقا قارسى كۇرەسكە باسا ءمان بەرىلەتىنىن ايتتى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
جيىن بارىسىندا مەملەكەت باسشىسى حالىقارالىق قۇقىق نەگىزدەرى مەن ونىڭ ماڭىزدى قاعيداتىنىڭ، ياعني تەڭدەي، بىرلەسكەن، بولىنبەيتىن، كەشەندى جانە تۇراقتى قاۋىپسىزدىكتىڭ بۇزىلۋى قالىپتى جاعدايعا اينالعانىن ايتتى.
«ساياسي ىقپالى زور، ەكونوميكالىق مۇمكىندىگى مول جانە وراسان زور ادام رەسۋرسىنا يە شىۇ ورنىقتى دامۋ ماقساتتارىنا قول جەتكىزۋگە جانە ادامزاتتىڭ زاماناۋي سىن-قاتەرلەرىن ەڭسەرۋگە ەلەۋلى قوسا الاتىنىنا سەنىمدىمىن. جاھاندىق ءتارتىپتى تۇبەگەيلى ترانسفورماسيالاۋ جاعدايىندا بۇرىن-سوڭدى بولماعان گەوساياسي شيەلەنىستىڭ، ساۋدا جانە سانكسيالىق سوعىستاردىڭ، سونداي-اق باسقا دا زاماناۋي سىن-قاتەرلەردىڭ كۇشەيە تۇسكەنىنە كۋا بولىپ وتىرمىز»، – دەدى پرەزيدەنت.
سونىمەن قاتار ءبىزدىڭ ءتوراعالىعىمىز كەزىندە «ءۇش زۇلىم كۇشكە»، ترانسۇلتتىق ۇيىمداسقان قىلمىسقا، زاڭسىز ەسىرتكى اينالىمىنا جانە كيبەرقىلمىسقا قارسى كۇرەسكە باسا ءمان بەرىلەتىنىن جەتكىزدى.
«تەرروريزمگە، سەپاراتيزمگە جانە ەكسترەميزمگە قارسى ءىس-قيمىل جونىندەگى 2025-2027 جىلدارعا ارنالعان ىنتىماقتاستىق باعدارلاماسىن جاڭارتۋعا كۇش سالۋىمىز كەرەك. بۇدان بولەك، قازاقستان شىۇ-نىڭ 2024-2029 جىلدارعا ارنالعان ەسىرتكىگە قارسى ستراتەگياسى مەن ونى جۇزەگە اسىرۋ جونىندەگى ءىس-قيمىل باعدارلاماسىن قابىلداۋدى ۇسىنادى. بۇل شارالاردىڭ ءبارى تۇراقتىلىققا جانە شىۇ كەڭىستىگىندەگى قاۋىپسىزدىكتى جۇيەلى تۇردە كۇشەيتۋگە سەپتىگىن تيگىزەدى. اۋعانستانداعى داعدارىستى ەڭسەرۋگە ارنايى نازار اۋدارعان ءجون بولار ەدى. بۇۇ-نىڭ ۇيلەستىرۋىمەن اۋعان حالقىنا كورسەتىلەتىن كومەكتى جالعاستىرۋ ماڭىزدى. سوندىقتان الماتى قالاسىندا ورتالىق ازيا مەن اۋعانستان ءۇشىن تۇراقتى دامۋ ماقساتتارى جونىندەگى بۇۇ-نىڭ اۋماقتىق ورتالىعىن اشۋ جونىندەگى ءبىزدىڭ باستامامىزعا تاعى دا ءتيىستى دەڭگەيدە نازار اۋدارۋدى ۇسىنامىز. وسى اسا قاجەتتى قۇرىلىمعا سىزدەر قولداۋ كورسەتەدى دەپ سەنەمىن. اوسشك-تى تولىققاندى حالىقارالىق ۇيىمعا اينالدىرۋ پروسەسىن باستاۋعا قولداۋ كورسەتكەنى ءۇشىن شىۇ-عا مۇشە مەملەكەتتەرگە ارنايى ريزاشىلىعىمدى بىلدىرەمىن»، – دەدى مەملەكەت باسشىسى.