ءىىم قازاقستاندىقتاردان شىرشانى زاڭسىز كەسۋ فاكتىلەرى تۋرالى حابارلاۋدى سۇرايدى، دەپ حابارلايدى اlmaty-akshamy.kz. Polisia.kz-كە سىلتەمە جاساپ.
قىلقان جاپىراقتى اعاشتاردى زاڭسىز كەسۋدىڭ الدىن الۋ – پوليسيانىڭ جاڭا جىل قارساڭىنداعى مىندەتتەرىنىڭ ءبىرى.
ماسەلەن، 15 جەلتوقساننان ءىىم ەكولوگيالىق قۇقىق بۇزۋشىلىقتاردى انىقتاۋعا جانە جولىن كەسۋگە باعىتتالعان “شىرشا” اكسياسىن باستادى. اكسيا بارىسىندا تابيعاتتى قورعاۋ پوليسياسىنىڭ قىزمەتكەرلەرى ورمان القاپتارى بويىنشا رەيدتەر جۇرگىزەدى. ولارعا ورمان شارۋاشىلىعى جانە جانۋارلار دۇنيەسى ينسپەكسياسىنىڭ وكىلدەرى دە قاتىسادى.
پوليسەيلەر اعاشتار مەن بۇتالاردى زاڭسىز كەسكەنى ءۇشىن اكىمشىلىك جانە قىلمىستىق جاۋاپكەرشىلىك قاراستىرىلعانىن ەسكەرتەدى. وسى سالادا تابيعات قورعاۋ زاڭناماسىن بۇزعانى ءۇشىن 50 اەك-تەن 150 اەك-كە دەيىن ايىپپۇل قاراستىرىلعان. ەگەر قۇقىققا قايشى ارەكەتتەرمەن ەلەۋلى زالال كەلتىرىلسە، وندا بۇل جاعدايدا 160 اەك-تەن 10 جىلعا دەيىن باس بوستاندىعىنان ايىرۋ جازاسى قاراستىرىلعان.
سونداي-اق ەگەر ءسىز شىرشالاردى نەمەسە باسقا قىلقان جاپىراقتى اعاشتاردى زاڭسىز ساتۋدىڭ نەمەسە تاسىمالداۋدىڭ كۋاسى بولساڭىز، ءتارتىپ ساقشىلارى بۇل تۋرالى “102” تەلەفونى ارقىلى حابارلاۋدى سۇرايدى.