ءىىم اۆتوكولىك جۇرگىزۋشىلەرىنە ايىپپۇل سالۋ كەزىندە پوليسيا قىزمەتكەرلەرى قانداي كريتەرييلەرگە سۇيەنەتىنىن تۇسىندىرۋگە تىرىستى، دەپ حابارلايدى aqshamnews.kz
ءىىم ءاربىر جاعدايدى جەكە قاراستىرۋ قاجەت ەكەنىن مالىمدەدى. مىسالى، كەي جاعدايدا كولىكتەن سىرتقا شىعارىلعان قول نەمەسە اياق جۇرگىزۋشىنىڭ نەمەسە جولداعى باسقا ادامدارعا كورۋ مۇمكىندىگىنە كەدەرگى كەلتىرۋى مۇمكىن.
ءارقاشان قۇقىقبۇزۋشىلىقتىڭ نيەتى مەن قۇرامىنا سۇيەنۋ كەرەك. ەگەر ادام تەك شىنتاعىن شىعارىپ، بۇل جۇرگىزۋشىنىڭ كورىنۋىنە كەدەرگى كەلتىرمەسە جانە جول قوزعالىسى ەرەجەلەرىن بۇزۋعا سەبەپ بولماسا، وندا بۇل جاعدايدا قۇقىقبۇزۋشىلىق قۇرامى جوق. ال ەگەر ادام دەنەسىنىڭ جارتىسىن شىعارىپ، قولىن بۇلعاپ، باسقا جۇرگىزۋشىلەرگە كەدەرگى كەلتىرسە نەمەسە ولاردىڭ نازارىن اۋدارتاتىن بولسا — بۇل جاعدايدا اكىمشىلىك قۇقىقبۇزۋشىلىق قۇرامى بار، – دەدى ق ر ءىىم زاڭناما جانە نورماشىعارماشىلىق قىزمەتتى ۇيلەستىرۋ دەپارتامەنتىنىڭ باستىعى رەنات زۇلقايىروۆ.
الايدا «كەدەرگى كەلتىرۋدىڭ» ناقتى قالاي انىقتالاتىنى نەمەسە ولشەنەتىنى ازىرگە بەلگىسىز.
كونتەكست
2025 جىلى 13 ناۋرىزدان باستاپ قازاقستاندا ءجۇرىپ بارا جاتقان كولىكتىڭ تەرەزەسىنەن، ليۋگىنەن نەمەسە ەسىگىنەن دەنە مۇشەلەرىن قولدى، اياقتى نەمەسە باستى شىعارۋعا رەسمي تۇردە تىيىم سالىندى. بۇل تالاپتى بۇزعاندارعا 10 ايلىق ەسەپتىك كورسەتكىش (اەك)، ياعني 39 320 تەڭگە كولەمىندە اكىمشىلىك ايىپپۇل قاراستىرىلعان. بۇعان دەيىن استانادا جولاۋشىنىڭ كولىكتەن اياعىن شىعارعانى ءۇشىن جۇرگىزۋشىگە ايىپپۇل سالىنعان بولاتىن.