الماتىدا جاڭا «شىڭ» ستۋدەنتتىك تەاترىنىڭ اشىلۋ سالتاناتى ءوتتى. تەاتر اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ونەر، مادەنيەت جانە سپورت ينستيتۋتى جانىنداعى ونەرگە ۇمتىلعان ستۋدەنت-جاستاردىڭ باستاماسىمەن ۇيىمداستىرىلىپ وتىر.
ونەر، مادەنيەت جانە سپورت ينستيتۋتىنىڭ تاربيە ءىسى جونىندەگى ديرەكتورىنىڭ ورىنباسارى گۇلجازيرا احمەتوۆا «شىڭ» تەاترى ستۋدەنتتەردىڭ باستاماسىمەن قۇرىلعانىن ايتادى.
– بىلتىر بىزدە قوعام اراسىنداعى الەۋمەتتىك ماسەلەلەردى كوتەرۋ ماقساتىندا فەستيۆال ۇيىمداستىرىلدى. سول كەزدە ستۋدەنتتەر قويىلىم قويىپ، ارى قاراي وزدەرىنىڭ ىنتاسىمەن تەاتر اشۋدى ۇيعارعان ەدى. وتكەن كۇزدە ەلوردامىز استانادا وتكەن فەستيۆالگە بارىپ كەلدىك. ەندى ونەردىڭ شىڭىنا شىعايىق دەگەن ماقساتپەن «شىڭ» اتانعان ستۋدەنتتەر تەاترىنىڭ اشىلۋىنا بارىنشا قولداۋ تانىتىپ جاتىرمىز، – دەدى.
گ.احمەتوۆا «ءسابي بولعىم كەلەدى» قويىلىمى قوعامداعى الەۋمەتتىك ماسەلەلەردى كوتەرۋگە باعىتتالىپ، سەنارييىن وقۋ ورداسىنىڭ بىلتىرعى تۇلەگى جۇلدىزاي مۇحتاردىڭ جازعانىن ايتادى.
-جالپى، قويىلىمدى سومداعان جاستاردىڭ بارلىعى اكتەرلىك شەبەرلىك كۋرسىنان ءدارىس الماسا دا، ىنتالارى وتە جوعارى. دەكوراسياسىن، ساحنالىق كيىم ۇلگىلەرىن ستۋدەنتتەردىڭ وزدەرى دايىندادى. سپەكتاكلدىڭ ايتار ويى انىق – جاستار اراسىندا بەلەڭ الىپ بارا جاتقان ناشاقورلىق، جەڭىل جۇرىسكە ءتۇسۋ سىندى قوعامعا جات وزەكتى ماسەلەلەردى كوتەرىپ وتىر، – دەدى گ.احمەتوۆا.
ال اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ونەر، مادەنيەت جانە سپورت ينستيتۋتىنىڭ 3-كۋرس ستۋدەنتى، «شىڭ» تەاترىنىڭ رەجيسسەرى ايگەرىم داۋلەت تەاتردىڭ وسى ءبىر عانا قويىلىممەن توقتاپ قالماي، باسقا دا سپەكتاكلدەردى قويۋدى جوسپارلاپ وتىرعانىن ايتادى.
ء-بىزدىڭ تەاتر، نەگىزىنەن، الەۋمەتتىك تاقىرىپتاردى قوزعايدى. ستۋدەنتتەر قوعامنىڭ ءارتۇرلى تاقىرىپتارىن ەركىن ايتا الاتىن حالىق قوي. سول سەبەپتى، ءوزىمىز، ستۋدەنتتەر بولىپ، قوعامنىڭ باسقا تەاترلاردا كورسەتپەيتىن تۇستارىن كورسەتكىمىز كەلدى. «ءسابي بولعىم كەلەدى» قويىلىمى ءبىر ادامنىڭ ءومىرى ارقىلى ومىردە كۇندەلىكتى ورىن الاتىن جەمقورلىق، الداۋ-ارباۋ سىندى وتكىر پروبلەمالاردى كوتەرەدى. باسپانا تۇرعىزباس بۇرىن ونىڭ ىرگەتاسىنىڭ مىقتىلىعى قانشالىقتى ماڭىزدى بولسا، ءسابي كەزىنەن بالاعا جىلىلىق پەن جاقسى تاربيەنىڭ سونشالىقتى ماڭىزدى ەكەنىن جەتكىزگىمىز كەلەدى. سونىمەن قاتار، «ءبىر داۋرەن بوزبالالىق» اتتى ستۋدەنتتەرىمىزدىڭ جازعان سپەكتاكلى بار. ءساتىن سالسا، كەلەسى اپتادا ساحنالاساق پا دەپ وتىرمىز، – دەيدى ايگەرىم داۋلەت.